[1] Хӧдан пәй мьрьна һәр дӧ кӧр'ед Һарунр'а, йед кӧ бәр Хӧдан сәкьнин у мьрьн, Мусар'а хәбәрда.
[2] Хӧдан готә Муса: «Бежә бьре хwә Һарун, кӧ һәр гав нәк'әвә щийе пироз пьшт п'әр'де, ль бәр qалп'ахе бахшандьнейи ль сәр сьндоqе кӧ нәмьрә. Чьмки әзе нава ә'wрда ль сәр qалп'ахе бахшандьне к'ьфш бьм.
[3] Аwа пе чь Һарун дькарә бьк'әвә дь щийе пироз: Пе щанәгаки бона дийарийа паqьжбуне у пе бәранәки бона дийарийа т'әвайишәwате.
[4] Кьрасе к'ьтанийи пироз гәрәке ль хwә кә у һәвалкьрасе к'ьтани ль wи бә, бәнпьшта к'ьтани бьдә пьшта хwә у п'ап'ахе к'ьтани бьдә сәре хwә. Әвана к'ьнщед пироз ьн, гәрәке хwә пе аве бьшо у паше ван к'ьнща ль хwә кә.
[5] У жь щьвина зар'ед Исраел жи дӧ нерийа һьлдә бона дийарийа паqьжбуне у бәранәки жи бона дийарийа т'әвайишәwате.
[6] Һарун wи щанәгайе дийарийа паqьжбуне бона хwә бьдә у к'әwандьне бона хwә у мала хwә бькә.
[7] У дӧ нерийа һьлдә ль бәр Хӧдан ль бәр дәре Коне Щьвине бьдә сәкьнандьне.
[8] Һьнге Һарун ль сәр wан һәр дӧ нерийа п'әшк бавежә, п'әшкәке бона Хӧдан, йәке жи бона азабәрдана нери.
[9] У Һарун wи нерийе кӧ бь п'әшкавитьне Хӧданр'а к'әт, бькә дийарийа паqьжбуне.
[10] Ле әw нерийе кӧ п'әшк жер'а к'әт бе азакьрьне, wи ль бәр Хӧдан сах бьдә сәкьнандьне кӧ бь wи к'әwандьн бе кьрьне у wи аза бәр'ди бәр'ийе.
[11] У Һарун wи щанәгайе дийарийа паqьжбуне бона хwә бьдә, к'әwандьне бона хwә у мала хwә бькә у щанәгайе дийарийа паqьжбуна хwә сәржекә.
[12] Паше жь сәр wе горигәһа ль бәр Хӧдан агьрданге т'ьжи к'ура агьр кә у дӧ к'ӧлм т'ьжи бьхура бинхwәшә һурледайи кә, бьбә пьшт п'әр'де.
[13] Бьхуре ль бәр Хӧдан бькә ль сәр wи агьри, һьнге дуйе бьхуре wе ль сәр qалп'ахе бахшандьнейи ль сәр дәве Сьндоqа Шә'дәтийе бьгьрә, wәки әw нәмьрә.
[14] У хуна wи щанәгайи һьлдә пе т'ьлийа хwә алийе р'оһьлатева бьр'әшинә ль сәр qалп'ахе бахшандьне, һ'әфт щара пе т'ьлийа хwә хуне бьр'әшинә ль бәр qалп'ахе бахшандьне.
[15] Паше нерийе дийарийа паqьжбуне жь бәр гӧне щьмә'тева сәржекә у хуна wи бьбә пьшт п'әр'де, пе хуна wи жи ӧса бькә, чаwа пе хуна щанәга кьр, wе бьр'әшинә ль сәр qалп'ахе бахшандьне у ль бәр qалп'ахе бахшандьне.
[16] У щийе пироз жь нәпаqьжи у һ'әму нәһәqийед гӧнед зар'ед Исраел паqьж кә. Аһа жи гәрәке әw бона Коне Щьвине бькә кӧ щәм wан нава нәпаqьжайа wанда йә.
[17] Т'ӧ кәс гәрәке Коне Щьвинеда т'ӧнәбә, гава әw бона к'әwандьне бьк'әвә щийе пироз һ'әта кӧ әw дәре. Бь ви аwайи әw хwә мала хwә у т'әмамийа щьвина Исраел паqьж кә.
