[1] Хwәр'а п'ута у һ'әйкәла че нәкьн, хwәр'а стуна нәдьнә сәкьнандьне, wәлате хwәда бь кәвьра тьштәки дьлqшьбандийе нәдьнә чекьрьне, бона һ'әбандьне, чьмки әз Хӧдан Хwәдейе wә мә.
[2] Р'ьһ'әтийа шәмийед мьн хwәй кьн, qәдьре пирозгәһа мьн заньбьн. Әз Хӧдан ьм.
[3] Һәгәр һун пе qәйдә-qанунед мьн р'абьн-р'унен у т'әмийед мьн хwәй кьн у wан бьqәдиньн,
[4] әзе жи wәр'а баране wә'дәда бьбариньм, ә'рде дәрәмәта хwә бьдә у даред дәште жи бәред хwә бьдьн.
[5] Бедәра wәйе бьк'ьшинә һ'әтани тьричьнине, тьричьнине жи бьк'ьшинә һ'әтани вәдан-чандьне, һуне нане хwә т'ер бьхwьн, wәлате хwәда бехоф бьжин.
[6] Әзе ә'дьлайе бьдьмә wәлате wә, һуне р'ьһ'әт п'алдьн, т'ӧ кәсе зә'мәте нәдә wә, р'ә'wьред хьраб әзе жь wәлет бьдьмә һьлдане у шуре wәлате wәр'а дәрбаз нәбә.
[7] Һуне бәри нәйаред хwә дьн, әwе пе шур ль бәр wә бьк'әвьн.
[8] Жь wә пенще бәри сәди дә у сәде жь wә бәри дәһә һ'әзара дә у нәйаред wәйе ль бәр wә пе шур бьк'әвьн.
[9] Бәре мьне wәда бә, wә шин кьм зедә кьм у пәймана хwә т'әви wә qәдим кьн.
[10] Һуне хӧрәке кәвьн бьхwьн, жь дәст йе нуда һуне йе кәвьн дәрхьнә дәр.
[11] Әзе коне хwә нава wәда ледьм у нәфса мьне жь wә зьвер нәбә.
[12] У әзе нава wәда бьгәр'ьм, әзе бьбьмә Хwәдейе wә у һуне жи бьбьнә щьмә'та мьн.
[13] Әз Хӧдан Хwәдейе wә мә, кӧ мьн һун жь wәлате мьсьрийа дәрхьстьн, wәки нәбьнә хӧламе wан у мьн qәйде нире wә шкенандьн у һун сәрфьнйаз бьрьн.
[14] Ле һәгәр һун гӧр'а мьн нәкьн у ван һ'әму т'әмийа нәqәдиньн
[15] у qанунед мьн беһӧрмәт кьн, нәфса wә жь qьраред мьн зьвер бә, кӧ һун һ'әму т'әмийед мьн нәqәдиньн у пәймана мьн бьт'әр'ьбиньн.
[16] Һьнге жи әзе аһа сәре wә бькьм: Р'ьсасе бьшиньмә сәр wә, һ'иле у гәрме, кӧ р'онайийа ч'ә'ва кем дькьн у щанийа мерьв дьһ'әлинә дьмашинә, һуне бадиһәwа т'охьм бьр'әшиньн, чьмки дьжмьнед wәйе к'әда wә бьхwьн.
[17] Әзе ль сәр wәда бьньһер'ьм у ль бәр ч'ә'ве дьжмьнед wә qьр'а wәйе бе, хернәхwазе wәйе һ'ӧкӧми ль сәр wә бькьн, бейи пәйк'әтьн р'әве бьк'әвә wә.
[18] Ле һәгәр пәй һаqас тьштир'а һун гӧр'а мьн нәкьн, һьнге әзе жь бәр гӧне wәва һ'әфт щар зедә wә щәза кьм.
[19] Әзе к'ӧбар-бабахийа wә бьшкеньм, ә'змане wә бькьмә һ'әсьн у ә'рде wә бькьмә сьфьр .
[20] Qәwата wәйе щики бадиһәwа п'уч' бә һәр'ә, ә'рде wәйе дәрәмәта хwә нәдә у даред ә'рде жи бәре хwә нәдьн.
[21] Һәгәр пәй һаqас тьштр'а жи һун мьqабьли мьн бьн у нәхwазьн гӧр'а мьн бькьн, һьнге әзе анәгори гӧне wә, һ'әфт щара зедә бәла ль сәр wәда биньм.
[22] Р'ә'wьред чоле әзе бьшиньм ль сәр wә, әwе wә безӧр'әт бьһельн, qьр'а һ'әйwанед wә биньн, wә бьхwьн кем кьн у р'ийед wәйе вала бьн.
[23] Һәгәр пәй ве йәкер'а жи һун ль сәр һ'ьше хwәда нәйен у мьqабьли мьн һәр'ьн,
[24] һьнге жи әзе мьqабьли wә бьм, жь бәр гӧне wәва әзе жи һ'әфт щара зедә бәла wә бьдьме.
