[1] Хӧдан Мусар'а хәбәрда у гот:
[2] «Ӧса жи бежә зар'ед Исраел: ‹К'и жь зар'ед Исраел йан жи хәрибәки нава Исраелда кӧ дьминә зар'а хwә Молохр'а бькә qӧрбан, әw гәрәке ә'сә бе кӧштьне, щьмә'та wи wәлати әwи бьдә ль бәр кәвьра.
[3] Әзе бәре хwә бьдьмә ль wи мәрьви у әwи жь нава щьмә'та wи бьдьмә ӧндакьрьне, чьмки әwи жь зар'ед хwә данә Молох, wәки Пирозгәһа мьн бьһ'әр'ьминә у наве мьни пироз беһӧрмәт кә.
[4] Ле гава әw мәрьва жь зар'ед хwә бьдә Молох у щьмә'та wи wәлати ч'ә'ве хwә бьгьрә wәки wи нәкӧжьн,
[5] һьнге әзе бәре хwә бьдьмә ль wи мәрьви у мала wи, әwи у wан мәрьвед кӧ ль пәй wи дьчьн кӧ т'әви Молох беә'сьлийе бькьн жь нав щьмә'та wан бьдьмә ӧндакьрьне.
[6] У әwе кӧ хwә ль йе гази р'ӧһ'а дькә у мьщеwьре щьна бьгьрә кӧ р'ийа wанда һәр'ә беә'сьлийе бькә, әзе бәре хwә бьдьмә wи, әwи жь нава щьмә'та wи бьдьмә ӧндакьрьне.
[7] Аwа хwә пироз кьн у пироз бьн, чьмки әз Хӧдан Хwәдейе wә мә.
[8] Qәйдә-qанунед мьн хwәй кьн у бьqәдиньн, чьмки әз Хӧдан ьм пирозкьре wә.
[9] Әwе кӧ ньфьр'а де у баве хwә бькә, ә'сә әw гәрәке бе кӧштьне. Әwи ньфьр' ль де у баве хwә кьрьнә, хуна wи ль сәре wи бә.
[10] Әwе кӧ дәст бавежә к'ӧлфәтәкә меркьри, йан жи дәст бавежә жьна йәки, ә'сә әw гәрәке бе кӧштьне, йе кьри жи йа кьри жи.
[11] У әwе кӧ сәре хwә жьнбава хwәр'а дайнә, әwи шәрма баве хwә вәкьр, ә'сә әw һәр дӧ жи гәрәке бенә кӧштьне, хуна wан ль сәре wан бә.
[12] Һәгәр йәк сәре хwә бука хwәр'а дайнә, ә'сә һәр дӧ жи гәрәке бенә кӧштьне, вана к'ьрети кьрийә, хуна wан ль сәре wан бә.
[13] Һәгәр йәк чаwа т'әви к'ӧлфәте сәре хwә мерәкир'а дайнә, һәр дӧйа жи к'ьрети кьрийә, ә'сә гәрәке бенә кӧштьне, хуна wан ль сәре wан бә.
[14] Һәгәр йәк жьнәке бьстинә у де жи пер'а, әва беолити йә, әwи жи wана жи агьр бәрдьне бьшәwьтиньн, кӧ нава wәда беолити т'ӧнәбә.
[15] Һәгәр йәк сәре хwә һ'әйwенр'а дайнә, ә'сә әw гәрәке бе кӧштьне, һ'әйwан жи гәвәр ки.
[16] Һәгәр жьнәк хwә бьдә ль бәр һ'әйwанәки кӧ әw ль wе к'әвә, жьне жи һ'әйwан жи бькӧжи, ә'сә әwана гәрәке бенә кӧштьне, хуна wан ль сәре wан бә.
[17] Һәгәр йәк хушка хwә бьстинә, аwа готи qиза баве хwә, йан жи qиза дийа хwә, әwи кӧ шәрма wе дитийә, әwе жи шәрма wи, әв йәк к'ьрети йә, әвана жь бәр ч'ә'ве щьмә'та хwә гәрәке бенә ӧндакьрьне. Әwи кӧ шәрма хушка хwә вәкьр, гәрәке әw гӧне хwә бьк'ьшинә.
[18] Һәгәр йәк дәма нәхwәшийа к'ӧлфәте сәре хwә wер'а дайнә, шәрма wе вәкә, әw wе ль сәр кьраса вәдькә, жьн жи хwә ль сәр кьраса вәдькә, әв һәр дӧ жи гәрәке жь нава щьмә'та хwә бенә ӧндакьрьне.
[19] Шәрма хатийа хwә, йан шәрма мәт'а хwә вәнәки, к'е ве йәке бькә әw нәфәре хwә тә'зи дькә, гӧне хwә әw гәрәке бьк'ьшиньн.
[20] Һәгәр йәк сәре хwә жьнапа хwәр'а дайнә, әwи шәрма апе хwә вәкьр, әw гәрәке гӧне хwә бьк'ьшиньн у wе безӧр'әт бьмьрьн.
[21] Һәгәр йәк жьна бьре хwә бьстинә, әва к'ьрети йә, әw шәрма бьре хwә вәдькә, әwе безӧр'әт бьн.
[22] Һ'әму qәйдә-qанун у qьраред мьн хwәй кьн у wан бьqәдиньн, wәки әw ә'рде кӧ әз wә дьбьм кӧ сәр бьжин мә'де хwә ль wә льһәв нәхә.
[23] У пәй qәйдә-qанунед wан мьләта нәчьн, к'ижана әзе бәр'дьме wан жь wә р'аqәтиньм, чьмки вана әв һ'әму тьшт кьрьн у әз жь wан зьвер бум.
[24] У мьн wәр'а гот: «Һуне ль wәлате wан wар бьн, әзе wи чаwа мьлк' бьдьмә wә, wәлатәки кӧ шир у һьнгьв же дьк'ьшә». Әз Хӧдан Хwәдейе wә мә кӧ мьн һун жь һ'әму мьләта башqә кьрьн.
[25] Аwа фьрqийе бькьнә нава һ'әйwанед һ'әлал у нә һ'әлал у нава тәйрәдед нә һ'әлал у һ'әлал у хwә пе һ'әйwен йан тәйрәда, йан жи пе wан һ'әму шулькийед ә'рде нәһ'әр'ьминьн, к'ижан кӧ мьн бона wә чаwа нә паqьж башqә кьрьн.
[26] Һун бона мьн пироз бьн, чьмки әз Хӧдан пироз ьм, мьн һун жь нава мьләта башqә кьрьн, кӧ һун п'ара мьн бьн.
[27] Мер йан жьн, һәгәр гази р'ӧһ'а кә йан мьщеwьртийа щьн бькә, ә'сә гәрәке бенә кӧштьне, wан бьдьнә бәр кәвьра, хуна wан ль сәре wан бә›».