[18] Паше дәре бәр горигәһа ль бәр Хӧдан у бона wе к'әwандьне бькә у жь хуна щанәге у нери һәр чар алийава стьруйед горигәһе хә
[19] у хуне пе т'ьлийа хwә һ'әфт щара бьр'әшинә ль сәр горигәһе у жь нәпаqьжайед зар'ед Исраел wе паqьж кә у пироз кә.
[20] Бона щийе пироз, Коне Щьвине у горигәһе кӧ к'әwандьне бькә хьлаз кә, пәйр'а бьра нерийе сах бинә,
[21] Һарун бьра һәр дӧ дәстед хwә дайнә ль сәр сәре нерийе сах у ль сәр wида һ'әму беолитийед зар'ед Исраел, һ'әму нәһәqийед wан, һ'әму гӧнед wанва бьдә р'уйе хwә. У вана бьдә ль сәре нери, бь дәсте мәрьвәки к'ьфшкьри бьшинә бәр'ийе.
[22] Нери бьра һ'әму беолитийед wан ль сәр хwә бьбә ә'рдәки хьки-хwәли у әw нери ль бәр'ийе бе бәр'дан.
[23] У пәй ве йәкер'а Һарун бьк'әвә Коне Щьвине, wан к'ьнщед к'ьтани к'ижан кӧ әwи хwәкьрьн к'әтә щийе пироз, жь хwә бехә у wан ль wьр бьһелә.
[24] Әw бәдәна хwә дь щики пироз пе аве бьшо у к'ьнщед хwә ль хwә кә, дәрк'әвә дийарийа хwәйә т'әвайишәwате у дийарийа т'әвайишәwатейә бона щьмә'те бьдә, бь ви аwайи бона хwә у щьмә'те к'әwандьне бькә.
[25] Бәзе дийарийа паqьжбуне жи ль сәр горигәһе бьшәwьтинә.
[26] У әwе кӧ нерийе азадийе дьбә бәр'дьдә, гәрәке к'ьнще хwә бьшо у бәдәна хwә жи пе аве бьшо, паше бьк'әвә зоме.
[27] Ле wи щанәгайе бона дийарийа паqьжбуне у нерийе бона дийарийа паqьжбуне, хуна к'ижана бона к'әwандьне к'әтә щийе пироз, гәрәке вана жь зоме дәрхьн у ч'әрмед wан, гоште wан у ә'дәба wан сәр агьр бьшәwьтиньн.
[28] Әwе кӧ wан бьшәwьтинә, гәрәке к'ьнщед хwә бьшо у бәдәна хwә жи пе аве бьшо, паше бьк'әвә зоме.
[29] Бьра әв йәк wәр'а бьбә qәйдә-qануна һ'әта-һ'әтайе, дәһе мәһа һ'әфтада та бьн хwә бьшкеньн у т'ӧ шьхӧли нәкьн, нә бьнәлийе wәлет у нәжи хәрибе кӧ нава wәда дьминә.
[30] Чьмки wе р'оже к'аһине бона wә к'әwандьне бькә кӧ wә паqьж кә, wәки һун жь һ'әму гӧнед хwә ль бәр Хӧдан паqьж бьн.
[31] Әва бона wә мина р'ьһ'әтийа р'ожа шәмийа бә, qәйдә-qануне һ'әта-һ'әтайе йә, нәфса хwә та кьн хwә бьшкеньн.
[32] К'әwандьне гәрә әw сәрәкк'аһин бькә, к'ижан кӧ һатийә р'ункьрьн у qәwин-qәдимкьрьне, wәки дәwса баве хwә к'аһинтийе бькә. Әw гәрә к'ьнщед к'ьтани аwа готи к'ьнщед пироз ль хwә кә
[33] у к'әwандьне бькә бона щийе һәри пироз, бона Коне Щьвине у горигәһе, ӧса жи бона к'аһина у т'әмамийа щьвина мьхӧлqәте.
[34] Әв йәка бона wә бьбә qәйдә-qануна һ'әта-һ'әтайе, сале щарәке һ'әму гӧнед зар'ед Исраел бе к'әwандьне». У Һарун ӧса кьр, чаwа кӧ Хӧдан ә'мьр ль Муса кьрьбу.