[25] Әзе шуре һ'әйфа пәймана мьн һьлдане ль сәр wәда бьшиньн, һәгәр һун бажаред хwәда жи бьщьвьн, әзе нәхwәшийа һ'ала бьшиньмә нава wә у һуне бьк'әвьнә дәсте дьжмьн.
[26] Гава әз нан ль wә бькьмә һ'ьзрәт, һьнге дәһә к'ӧлфәте тәндурәкеда нане wә лехьн у пе мезине нане wә бьдьнә wә, һуне бьхwьн у т'ер нәбьн.
[27] Ле һәгәр пәй ван йәкар'а жи һун гӧр'а мьн нәкьн у мьqабьли мьн һәр'ьн,
[28] һьнге жи әзе бь һерс мьqабьли wә бьсәкьньм у жь бәр гӧне wәва һ'әфт щара зедә wә бьдьмә щәза.
[29] Һьнге һуне гоште кӧр' у qизед хwә бьхwьн.
[30] Һеланед wәйә жорьн әзе wеран кьм, п'утед wәйә тә'ве әзе хьраб кьм, щьнйазед wә бьдьмә ль сәр кәрийед п'утед wәйә һурдәхwәши буйи, нәфса мьне жь wә зьвер бә.
[31] Бажаред wә әзе бькьмә хьрабә у пирозгәһед wә бькьмә хьки-хwәли у бина qӧрбанед wәйә бинхwәшийе әзе һьлнәдьм.
[32] Ә'рде wә әзе бекәс бькьм, дьжмьнед wәйә кӧ ле дьминьн wе ә'щебмайи бьн.
[33] Әзе wә бәлайи нава мьләта кьм, шур ль пәй wә бьшиньм, wәлате wәйе бекәс бьминә у бажаред wәйе вала бьн.
[34] Һьнге ә'рде т'әмамийа wан р'ожед валамайина хwәда, шәмийед р'ьһ'әтийа хwә дәрбаз кә, гава һун wәлате дьжмьнед хwәда бьн, һьнге ә'рде кӧ р'ьһ'әт бьминә wе шәмийед хwә дәрбаз кә.
[35] Т'әмамийа wан р'ожед валамайина хwәда ә'рде р'ьһ'әт бә, чьмки шәмийед wәда әw р'ьһ'әт нәбуйә, гава һун ле дьман.
[36] Һәрч'е жь wә сах майи жи әзе wәлате дьжмьнед wанда ләрзәке бькьмә дьле wан у дәнге бәлге һ'әжйайи wе wан бьдә р'әве, ӧса wе бьр'әвьн чаwа кӧ жь бәр дәве шур у бе пәйк'әти wе бьк'әвьн.
[37] Чаwа жь бәр шур р'әви, wе бе пәйк'әти ль сәр һәвда бьк'әвьн у qәwата wәйе т'ӧнәбә кӧ ль бәр дьжмьн бьсәкьньн.
[38] Нава мьләтада һуне ӧнда бьн у ә'рде дьжмьнед wәйе wә бьхwә.
[39] Һәрч'е жь wә майи жи wе жь дәст беолитийе хwә wәлате дьжмьнед wәда бьһ'әльн һәр'ьн, ӧса жи дәст беолитиед кал-бавед хwә бьһ'әльн һәр'ьн.
[40] Ле һәгәр әwана беолитийед хwә у беолитийед кал-бавед хwә бьдьнә р'уйе хwә, кӧ чь нәһәqи һьндава мьнда кьрьнә, чаwа мьqабьли мьн сәкьнинә,
[41] у чьма әз мьqабьли wан чум у мьн чьма әw бьрьнә wәлате дьжмьнед wан, һәгәр һьнге дьле wани кәвьри бьшке у щәзайе беолитийа хwә бь дьл qәбул кьн.
[42] Һьнге әзе wе пәймана кӧ мьн т'әви Аqуб гьреда бир биньм, ӧса жи йа т'әви Исһаq у Бьраһим гьредайи бир биньм у wи wәлати жи бир биньм.
[43] Әw wәлат кӧ бейи wан бьминә wе шәмийед р'ьһ'әтийа хwә дәрбаз кә, чьмки жь wан вала ма, әwана гәрәке щәзайе беолитийа хwәр'а qайл бьн, кӧ wана qьраред мьн беһӧрмәт кьрьн у нәфса wан жь qәйдә-qанунед мьн зьвер бу.
[44] Ле бәле чаwа кӧ әwанайе wәлате дьжмьнед хwәда бьн, әзе wан т'әхсир нәкьм у жь wан зьвер набьм кӧ wан лап ӧнда кьм, кӧ пәймана хwәйә т'әви wан бьт'әр'ьбиньм, чьмки әз Хӧдан ьм, Хwәдейе wан.
[45] Бона wан әзе wе пәймана т'әви кал-бавед wан бир биньм, к'ижан кӧ мьн ль бәр ч'ә'ве мьләта әw жь wәлате Мьсьре дәрхьстьн кӧ бьбьмә Хwәдейе wан. Әз Хӧдан ьм.
[46] Әв ьн әw qәйдә-qанун, qьрар у һинкьрьнед кӧ Хӧдан ль сәре ч'ийайе Синайе пе дәсте Муса данинә навбәра хwә у зар'ед Исраел».