[1] Р'ожа һ'әйшта Муса гази Һарун кӧр'ава у р'успийед Исраел кьр,
[2] готә Һарун: «Хwәр'а жь гар'ане бона дийарийа паqьжбуне тә'нәки беqӧсур һьлдә у бәранәки беqӧсур жи бона дийарийа т'әвайишәwате у ван бинә ль бәр Хӧдан.
[3] Т'әви зар'ед Исраел хәбәр дә у бежә: ‹Нерики жь бьзьна бона дийарийа паqьжбуне һьлдьн, тә'нә у бәрхе йәксалийә беqӧсур жи бона дийарийа т'әвайишәwате,
[4] ӧса жи щанәга у бәранәк жи чаwа дийарийа һәләqәтийе ль бәр Хӧдан бе дайине у дийарийа нанийә р'унда стьрайи, чьмки иро Хӧдане wәва хӧйа бә›».
[5] Әw тьште кӧ Муса ә'мьр ль wан кьр, һьлдан анинә ль бәр дәре Коне Щьвине у т'әмамийа щьвине һат ль бәр Хӧдан сәкьни.
[6] Муса гот: «Ва чь кӧ Хӧдан ә'мьр кьр кӧ бькьн wәки р'умәта Хӧдан wәва хӧйа бә».
[7] Муса готә Һарун: «Незики горигәһе бә у дийарийа хwәйә паqьжбуне у дийарийа хwәйә т'әвайишәwате бьдә, бона хwә у щьмә'те к'әwандьне бькә, дийарийед жь щьмә'те бьдә у бона wан к'әwандьне бькә, чаwа кӧ Хӧдан ә'мьр кьр».
[8] Һьнге Һарун незики горигәһе бу у тә'не бона дийарийа паqьжбуна хwә сәржекьр.
[9] Кӧр'ед Һарун хун незики wи кьрьн, әwи т'ьлийа хwә хунеда кьр у ль стьруйед горигәһе хьстьн, хуна майи жи р'етә жера горигәһе.
[10] Ле бәз, гӧр'ч'ьк у бәтане щәгәра дийарийа паqьжбуне ль сәр горигәһе шәwьтанд, чаwа кӧ Хӧдан ә'мьр ль Муса кьрьбу,
[11] гошт у ч'әрм жи жь зоме дәр ль сәр егьр Һарун шәwьтанд.
[12] Дийарийа т'әвайишәwате сәржекьр, кӧр'ед Һарун хун анин данә wи, Һарун әw р'әшандә ль сәр һәр алийед горигәһе.
[13] Дийарийа т'әвайишәwат кәр-кәри кьри сәрива анин данә wи у әwи ль сәр горигәһе шәwьтанд.
[14] У әwи навдьл ньгава шуштьн у т'әви дийарийа т'әвайишәwате ль сәр горигәһе шәwьтандьн.
[15] Паше qӧрбана щьмә'те да, жь щьмә'те нерик бона дийарийа паqьжбуне һьлда сәржекьр мина йа пешьн дийарийа паqьжбуне да.
[16] Дийарийа т'әвайишәwате ани, әw анәгори qьраре да.
[17] Дийарийа нани ани, к'ӧлма хwә т'ьжи кьр у ль сәр горигәһе шәwьтанд, хенщи дийарийа т'әвайишәwатейә сәре сьбәһе.
[18] У бона щьмә'те щанәга у бәране дийарийа һәләqәтийе сәржекьр, кӧр'ед Һарун хун анин данә wи, әwи р'әшандә ль сәр һәр алийед горигәһе.
[19] Ӧса жи бәзе щанәге у бәрен, даw, бәзе навдьл, һәр дӧ гӧр'ч'ьк бәзва у бәтане щәгәре анин,
[20] әw бәз данинә ль сәр сәрсинг у Һарун бәз ль сәр горигәһе шәwьтанд.
[21] Паше Һарун сәрсинг у пиле р'асте һьлда чаwа дийарийа һ'әжандьне ль бәр Хӧдан һ'әжанд, чаwа кӧ Муса ә'мьр кьрьбу.
[22] Һарун дәстед хwә бьльнд кьрьн бәрбьр'и щьмә'те бу, дӧа ль wан кьр. Пәй дийарийа паqьжбуне, дийарийа т'әвайишәwате у дийарийа һәләqәтийер'а пәйа бу.
[23] Муса у Һарун к'әтьнә Коне Щьвине у жь wьр дәрк'әтьн дӧа ль щьмә'те кьрьн. Р'умәта Хӧдан т'әмамийа щьмә'тева хӧйа бу.
[24] Һьнге жь Хӧдан агьр дәрк'әт, дийарийа т'әвайишәwате у бәзе ль сәр горигәһе шәwьтанд, щьмә'те кӧ әв йәк дит шабуна кьрә qар'ин у дәвәр'уйа к'әтьн.