[1] Jesús yachasishqanta wiyayänanpaqmi impuestu cobraqkunapis jusasapakunapis aywayarqan.
[2] Sayta rikaykurmi fariseukuna y ley yachasiqkuna jamurar niyarqan: “¿Imanirtaq kay runaqa jusasapakunawan shuntakaykur mikun?”
[3] Sayno niyaptinmi tinkusiypa yachasir Jesús nirqan:
[4] “Pipis pachak (100) uyshanpita jukta oqraykurqa ¿manaku esqun chunka esqun (99) kaqta aylluykur jukla ashiq aywan?
[5] Tariykurqa kushishqami aparikurkur apan.
[6] Wayinman chaykasirnami reqinakuyashqankunata y vecïnunkunata qayaykasir nin: ‘¡Oqrashqä uyshätami tarimushkä! ¡Lapansi kushikushun!’
[7] “Noqa kaynömi nï: Say runa uyshata tariykur kushikushqannölami jana pasachöpis kushikuyan juk runalapis jusalikuykunata wanakur Tayta Dios munashqannöna kawaptin. Sayno kushikuyan esqun chunka esqun (99) ali ruraq runakunapaq kushikuyashqanpitapis masraqmi.
[8] “Pï warmipis chunka qellayninpita jukta oqraykurqa ¿manaku aksita sarirkasir jukla wayinta pisapakun tarishqanyaq?
[9] Tariykurmi yanasankunata y vecïnankunata qayaykasir nin: ‘¡Oqrashqä qellaynïtami tarishkä! ¡Lapansi kushikushun!’
[10] Saynömi Tayta Diospa angilninkunapis kushikuyan juk runalapis jusalikuykunata wanakur Tayta Dios munashqannöna kawaptin”.
[11] Mastapis Jesús nirqan: “Juk runapashi ishkay surinkuna kanaq.
[12] Sayshi shulka kaq surin papäninta ninaq: ‘Papä, herenciäta rakipaykalämay’. Sayno niptinshi ishkan surinta papänin rakipaykunaq.
[13] “Saypita juk ishkay junaqlatanashi shulka kaq surinqa lapan chaskishqankunata rantikuykur karu markapa aywakunaq. Saychöshi munashqanta rurar lapan qellayninta manakaqkunacho ushanaq.
[14] Sayno ushakäpakush kaykaptinnashi say markacho fiyupa muchuy kanaq. Sayshi say maqta fiyupa mikanar
[15] aruyta ashiptin say markacho taq juk runa kuchinta misipänanpaq chaskinaq.
[16] Saychöshi seqaypa mikanar kuchipa mikuynintapis mikuyta munanaq. Sayno mikanaptinpis manashi pipis qaranaqsu.
[17] “Yarpachakurnashi ninaq: ‘Kaycho mikanaypita wanunaptï papänïpa minkayninkunaqa pacha junta mikushchir kaykäyan.
[18] Kanan kutiykur papänïta nishaq: “Papä, qamtapis Tayta Diostapis rabyanäsirmi jusalikushkä.
[19] Amana surikitanöqa chaskimaynasu, sinöqa minkaynikitanölana chaskiykalämay” ’.
[20] Sayno yarpachakuskirshi papänin kaqpa kutikunaq. “Karulataraq kutiykaqta rikaskirshi papänin kushikushpan cörrila aywar makalakurkur musanaq.
[21] Sayshi surin ninaq: ‘Papä, qamtapis Tayta Diostapis rabyanäsirmi jusalikushkä. Amana surikitanöqa chaskimaynasu’.
[22] “Sayno nikaptinnashi papäninqa ashmayninkunata ninaq: ‘Mas ali kaq mödanata jukla jorqamur surïta jatipäyay. Saynöla sortïjata y lanqitapis jatipäyay.
[23] Nirkur werannin turishta pishtayay fiestata rurar mikunansipaq.
[24] ¡Kay surï wanushqanpitami kawarimush! ¡Oqrakashqanpitami yurimush!’ Sayno nirshi fiestata rurar qalaykuyänaq.
[25] “Qechpa kaq surinqa chakrachöshi kaykänaq. Wayiman chaykashqanchöshi fiestata ruraykäyaqta wiyanaq.
[26] Sayshi juk ashmayninta qayaykur wayicho ima päsashqantapis tapunaq.
[27] Sayshi ashmaynin ninaq: ‘¡Wawqikimi kutimush! Sänu chaykamuptinmi papäniki kushikur werannin turishta pishtasish’.
[28] “Sayno wilaptinshi fiyupa rabyashpan wayiman yaykuyta munanaqsu. Saynashi papänin aywaykur yaykunanpaq yapay yapay ruwanaq.
[29] Sayshi papäninta ninaq: ‘Mana yarqukuypami lapan nimashqaykikunata rurar imaypis yanapaykä. Sayno yanapaykaptïpis amïgükunawan mikuyänäpaq manami ni juk kapishlatapis qomashkankisu.
[30] ¡Kay suriki prostitüta warmikunawan qellaynikita ushaskir kutiykamuptinmi isanqa werannin turishtaraq pishtasishkanki!’
[31] “Sayno niptinnashi taytan ninaq: ‘Mana yarqukuypami noqawan kaykanki, hïju. Lapan imaykäkunapis qamlapaqmi kaykan.
[32] Imano kaptinpis fiestata kushish rurashun. ¡Kay wawqiki wanushqanpitami kawarimush! ¡Oqrakashqanpitami yurimush!’ ”