[1] Хӧдан Мусар'а хәбәрда у гот:
[2] «Т'әви зар'ед Исраел хәбәр дә у бежә wан: ‹Әз Хӧдан Хwәдейе wә мә.
[3] Мина wан кьред wәлате Мьсьре, к'ижанида кӧ һун теда дьман нәкьн, мина wан кьред wәлате Кәнане, к'ижани кӧ әзе wә бьбьме, нәкьн у ль пәй ә'рф-ә'дәтед wан нәчьн.
[4] Qьраред мьн бьqәдиньн у qәйдә-qанунед мьн хwәй кьн пе wан һәр'ьн, әз Хӧдан Хwәдейе wә мә.
[5] Qәйдә-qанун у qьраред мьн хwәй кьн, әw мәрьве кӧ бьqәдинә бь wан wе бьжи, әз Хӧдан ьм.
[6] Т'ӧ кәс незики пьсмама хwәйә незик нәбә кӧ шәрма wе вәкә, әз Хӧдан ьм.
[7] Шәрма баве хwә йан шәрма дийа хwә вәнәки. Әwа дийа тә йә шәрма wе вәнәки.
[8] Шәрма жьнбава хwә вәнәки, әw шәрма баве тә йә.
[9] Шәрма хушка хwә, qиза баве хwә, йан qиза дийа хwә, һәгәр малда буйи бә йан дәрва шәрма wан вәнәки.
[10] Шәрма qиза кӧр'е хwә, йан шәрма qиза qиза хwә вәнәки, чьмки әw шәрма тә йә.
[11] Шәрма qиза жьнбава хwә, кӧ жь баве тә буйә әw хушка тә йә, шәрма wе вәнәки.
[12] Шәрма мәт'а хwә вәнәки, чьмки әwа жь хуна баве тә йә.
[13] Шәрма хатийа хwә вәнәки, чьмки әwа жь хуна дийа тә йә.
[14] Шәрма апе хwә вәнәки у незики жьна wи нәби, әw жьнапа тә йә.
[15] Шәрма бука хwә вәнәки, әwа жьна кӧр'е тә йә, шәрма wе вәнәки.
[16] Шәрма жьнбьра хwә вәнәки, әw шәрма бьре тә йә.
[17] Шәрма к'ӧлфәтәке qизева вәнәки у qиза кӧр'е wе йан qиза qиза wе нәстини кӧ шәрма wан вәки, әвана хунәк ьн, әв йәка к'ьрети йә.
[18] Хушкәке нәйни ль сәр хушке сахийа wеда шәрма wе вәки, бьки һеwи.
[19] Незики к'ӧлфәте нәби кӧ шәрма wе дәма нәпаqьжайа wеда вәки, гава ль сәр кьраса вәдьбә.
[20] Сәре хwә жьна т'ӧ кәсир'а данәйни кӧ т'әви wе бьһ'әр'ьми.
[21] Зар'ед хwә т'ӧ щар Молохр'а нәкьн qӧрбан, наве Хwәдейе хwә беһӧрмәт нәкьн. Әз Хӧдан ьм.
[22] Сәре хwә qьсьме мерар'а данәйни чаwа мина qьсьме жьне, әв йәк к'ьрети йә.
[23] Сәре хwә т'ӧ һ'әйwанер'а данәйни кӧ т'әви wе бьһ'әр'ьми у к'ӧлфәт т'ӧ щар хwә нәдә ль бәр һ'әйwен кӧ һ'әйwан лек'әвә, әв йәк к'ьрети йә.
[24] Пе т'ӧ тьштәки жь ван хwә нәһ'әр'ьминьн, чьмки пе ван һ'әму тьшта wан мьләта хwә һ'әр'ьмандьнә, к'ижана кӧ әзе бәр'дьме wан жь бәр wә р'аqәтиньм.
[25] Ә'рд һ'әр'ьми, әзе бәла wи биньмә сәре wи, ә'рде жи мә'де хwә жь бьнәлийед хwә ль һәв хьст.
[26] Ле һун qәйдә-qанун у qьраред мьн хwәй кьн у жь ван к'ьретийа т'ӧ тьшти нәкьн, нә йе бьнәли, нә жи хәрибе кӧ нава wәда дьминә.
[27] Чьмки бәри wә, wан мәрьвед wи wәлати әв һ'әму һ'әрами кьрьн у wәлат һ'әр'ьми.
[28] Нәбә кӧ wәлат мә'де хwә жь wә жи ль һәв хә, гава һун wи бьһ'әр'ьминьн, чаwа бәри wә мә'де wи жь wан мьләта льһәв к'әт.
[29] Чьмки к'и кӧ жь ван һ'әму к'ьретийа йәки бькә, хwәйе ван кьра гәрәке жь нава щьмә'та хwә ӧнда бә.
[30] Аwа т'әмийед мьн хwәй кьн, wәки wан ә'дәтед к'ьретә кӧ бәри wә һатьнә кьрьне һун нәкьн у пе wан нәһ'әр'ьмьн. Әз Хӧдан Хwәдейе wә мә›».