[1] Хӧдан Мусар'а хәбәрда у гот:
[2] «Т'әви т'әмамийа щьвина зар'ед Исраел хәбәр дә у бежә wан: ‹Пироз бьн, чьмки әз Хӧдан Хwәдейе wә пироз ьм.
[3] Жь wә һәр кәс qәдьре де у баве хwә бьгьрә у р'ьһ'әтийа шәмийед мьн хwәй кьн, әз Хӧдан Хwәдейе wә мә.
[4] Ль п'ута вәнәгәр'ьн у хwәр'а хwәдейед р'окьри ченәкьн, әз Хӧдан Хwәдейе wә мә.
[5] Гава һун Хӧданр'а дийарийа һәләqәтийе бьдьн, ӧса бьдьн кӧ бе qәбулкьрьне.
[6] Wе р'ожа кӧ wә дийари да у р'ожтьра дьнда гәрәке әw бе хwарьне у чь жи ма р'ожа сьсийа әw гәрәке бе шәwьтандьне.
[7] Ле һәгәр р'ожа сьсийа жь wе бе хwарьне әw һ'әрами йә, найе qәбулкьрьне.
[8] К'и кӧ жь wе бьхwә, әw гӧнә дькә стуйе хwә, чьмки әw тьштед Хӧданә пироз дьһ'әр'ьминә, әw кәса жь нава щьмә'та хwә гәрәке бе ӧндакьрьне.
[9] Гава һун зәвийа хwә бьдьрун, дәве зәвийе һ'әта хьлазийе нәдьруйи у сьмбьлед жь зәвийа тә к'әти бәрәв нәки.
[10] Тьрийед хwә кӧ дьчьни пашьн нәки, тьрийед жь дәсте тә к'әти һьлнәдә, wана йе к'әсиб у хәрибр'а бьһелә, әз Хӧдан Хwәдейе wә мә.
[11] Дьзийе нәкьн, дәрәwа нәкьн у һәвдӧ нәхапиньн.
[12] Пе наве мьн дәрәw сонд нәхwьн у наве Хwәде хwә беһӧрмәт нәкьн. Әз Хӧдан ьм.
[13] Дьле кәсәки нәешини у т'алан нәки, һәqе хәбата п'аләйе тә һ'әта сьбәһе ль щәм тә нәминә.
[14] Ньфьр'а ль йе кәр' нәки, тьштәки нәди ль бәр ньге йе кор, ле жь Хwәдейе хwә бьтьрсә. Әз Хӧдан ьм.
[15] Диwанеда нәр'астийе нәкьн, пьшта бәләнгаза нәгьрьн нә жи qәдьр ль йе мәзьн бькьн, р'аст ль сәр ише wанда бьньһер'ьн.
[16] Нава щьмә'та хwәда бӧхданбийе нәки, нәби байисе сәре һәвале хwә. Әз Хӧдан ьм.
[17] Дьле хwәда нәжәни бьре хwә, һәвале хwә һьлейи, кӧ гӧне wи тӧ нәк'ьшини.
[18] Һ'әйфе һьлнәди у к'ине зар'ед щьмә'та хwәр'а нәжойи, ле һәвале хwә wәкә хwә һ'ьз бьки. Әз Хӧдан ьм.
[19] Qәйдә-qанунед мьн хwәй кьн, һ'әйwанәки хwә т'әви һ'әйwанәки щур'әки майин нәди кәлкьрьне, зәвийа хwә дӧ щур'ә т'охьм нәр'әшини, к'ьнща бь дӧ щур'ә т'ела чекьри хwә нәкә.
[20] Һәгәр йәк сәре хwә к'ӧлфәтәкә хӧламока мәрьвәкир'а дайнә кӧ йәкир'а нишанкьри бә, йа кӧ һәла һе нәһатийә к'ьр'ине йан азади жер'а нәһатийә дайине, гәрәке һәр дӧ жи бенә щәзакьрьне, ле мьрьн жь wанр'а нак'әвә, чьмки к'ӧлфәт нә аза бу.
[21] У мер бьра дийарийа жь бәрвадайина хwә бәранәки Хӧданр'а бинә ль бәр дәре Коне Щьвине.
[22] К'аһин бона wи пе бәране дийарийа жь бәрвадайине ль бәр Хӧдан бона гӧне wийи кьри к'әwандьне бькә у гӧне wийи кьри wе ле бе бахшандьне.
[23] Гава кӧ һун бьк'әвьнә wи wәлате Кәнане у һәр щур'ә даред хwәйибәр дач'ькиньн, бәред wан нәпаqьж һ'әсаб кьн. Се сала гәрәке әw бәр бона wә нәпаqьж һ'әсаб бьн у әw нәйенә хwарьне.
[24] Ле сала чара һ'әму бәре wан дара пироз һ'әсаб кьн у бона пәсьндайина Хӧдан бьдьн.
[25] Сала пенща һун паше дькарьн бәре wан бьхwьн. Бь ви аwайи бәре даред wе ль wә зедә бьн. Әз Хӧдан Хwәдейе wә мә.
[26] Т'ӧ тьшти хунева нәхwьн. Р'ә'мьлдарийе йан пирәсертийе нәкьн.
[27] П'ор'е дора сәре хwә кӧр' нәкә у сәре р'удана хwә нәбьр'ә.
[28] Бона мьри бьрина ль сәр хwә че нәкьн у ньвисаред к'ӧтайи ль хwә дәрнәхьн. Әз Хӧдан ьм.
[29] Qиза хwә нәһ'әр'ьмини, wе бона п'ут нәди qавийе , wәки wәлат qавийе нәкә у к'ьретийева т'ьжи нәбә.
[30] Р'ьһ'әтийа шәмийед мьн хwәй кьн, qәдьре пирозгәһа мьн бьгьрьн, әз Хӧдан ьм.
[31] Нәчьнә щәм йед гази р'ӧһ'а дькьн у жь мьщеwьре щьна нәпьрсьн, кӧ жь wан һун нәһ'әр'ьмьн. Әз Хӧдан Хwәдейе wә мә.
[32] Ль бәр йе п'ор'сьпи р'абә у qәдьре ә'мьре мәзьн бьгьрә, жь Хwәдейе хwә бьтьрсә. Әз Хӧдан ьм.
[33] Һәгәр хәрибәк ә'рде wәда щи-wар бә бьминә, тәнгасийе нәдьнә wи.
[34] Хәрибе кӧ нава wәда бьминә бона wә бьра мина бьнәлийе wәлате wә бә, wәкә хwә wи һ'ьз бьки, чьмки һун жи wәлате Мьсьреда хәрибийеда бунә. Әз Хӧдан Хwәдейе wә мә.
[35] Диwанкьрьнеда нәһәqийе нәкьн, нә чапе, нә мезине нә жи пиванеда.
[36] Бьра мезина wә р'аст бә, кәвьре мезине р'аст, кода wә р'аст, щер'е wә р'аст бә. Әз Хӧдан Хwәдейе wә мә, йе кӧ һун жь wәлате Мьсьре дәрхьстьн.
[37] Һ'әму qәйдә-qанунед мьн у qьраред мьн хwәй кьн у wан бьqәдиньн. Әз Хӧдан ьм›».