[1] Һәгәр йәк бе газикьрьне ль бәр диwане, әwи тьштәк бьһистьбә йан шә'дә бә у ве йәке вәшерә, һьнге әw wи гӧнәйи дькә стуйе хwә.
[2] Һәгәр йәк жь нәзанийа хwә тьштәки нәпаqьж к'әвә, аwа готи щәндәке р'ә'wьрәки, щәндәке һ'әйwанәки йан щәндәке шулькики нәһ'әлал к'әвә, әw хwә дьһ'әр'ьминә у сущдар дькә.
[3] Һәгәр йәк жь нәзанийа хwә к'ьретийа мерьв к'әвә, тьштәки к'ьрет кӧ мерьв дькарә бьһ'әр'ьминә, гава әw бьзаньбә һьнге әwе сущдар бә.
[4] Һәгәр йәк жь нәзанийа хwә, пе дәве хwә бона qәнщийе йан хьрабийе сонд бьхwә, (чаwа мәрьв пе сондед хwә тьштед п'уч' дьбежьн), гава әw бьзаньбә, һьнге жь ван йәкида әwе сущдар бә.
[5] Һәгәр жь ван йәка тьштәкида сущдар бә у хwә мькӧр' бе, гӧне хwә бьдә р'уйе хwә,
[6] бьра бона гӧне хwәйи кьри Хӧданр'а жь кери бәрхәкә ме, йан жи карәкә ме бона нәһәqийа хwә чаwа дийарийа паqьжбуне бинә. Бьра к'аһин бона гӧне wи к'әwандьне бькә.
[7] Һәгәр дестда т'ӧнә, нькарә жь бәр нәһәqийа хwәва пез бинә, бьра дӧ фатьмока йан жи дӧ щущукед кәwа Хӧданр'а бинә, йәк бона дийарийа паqьжбуне, йәк жи бона дийарийа т'әвайишәwате.
[8] Бьра әw вана бинә ль бәр к'аһин, пешийе дийарийа паqьжбуне бьдә, сәри жь стӧкӧре һьлqәтинә, ле же нәqәтинә.
[9] У жь хуна дийарийа паqьжбуне бьр'әшинә диwаре горигәһе, хуна майи жи бьра бьньqьтә жера горигәһе. Әва дийарийа паqьжбуне йә.
[10] Йа дьн жи анәгори qьрара дийарийа т'әвайишәwате бьдә у к'аһин бона гӧне wийи кьри к'әwандьне бькә у wе ль wи бе бахшандьне.
[11] Ле һәгәр дестда т'ӧнә, әw нькарә дӧ фатьмока йан дӧ щущукед кәwа жи бинә, һьнге бьра йе гӧнә кьрийә бона һ'әдийа хwә п'арәкә ефайе жь дәһа йәк аре хас чаwа дийарийа паqьжбуне бинә. Нә р'ун бькә сәр нә жи бьхуре, чьмки әва дийарийа паqьжбуне йә.
[12] Әw ви ари бинә щәм к'аһин, к'аһин бона биранине бь к'ӧлма хwә т'ьжи аре хас һьлдә, ль сәр горигәһе т'әви дийарийед шәwатейә бона Хӧдан бьшәwьтинә. Әва дийарийа паqьжбуне йә.
[13] У к'аһин бона гӧне wийи кьри к'әwандьне бькә, чь дәрәщеда жи чь кьрьбә wе ль wи бе бахшандьне. У йе майи жи мина дийарийа нани к'аһинр'а бьминә».
[14] Хӧдан Мусар'а хәбәрда у гот:
[15] «Һәгәр йәк борще хwә нәqәдинә у бе һ'әмде хwә һьндава тьштед Хӧданә пирозда гӧнә бькә, бьра жь бәр нәһәqийа хwәва жь кери бәранәки беqӧсур, wәкә wи qимәте тәйи пе шекьлед зивин к'ьфшкьри, анәгори шекьлед пирозгәһе Хӧданр'а дийарийа жь бәрвадайине бинә.
[16] Бьра щьрма wе зийана кӧ дайә тьштед пироз бьк'ьшинә, ӧса жи п'арәкә жь пенщ п'ара ль сәрда зедә кә, бьдә к'аһин. У к'аһин бьра пе wи бәране дийарийа жь бәрвадайине к'әwандьне бькә у wе ль wи бе бахшандьне.
[17] Һәгәр йәк бе һ'әмде хwә гӧнә бькә у жь wан т'әмийед Хӧданә дайи шаш бә, йәки жь wан нәqәдинә, әw сущдар дьбә у гӧнә дькә стуйе хwә.
[18] Бьра әw wәкә wи qимәте тәйи к'ьфшкьри, жь кери бәранәки беqӧсур бона дийарийа жь бәрвадайине к'аһинр'а бинә, к'аһин бьра бона wе нәһәqийа wийә беһ'әмде хwә кьри к'әwандьне бькә у wе ль wи бе бахшандьне.
[19] Әва дийарийа жь бәрвадайине йә, бона нәһәqийа кӧ әwи ль бәр Хӧдан кьрьбу».