[1] Хӧдан Мусар'а хәбәрда у гот:
[2] «Бежә Һарун у кӧр'ед wи, кӧ әwана жь wан дийарийед пирозә кӧ зар'ед Исраел мьнр'а дьдьн, һ'әвза хwә бькьн, кӧ к'аһин наве мьни пироз нәдьнә беһӧрмәткьрьне. Әз Хӧдан ьм.
[3] Бежә wан: ‹Нава т'әмамийа ньсьлед wәда, әw кәсе нава р'ьк'ьнйата wәда, к'ижан кӧ нава нәпаqьжайа хwәда незики wан тьштед пироз бә, йед кӧ зар'ед Исраел Хӧданр'а дийари дьдьн, әw кәс гәрәке ль бәр ч'ә'ве мьн бе ӧндакьрьне. Әз Хӧдан ьм.
[4] К'ижан кӧ жь р'ьк'ьнйата Һарун к'оти бә, йан гәмар же һәр'ә, әw гәрәке жь тьштед пироз нәхwә һ'әта кӧ паqьж бә. Ле әwе кӧ тьштәки к'әвә, к'ижан кӧ жь мьри һ'әр'ьмийә, йан жи йәки кӧ т'охьме wи же чуйи к'әвә,
[5] йан шулькәки к'әвә, к'ижан кӧ wи дьһ'әр'ьминә, йан мәрики к'әвә бьһ'әр'ьмә, йе кӧ тьштәкида нава нәпаqьжайеда йә,
[6] әw мәрьве кӧ ван тьшта к'әвә һ'әта еваре әw нәпаqьж һ'әсаб бә у жь тьштед пироз жи нәхwә һ'әта кӧ хwә пе аве нәшо.
[7] Ле гава р'о һәр'ә ава, һьнге әw паqьж бе һ'әсабе у паше жь тьштед пироз бьхwә, чьмки әw нане wи йә.
[8] Әw мьрар йан дә'вә хwари гәрәке нәхwә, кӧ бь wан нәһ'әр'ьмә. Әз Хӧдан ьм.
[9] Бьра т'әмийед мьн хwәй кьн wәки гӧнә ль сәр хwәда нәйньн, нәһ'әр'ьмьн у нәмьрьн. Әз Хӧдан ьм, йе кӧ wан пироз дькьм.
[10] Т'ӧ кәс пештьри к'аһина жь тьште пироз гәрәке нәхwә, меване к'аһин у п'аләйе wи жи жь тьште пироз гәрәке нәхwьн.
[11] Ле әw кәсе кӧ к'аһин пе п'әре хwә к'ьр'ийә у йе мала wида буйә әвана дькарьн нане wи бьхwьн.
[12] Ле һәгәр qиза к'аһин йәки нә жь мала к'аһина стандийә, әwа жь дийарийед пироз гәрәке нәхwә.
[13] Ле гава qиза к'аһин жьнәби йан мербәр'дайи у безӧр'әт ль сәр мала баве хwәда вәгәр'ийайи бә, һьнге әw мина qизтийа хwә жь нане баве хwә дькарә бьхwә. Ле бәле йе нә жь мала к'аһина гәрәке нәхwә.
[14] Ле һәгәр йәк бе һ'әмде хwә жь тьштед пироз бьхwә, һьнге гәрәке п'арәкә пенща ль сәр wан тьштед пирозда зедәкә у бьдә к'аһин.
[15] К'аһин дийарийед зар'ед Исраелә пироз кӧ Хӧданр'а дьдьн гәрәке нәһ'әр'ьминьн,
[16] нәбә кӧ зар'ед Исраел тьштед пироз бьхwьн гӧнә бькьнә стуйе хwә, чьмки әз Хӧдан ьм, йе кӧ wан пироз дькьм›».
[17] Хӧдан Мусар'а хәбәрда у гот:
[18] «Т'әви Һарун, кӧр'ед wи у һ'әму зар'ед Исраел хәбәр дә у wанр'а бежә: ‹Гава кәсәк жь мала Исраел йан хәрибәки нава Исраелда кӧ дьминә, жь бәр создайинәкева йан бь р'әзәдьлийа хwә qӧрбане Хӧданр'а бьдә чаwа дийарийа т'әвайишәwате,
[19] бона кӧ бе qәбулкьрьне әw qӧрбан гәрәке нер у беqӧсур бьн, пәз-дәwар йан нери бьн.
[20] Т'ӧ тьште бь qӧсур нәкьнә qӧрбан, чьмки әw найе qәбулкьрьне.
[21] К'е дәwарәке йан пәзәке жь бәр создайинәкева йан бь р'әзәдьлийа хwә Хӧданр'а дийарийа һәләqәтийе бьдә, әw гәрәке беqӧсур бә, wәки бе qәбулкьрьне, т'ӧ qӧсур гәрәке ль сәр wе т'ӧнәбә.
[22] Кор, йан сәqәт, йан дәхмә, йан гьле, йан гӧр'и, йан к'ос, йед һа Хӧданр'а нәйньн, жь ван нәкьнә дийарийа шәwате Хӧданр'а, данәйньнә ль сәр горигәһе.
[23] Ле дәwар йан бәрха кӧ ль сәр wан тьштәки кем йан зедә һәбә, дькари чаwа п'ешкеша р'әзәдьлийе бьди, ле бона создайине әw найе qәбулкьрьне.
[24] Һ'әйwане батиледайи, йан һ'ьнщьр'анди, йан qәльши, йан жекьри Хӧданр'а нәдьн, wәлате хwәда ве йәке нәкьн.
[25] У жь дәсте хәриба жи жь ван һ'әму һ'әйwана чаwа хӧрәк Хӧдане хwәр'а п'ешкеш нәдьн, чьмки wанда кемаси у qӧсур һәйә, әвана найенә qәбулкьрьне›».
[26] Хӧдан Мусар'а хәбәрда у гот:
[27] «Гава гольк, йан бәрх, йан кар бьбьн, һ'әфт р'ожа бьра әw ль бәр маке хwә бьн у р'ожа һ'әйшта у пәйр'а wе бона дийарийа шәwате Хӧданр'а бенә qәбулкьрьне.
[28] Ч'еләке т'әви голька wе йан мийе т'әви бәрха wе, һәр дӧйа т'әвайи р'ожәкеда сәрже нәкьн.
[29] Гава һун дийарийа р'азидарийе бьдьн, бь ви аwайи гәрәке бьдьн, wәки жь wә бе qәбулкьрьне.
[30] Wе р'ожеда әw гәрәке бе хwарьне, һ'әта сәре сьбе жь wе нәһельн. Әз Хӧдан ьм.
[31] У т'әмийед мьн хwәйи кьн у wан бьqәдиньн. Әз Хӧдан ьм.
[32] Наве мьни пироз беһӧрмәт нәкьн, wәки әз нава зар'ед Исраелда пироз бьм. Әз Хӧдан ьм, йе кӧ wә пироз дькьм.
[33] Мьн һун жь Мьсьре дәрхьстьн, кӧ бьбьмә Хwәдейе wә. Әз Хӧдан ьм».