[1] Хӧдан Мусар'а хәбәрда у гот:
[2] «Т'әви зар'ед Исраел хәбәр дә у бежә wан: ‹Әв ьн әw щәжьнед Хӧдан, к'ижанед кӧ һуне һ'әсаб кьн чаwа щьвинед пироз, әв ьн щәжьнед мьн.
[3] Шәш р'ожа дькарьн шьхӧл бькьн, ле р'ожа һ'әфта шәмийа р'ьһ'әтийе йә, щьвина пироз ә, т'ӧ шьхӧли нәкьн, әва шәмийа р'ьһ'әтийе йә бона Хӧдан һ'әму щи-wаред wәда.
[4] Әвана нә щәжьнед Хӧдан, к'ижана кӧ һуне wәхте wанда дәрбаз кьн.
[5] Чардәһе мәһа йәке бәре еваре Щәжьна Хӧданә Дәрбазбуне йә.
[6] У һәма панздәһе wе мәһе жи Щәжьна Хӧданә Нане Шкәва йә. Һ'әфт р'ожа гәрәке һун нане шкәва бьхwьн.
[7] Р'ожа пешьн wәр'а щьвина пироз бә, т'ӧ шьхӧле хәбате нәкьн.
[8] Һ'әфт р'ожа дийарийед шәwате Хӧданр'а бьдьн, р'ожа һ'әфта диса wәр'а щьвина пироз бә, т'ӧ шьхӧле хәбате нәкьн›».
[9] Хӧдан Мусар'а хәбәрда у готе:
[10] «Т'әви зар'ед Исраел хәбәр дә у бежә wан: ‹Гава һун бьк'әвьнә wи wәлати, к'ижани кӧ әзе бьдьмә wә у һун ә'рде wи бьдьрун, гӧр'зе дьрунейи ә'wльн биньнә щәм к'аһин.
[11] Әw гәрәке wи гӧр'зи ль бәр Хӧдан бьһ'әжинә, кӧ әw бона wә бе qәбулкьрьне. К'аһине әви гӧр'зи р'ожа пәй шәмийер'а бьһ'әжинә.
[12] У р'ожа кӧ гӧр'зе хwә бьһ'әжиньн, гәрәке бәрхәки йәксалийи беqӧсур жи бона дийарийа т'әвайишәwате Хӧданр'а бьдьн.
[13] У ӧса жи т'әви бәрхе, жь дәһә п'ара дӧ п'аре ефайе аре хаси р'унда стьрайи, чаwа дийарийа шәwатейә бинхwәш Хӧданр'а бьдьн у дийарийа wейә сәрдакьрьне жи п'арәкә һине шәрав бә.
[14] Һ'әта wе р'ожа кӧ һун дийарийед хwә дьдьнә Хӧдане хwә, нан йан qәйнок, йан гәньме сьмбьлада нәхwьн. Әв йәка нава ньсьлед wә у щи-wаред wәда qәйдә-qануна һ'әта-һ'әтайе бә.
[15] Пәй р'ожа шәмийер'а, гава wә гӧр'зе дийарийа һ'әжандьне ани, хwәр'а һ'әфт һ'әфтиед т'ам һ'әсаб кьн.
[16] Һ'әта р'ожа пәй һәр һ'әфт һ'әфтийар'а пенщи р'ожи һ'әсаб кьн у дийарийа нанийә ну Хӧданр'а биньн.
[17] Жь щи-wаред хwә бона дийарийа һ'әжандьне дӧ нана биньн, әw гәрәке жь аре хаси жь дәһә п'ара дӧ п'аред ефайе һьлати у пьжанди бә, әва бәре пешьн ә бона Хӧдан.
[18] Т'әви wи нани һ'әфт бәрхед йәксалийә беqӧсур, щанәгаки у дӧ бәрана жи чаwа дийарийа т'әвайишәwате, т'әви дийарийед wанә нани у дийарийед wанә сәрдакьрьне Хӧданр'а бьдьн. Әве Хӧданр'а бьбә дийарийа шәwате йә бинхwәш.
[19] Бона дийарийа жь бәр гӧнава жь бьзьна нерики у бона дийарийа һәләqәтийе дӧ бәрхед йәксали бьдьн.
[20] К'аһин т'әви нане бәре бешьн бона дийарийа һ'әжандьне дӧ бәрха ль бәр Хӧдан бьдә, әванайе Хӧданр'а пироз бьн, бона к'аһин бьн.
[21] Һәма хут wе р'оже ә'лам кьн, кӧ wәр'а бьбә р'ожа щьвина пироз, т'ӧ шьхӧли нәкьн, бьра әв йәка нава щи-wаред wә у ньсьлед wәда бьбә qәйдә-qануна һ'әта-һ'әтайе.
