[1] Кӧр'ед Һарун, Надаб у Абиһу һәр йәки агьрданга хwә һьлда, агьр кьрьне, бьхур кьрьнә сәр у ль бәр Хӧдан шаш агьр дан, кӧ әв нә ль гора qьрара Хӧдан бу.
[2] У жь Хӧдан агьр дәрк'әт, wан хьст у әw ль бәр Хӧдан мьрьн.
[3] Wи чахи Муса готә Һарун: «Ай бона чь Хӧдан хәбәрда у гот: ‹Әзе нава йед незики мьн дьбьн пироз бьм у ль бәр т'әмамийа щьмә'те бемә пәсьндайине›». Һарун хwә кәр' кьр.
[4] Һьнге Муса гази Мишаел у Әлсафане кӧр'ед Узиеле апе Һарун кьрьн у готә wан: «Һәр'ьн бьрайед хwә жь бәр пирозгәһе һьлдьн бьбьн жь зоме дәрхьн».
[5] Әw чун, чаwа кӧ Муса готьбу әwана кьрасед wанва жь зоме дәрхьстьн.
[6] Муса готә Һарун у кӧр'ед wи Елазар у Ит'амар: «П'ор'е сәре хwә сәр хwәда нәйньн у к'ьнще хwә нәqәлешьн, wәки нәмьрьн у хәзәба Хӧдан нәйе сәре т'әмамийа щьвине. Ле бьра бьрайед wә, ӧса жи т'әмамийа мала Исраел ль сәр wан бьгьрин, к'ижан кӧ Хӧдан шәwьтандьн.
[7] Һун жь дәре Коне Щьвине дәрнәк'әвьн кӧ нәмьрьн, чьмки р'уне Хӧдани р'ункьрьне ль сәр wә йә». Wана жи анәгори готьна Муса кьр.
[8] Хӧдан Һарунр'а хәбәрда у гот:
[9] «Гава тӧ йан кӧр'ед тә бьк'әвьнә Коне Щьвине, шәраб-араqе вәнәхwьн кӧ нәмьрьн. Нава ньсьлед wәда әв йәк qәйдә-qануна һ'әта-һ'әтайе бә,
[10] wәки фьрqийа пироз у нәпироз йан паqьж у нәпаqьж жь һәв дәрхьн
[11] у wан һ'әму qәйдә-qануна ль зар'ед Исраел һин кьн, к'ижанед кӧ Хӧдан бь дәсте Муса ә'мьр ль wан кьрийә».
[12] Муса готә Һарун у кӧр'ед wийә майи, Елазар у Ит'амар: «Жь дийарийед шәwатейә Хӧданр'а дайи, дийарийа нани һьлдьн у һьнда горигәһе бе һәвиртьр'шк бьхwьн. Чьмки әва йа һәрә пироз ә.
[13] Әwи ль щийе пироз бьхwьн, әва п'ара тә у п'ара кӧр'ед тә йә, жь дийарийед шәwатейә Хӧданр'а дайи, чьмки мьнр'а аһа һатийә ә'мьр кьрьне.
[14] Сәрсинге дийарийа һ'әжандьне у пиле дийарийа бәрбьр'икьрьне тӧ щики ль паqьж т'әви кӧр' у qизед хwә бьхwә. Чьмки әвана жь qӧрбанед дийарийед һәләqәтийе нә, алийе зар'ед Исраелда дайи, әw п'ара тә у кӧр'ед тә нә.
[15] Пиле дийарийа бәрбьр'икьрьне у сәрсинге дийарийа һ'әжандьне т'әви бәзе дийарийа шәwате бьра биньн ль бәр Хӧдан бьһ'әжиньн, чаwа дийарийа һ'әжандьне. У бьра әва бь qәйдә-qануна һ'әта-һ'әтайе п'ара тә у кӧр'ед тә бә, чаwа кӧ Хӧдан ә'мьр кьр».
[16] У Муса нерийе дийарийа паqьжбуне гәр'ийа, ле әw иди шәwьтанди бу, әwи һьнге һерса хwә ль кӧр'ед Һарунә майи Елазар у Ит'амар р'акьр у готә wан:
[17] «Wә чьма дийарийа паqьжбуне ль щийе пирозда нәхwарийә? Нә әва йа һәрә пироз ә? Wәр'а һатийә дайине кӧ гӧнә жь сәр щьвине бьдьнә һьлдане у ль бәр Хӧдан к'әwандьне бона wан бькьн.
[18] Аwа хуна wе нәк'әтийә пирозгәһе, кӧ wә гәрәке әw qӧрбан ль щийе пирозда бьхwара, чаwа мьн ә'мьр ль wә кьрьбу».
[19] Һьнге Һарун ль Муса вәгәр'анд у готе: «Аwа иро wана дийарийа паqьжбуна хwә у дийарийа т'әвайишәwата хwә ль бәр Хӧдан дан, әв йәк кӧ һатә сәре мьн, һәгәр иро мьн дийарийа паqьжбуне бьхwара, гәло wе ль Хӧдан хwәш бьһата?»
[20] Муса әв йәк бьһист у ль wи хwәш һат.