[1] Хӧдан Мусар'а хәбәрда у готе:
[2] «Т'әмийе бьдә зар'ед Исраел, wәки тәр'а бона р'онайе бьзьре ледайийи паqьж биньн, кӧ ч'ьра т'ьме бьшхӧлә.
[3] Һарун гәрәке Коне Щьвинеда, алийе п'әр'да шә'дәтийе дәр, ч'ьре саз кә, жь еварда һ'әта сьбәһе ль бәр Хӧдан т'ьме бьшхӧлинә. Әва нава ньсьлед wәда qәйдә-qануна һ'әта-һ'әтайе бә.
[4] Ч'ьре гәрәке ль сәр шәмдана зер'е хальс ль бәр Хӧдан т'ьме һазьр кьн.
[5] Аре хас һьлди у пе wи ари донздәһ нана лехи, һәр нанәк гәрәке дӧ п'ар жь дәһә п'аред ефайе бә.
[6] У wан дӧ щергә, шәш-шәш дайнә ль сәр т'әхте бь зер'е хальс зер'кьри ль бәр Хӧдан.
[7] У бьхура сафи дайни ль сәр һәр дӧ щерга, кӧ ль сәр нан бона Хӧдан бьбә биранин чаwа дийарийа шәwате.
[8] Һәр р'ожед шәмийе т'ьме донздәһ нана гәрәке алийе зар'ед Исраелда бьдьнә ль бәр Хӧдан, чаwа пәймана һ'әта-һ'әтайе.
[9] Әванайе п'ара Һарун у кӧр'ед wи бьн, гәрәке әw вана дь щийе пирозда бьхwьн, чьмки әва бона wан жь дийарийед шәwатейә Хӧданә һәрә пироз ә. Әва qәйдә-qануна һ'әта-һ'әтайе йә».
[10] Кӧр'е жьнәкә исраели кӧ баве wи мьсьри бу, чу нава зар'ед Исраел, әwи зомеда т'әви йәки исраели шәр' кьр.
[11] У кӧр'е wе жьна исраели к'ьфьри наве Хӧдан кьр у ньфьр' кьр, әw гьртьн анинә щәм Муса. (Наве дийа wи Шьломит бу, жь бәрәка Дан qиза Дибри).
[12] Әw гьрти һьштьн һ'әта кӧ qьрара Хӧдан wанва ә'йан бә.
[13] Хӧдан Мусар'а хәбәрда у готе:
[14] «Wи мәрьве кӧ к'ьфьри жь зоме дәрхә у һ'әмуйед кӧ бьһистьнә бьра дәстед хwә бьдьнә ль сәр сәре wи у т'әмамийа щьмә'те wи бьдьнә ль бәр кәвьра бькӧжьн.
[15] Бежә зар'ед Исраел: ‹К'и кӧ ньфьр'а Хwәдейе хwә бькә, әwе гӧне хwә бьк'ьшинә.
[16] К'и к'ьфьрийа наве Хӧдан бькә әw ә'сә гәрәке бе кӧштьне, т'әмамийа щьмә'те гәрәке wи бьдә ль бәр кәвьра бькӧжә. Һәгәр хәриб бә йан бьнәли, к'ижани к'ьфьри наве Хӧдан кьр әw гәрәке бе кӧштьне.
[17] К'и кӧ мәрьвәки хә бькӧжә, әw ә'сә гәрәке бе кӧштьне.
[18] К'ижан кӧ һ'әйwанәки хә бькӧжә, жь бәр wи һ'әйwанива гәрә бьдә: Һ'әйwан жь бәр һ'әйwенва.
[19] Һәгәр йәк зәдәке ль йәки дьн хә, әwи чаwа кьрийә ӧса жь ль wи бькьн:
[20] Шкенандьн жь бәр шкенандьнева, ч'ә'в жь бә ч'ә'вва, дьран жь бәр дьранва, әwи чаwа зәдә мәрьв хьстьбә, ӧса жи гәрәке ль wи бькьн.
[21] Йе һ'әйwан кӧшт гәрәке жь бәрва бе дайине, ле йе мәри кӧшт гәрәке бе кӧштьне.
[22] Бона хәриба жи, бона бьнәлийа жи qануна wә гәрәке йәк бә, чьмки әз Хӧдан Хwәдейе wә мә›».
[23] Муса әв йәк готә зар'ед Исраел у әw мәрьве ньфьр' кьр жь зоме дәрхьстьнә дәр у данә ль бәр кәвьра. Зар'ед Исраел ӧса кьрьн чаwа кӧ Хӧдан готьбу Муса.