[22] Гава һун нане wәлате хwә бьдьрун, дәма дьруне дәве зәвийе һ'әта хьлазийе нәдьруйи у сьмбьлед дьруйә к'әти т'оп нәки, вана йе к'әсиб у йе хәрибр'а бьһели. Әз Хӧдан Хwәдейе wә мә›».
[23] Хӧдан Мусар'а хәбәрда у готе:
[24] «Зар'ед Исраелр'а хәбәр дә у бежә wан: ‹Йәке мәһа һ'әфта wәр'а бьбә р'ожа р'ьһ'әтийе, щьвина пирозә бона р'ожа биранина дәнге бор'ийе.
[25] Т'ӧ шьхӧли нәкьн, ле бәле дийарийа шәwате Хӧданр'а биньн›».
[26] Хӧдан Мусар'а хәбәрда у готе:
[27] «Дәһе ве мәһа һ'әфта жи р'ожа к'әwандьне бә, бьра wәр'а бьбә щьвина пироз, хwә бьшкеньн та бьн у Хӧданр'а дийарийа шәwате биньн.
[28] Wе р'ожеда т'ӧ шьхӧли нәкьн, чьмки әв р'ож бона wә р'ожа гӧнәк'әwандьне йә, wәки һун гӧнед хwә ль бәр Хӧдан Хwәдейе хwә бьк'әwиньн.
[29] Ле әwе кӧ wе р'оже хwә нәшкенә та нәбә, жь нава щьмә'та хwә гәрәке бе р'аqәтандьне.
[30] Ле һәгәр кәсәк wе р'ожеда шьхӧләки бькә, wи кәси әзе жь нава щьмә'та wи бьдьмә ӧндакьрьне.
[31] Т'ӧ шьхӧли нәкьн, бьра әв йәка нава ньсьлед wә у щи-wаред wәда бьбә qәйдә-qануна һ'әта-һ'әтайе.
[32] Әв йәка бона wә мина шәмийа р'ьһ'әтийе бә, һун гәрәке евара нәһе мәһе хwә бьшкеньн та бьн, жь wе еваре һ'әта евара дьн р'ьһ'әтийа шәмийа хwә хwәй кьн».
[33] Хӧдан Мусар'а хәбәрда у готе:
[34] «Т'әви зар'ед Исраел хәбәр дә у бежә wан: ‹Панздәһе ве мәһа һ'әфтада, һ'әфт р'ожа Щәжьна Һ'олькайә бона Хӧдан.
[35] Р'ожа пешьн щьвина пироз бә, т'ӧ шьхӧли гәрәке нәкьн.
[36] Нава ван һ'әфт р'ожада дийарийа шәwате бьдьнә Хӧдан, р'ожа һ'әйшта wәр'а щьвина пироз бә у Хӧданр'а дийарийа шәwате биньн. Әва щьвина ә'зиз ә, т'ӧ шьхӧли нәкьн.
[37] Әвана нә әw щәжьнед Хӧдан, к'ижана кӧ гәрәке һун щьвинед пироз һ'әсаб кьн, wәки Хӧданр'а дийарийе шәwате, дийарийе т'әвайишәwате, дийарийе нани, qӧрбан у дийарийе сәрдакьрьне кӧ һәр йәк р'оже wанда бенә дайине,
[38] пештьри шәмийед Хӧдан, пештьри һ'әдийед wә, пештьри һ'әму создайинед wә, пештьри wан һ'әму дийарийед wәйә р'әзәдьлийе кӧ һуне бьдьнә Хӧдан.
[39] Ӧса жи панздәһе мәһа һ'әфта, гава һун дәрәмәтед ә'рде т'оп кьн, һ'әфт р'ожа щәжьна Хӧдан дәрбаз кьн, р'ожа ә'wльн у р'ожа һ'әйшта р'ожед р'ьһ'әтийе бьн.
[40] Р'ожа ә'wльн хwәр'а бәред даред р'ьнд, ч'ьqьле даред хӧрма, ч'ьqьле даред бәлгсьх у ч'ьqьле даред бийейә дәве ава һьлдьн у һ'әфт р'ожа ль бәр Хӧдан Хwәдейе хwә ша бьн.
[41] Әве щәжьне саледа һ'әфт р'ожа Хӧданр'а дәрбаз кьн. Әва нава ньсьлед wәда qәйдә-qануна һ'әта-һ'әтайе бә. Мәһа һ'әфтада гәрәке ве щәжьне дәрбаз кьн.
[42] Һ'әфт р'ожа гәрәке һ'олькада бьминьн, һәр бьнәлийе Исраеле гәрәке һ'олькада бьминә,
[43] wәки ньсьлед wә бьзаньбьн, гава кӧ мьн зар'ед Исраел жь Мьсьре дәрхьстьн, әw һ'олькада щи-wар кьрьн. Әз Хӧдан Хwәдейе wә мә›».
[44] Муса аһа щәжьнед Хӧдан зар'ед Исраелва ә'йан кьрьн.