[1] Хӧдан Мусар'а хәбәрда у гот:
[2] «Һарун у кӧр'ед wи, к'ьнщед wан, р'уне р'ункьрьне, щанәге дийарийа паqьжбуне, дӧ бәрана у сәлә нане бе һәвиртьр'шк һьлдә
[3] у т'әмамийа щьвине т'опи ль бәр дәре Коне Щьвине кә».
[4] Муса ӧса кьр, чаwа кӧ Хӧдан ә'мьр ль wи кьр у щьвин ль бәр дәре Коне Щьвине щьвийа.
[5] Муса готә щьвине: «Ва йә әw тьште кӧ Хӧдан ә'мьр кьр кӧ бькьн».
[6] Муса Һарун у кӧр'ава анинә незик у әw пе аве шуштьн.
[7] Кьрас ль Һарун кьр, бәнпьшт да пьште, чӧх ль wи кьр, ефод жорда авитә сар, qәйт'ана ефод да сәр пьште у пе qәйт'ана ефод әw шьданд.
[8] Паше р'әхтсинг авитә сәр wи у Урим у Тумим жи кьрьнә бәр р'әхтсинг.
[9] П'ап'ах да сәре wи, бәрә'никә зер'ин аwа готи к'офийа пироз авитә нә'тька п'ап'ах, чаwа кӧ Хӧдан ә'мьр ль Муса кьрьбу.
[10] У Муса р'уне р'ункьрьне һьлда, Коне Шә'дәтийе у һәр тьштед теда р'ун кьрьн у әw пироз кьрьн,
[11] һ'әфт щара жь wи р'уни р'әшандә сәр горигәһе, горигәһ у һ'әму һащәтед wе, т'әшт бьнгәһа wева р'ун кьрьн бона пирозбуна wан.
[12] Паше Муса әw р'уне р'ункьрьне һьлда р'етә ль сәр сәре Һарун у әw р'ун кьр, бона пирозбуна wи.
[13] Муса кӧр'ед Һарун анин, кьрас ль wан кьрьн, бәнпьшт данә пьшта wан у к'олоз данә ль сәре wан, чаwа кӧ Хӧдан ә'мьр ль Муса кьрьбу.
[14] У щанәге дийарийа паqьжбуне ани, Һарун у кӧр'ед wи дәстед хwә данинә ль сәр сәре щанәге дийарийа паqьжбуне.
[15] Муса әw сәржекьр, т'ьлийа хwә хунеда кьр у ль стьруйед һәр алийед горигәһе хьст, горигәһ паqьж кьр у хуна майи р'етә жера горигәһе, әw пироз кьр бона к'әwандьне ль сәр wе бькә.
[16] У һ'әму бәзе навдьл, бәтане щәгәре, һәр дӧ гӧр'ч'ька бәзе wанва Муса һьлда у ль сәр горигәһе шәwьтанд.
[17] Ле тьште жь щанәга майи: Ч'әрме wи, гошт ә'дәбева жь зоме дәр ль сәр егьр шәwьтанд, чаwа кӧ Хӧдан т'әми дабу Муса.
[18] Пәй ве йәкер'а Муса бәране дийарийа т'әвайишәwате ани, Һарун у кӧр'ед wи дәстед хwә данинә ль сәр сәре бәрен.
[19] Муса әw сәржекьр у хуна wи р'әшандә ль сәр һәр алийед горигәһе.
[20] Бәран чити-чити кьр, Муса сәри, т'әви wан кәрийа бәзва шәwьтандьн,
[21] чахе навдьл у ньг пе аве шуштьн, Муса т'әмамийа бәрен ль сәр горигәһе шәwьтанд. Әв бу дийарийа т'әвайишәwатейә бинхwәш, дийарийа шәwате бона Хӧдан, чаwа кӧ Хӧдан ә'мьр ль Муса кьрьбу.
[22] Муса бәране дьн ани, бәране qәwин-qәдимкьрьне, Һарун у кӧр'ед wи дәстед хwә данинә ль сәр сәре бәрен.
[23] Муса әw сәржекьр, жь хуна wи һьлда гӧпька гӧһе Һарунә р'асте у т'ьлийа мәзьнә дәсте wийи р'асте хьст, ӧса жи печ'ийа мәзьнә ньге wийи р'асте.
[24] Муса кӧр'ед Һарун жи анин, әw хун гӧпька гӧһе wани р'асте у печ'ийа мәзьнә дәсте wани р'асте, ӧса жи печ'ийа мәзьнә ньге wани р'асте хьст у хуна майин жи р'әшандә ль сәр һәр алийед горигәһе.
[25] У Муса бәзе бәрен, даw, һ'әму бәзе навдьл, бәтане щәгәре, һәр дӧ гӧр'ч'ьк бәзва, пиле р'асте һьлдан
[26] у жь сәла нане бе һәвиртьр'шкә ль бәр Хӧдан жи к'атәки бе һәвиртьр'шк у к'атәки р'унда стьрайи у лошәк һьлдан, данинә ль сәр бәз у пиле р'асте.
[27] У әв һ'әму данинә ль сәр к'әфа дәстед Һарун у кӧр'ед wи, әw чаwа дийарийа һ'әжандьне ль бәр Хӧдан һ'әжандьн.
[28] У Муса әв жь дәстед wан гьрт, т'әви дийарийа т'әвайишәwатейә ль сәр горигәһе шәwьтанд. Әва дийарийа qәwин-qәдимкьрьне йә бинхwәш ә, дийарийа шәwате бона Хӧдан.
[29] Муса сәрсинг һьлда у ль бәр Хӧдан чаwа дийарийа һ'әжандьне һ'әжанд. Әва п'ара Муса к'әт, жь wи бәрене дийарийа qәwин-qәдимкьрьне, чаwа кӧ Хӧдан ә'мьр ль Муса кьрьбу.
[30] Паше Муса жь р'уне р'ункьрьне у жь хуна сәр горигәһе һьлда р'әшандә ль сәр Һарун у к'ьнщед wи у ль сәр кӧр'ед wи у к'ьнщед wан. Бь ви аwайи Һарун к'ьнщава у кӧр' к'ьнщед wанва пироз кьрьн.
[31] Муса готә Һарун у кӧр'ед wи: «Гошт ль бәр дәре Коне Щьвине бьк'әлиньн у ль wьр пе нане жь сәла дийарийа qәwин-qәдимкьрьне бьхwьн, чаwа ль мьн һатә ә'мьркьрьн у готьн кӧ т'әне гәрәке Һарун у кӧр'ава бьхwьн.
[32] У әw гошт у нане бәрмайи ль сәр егьр бьшәwьтиньн.
[33] Һ'әфт р'ожа жь дәре Коне Щьвине дәрнәк'әвьн, һ'әта кӧ р'ожед qәwин-qәдимкьрьна wә т'әмам нәбьн, чьмки qәwин-qәдимкьрьна wәйе һ'әфт р'ожа бьк'ьшинә.
[34] Хӧдан ә'мьр кьр аһа бькьн, чаwа кӧ иро бона к'әwандьна wә һатә дәрбазкьрьне.
[35] Аwа һ'әфт р'ожа, шәв у р'ож гәрәке һун ль бәр дәре Коне Щьвине р'унен у нобәдарийа Хӧдан бькьн кӧ һун нәмьрьн, чьмки аһа ль мьн һатийә ә'мьркьрьне».
[36] Һарун у кӧр'ава һәр тьшт ӧса кьрьн, чаwа кӧ Хӧдан бь дәсте Муса ә'мьр кьрьбу.