[1] Хӧдан Мусар'а хәбәрда у гот:
[2] «Һәгәр йәк борще хwә ль бәр Хӧдан нәqәдинә бь ви аwайи хwә гӧнәк'ар кә, аwа готи анәмәте йәки инк'ар кә, йан тьште ль wи һатьбә дайине, йан тьштәк шеландьбә, йан qәлпи ль wи кәси кьрьбә,
[3] йан тьштәки ӧндабуйи дитьбә инк'ар кә у дәрәw сонд бьхwә, жь ван һ'әмуйа йәкида гӧнә бькә, к'ижан кӧ мәрьв дькьн,
[4] бона гӧне кьри у сущдарийа хwә гәрәке әw тьште шеланди, qәлпийа кьри, йан әw анәмәте кӧ зәфт бьрьбу, йан әw тьште ӧндабуйи кӧ дитьбу,
[5] йан һәр тьшти, һьндава чьда дәрәw сонд хwарийә, гьшки ле вәгәр'инә. Бьра чарика пенща жи сәрда зедә кә бьдә wи к'ер'а дьк'әвә, ль wе р'ожа кӧ гӧне хwә нас кә.
[6] У бьра әw бона нәһәqийа хwә жь кери бәранәки беqӧсур, wәкә wи qимәте тәйи к'ьфшкьри, дийарийа жь бәрвадайине Хӧданр'а бинә щәм к'аһин.
[7] К'аһин бьра бона wи ль бәр Хӧдан к'әwандьне бькә, чь тьштида wи нәһәqи кьрьбә wе ль wи бе бахшандьне».
[8] Хӧдан Мусар'а хәбәрда у гот:
[9] «Ә'мьри ль Һарун у кӧр'ед wи бькә у бежә: ‹Әв ә qануна дийарийа т'әвайишәwате. Т'әмамийа шәве дийарийа т'әвайишәwате бьра ль сәр агьре сәр горигәһе бә һ'әта сәре сьбе у агьре горигәһе бьра т'ьме ль сәр бьшхӧлә.
[10] К'аһин бьра чӧхе хwәйи к'ьтани бавежә ль сәр хwә у һәвалкьрасе к'ьтани жи ль хwә кә, паше wе к'озийа шәwьтийә жь дийарийа т'әвайишәwате майи, бьра жь сәр горигәһе һьлдә бькә к'еләка горигәһе.
[11] Пәй ве йәкер'а бьра к'ьнще хwә бьгӧһезә, дәстәки майин ль хwә кә, к'озийе жь зоме дәрхә дәр бьбә щики паqьж.
[12] Агьре ль сәр горигәһе гәрәке бьшхӧлә у венәсе, к'аһин бьра һәр сьбәһе qьрша бьдә сәр, дийарийа т'әвайишәwате у доне дийарийед һәләqәтийе ль сәр wе бьшәwьтинә.
[13] Агьр т'ьме гәрәке ль сәр горигәһе бьшхӧлә у венәсе.
[14] Әв ә qануна дийарийа нани кӧ гәрәке кӧр'ед Һарун ль бәр Хӧдан пешбәри горигәһе бьдьн.
[15] Бьра әw к'ӧлма хwә т'ьжи аре хаси дийарийа нанида кә т'әви р'уне wе у һ'әму бьхура ль сәр дийарийа нани һьлдә, ль сәр горигәһе бона биранине бьшәwьтинә. Әва дийарийа шәwатейә бинхwәш ә бона Хӧдан.
[16] Ле һәрч'е майи бьра Һарун у кӧр'ед wи бьхwьн. Әw гәрәке әwи бе һәвиртьр'шк ль щийе пироз һ'әwша Коне Щьвинеда бьхwьн.
[17] Әw гәрәке пе һәвиртьр'шк нәйе пә'тьне, мьн әва жь дийарийед хwәйә шәwате п'ар да wан. Әва йа һәрә пироз ә, мина дийарийа паqьжбуне у дийарийа бәрвадайине.
[18] Һәр qьсьме мерини жь р'ьк'ьнйата Һарун дькарә же бьхwә. Жь дийарийед шәwатейә бона Хӧдан әва п'ара wә бә, нава р'ьк'ьнйатед wәда бьбә qәйдә-qануна һ'әта-һ'әтайе. Һәр чь кӧ лек'әвә wе пироз бә›».
[19] Хӧдан Мусар'а хәбәрда у гот:
[20] «Әв ә дийарийа Һарун у кӧр'ед wи, йа кӧ гәрәке әw ль р'ожа к'ьфшбуна хwәда бьдьнә Хӧдан: Жь дәһә п'ара п'арәкә ефайе аре хас бона дийарийа нанийә һәр р'ож, ниви сәре сьбе у ниви жи бәре еваре биньн.
[21] Ар нав р'унда стьрайи бә, ль сәр селе р'ьнд пьжанди бә, паше к'ер ки у чаwа дийарийа нани йә бинхwәш бона Хӧдан бьди.
[22] У жь кӧр'ед Һарун, к'ижан кӧ дәwса wи к'аһин бе р'ункьрьне, әw гәрәке ве йәке бькә, әва qәйдә-qануна Хӧданә һ'әта-һ'әтайе йә. Әw т'әмам гәрәке бе шәwьтандьне.
[23] У һәр дийарийа нанийә к'аһин дайи, гәрәке т'әмам бе шәwьтандьне, нә кӧ бе хwарьне».
[24] Хӧдан Мусар'а хәбәрда у гот:
[25] «Т'әви Һарун у кӧр'ед wи хәбәр дә у бежә: ‹Әв ә qануна дийарийа паqьжбуне: ль бәр Хӧдан к'идәре кӧ дийарийа т'әвайишәwате те сәржекьрьне, wе дәре жи гәрәке дийарийа паqьжбуне бе сәржекьрьне. Әва йа һәрә пироз ә.
[26] Әw к'аһине кӧ дийарийа паqьжбуне дьдә әw бьра wе бьхwә. Әw гәрәке Щийе Пирозда бе хwарьне, һ'әwша Коне Щьвинеда.
[27] Һәр чь кӧ ль гоште wе к'әвә wе пироз бә . Ле һәгәр хуна wе бьпәкә ль сәр к'ьнщәке, әwе ләк'е дь щийе пирозда бьшойи.
[28] У әw дизе кӧ әw гошт теда к'әлийайә гәрәке бе шкенандьне, ле һәгәр дәрдана сьфьрда һатийә к'әландьне, әw гәрәке бе чьр'кьрьне у пе аве бе шуштьне.
[29] Һ'әму зар'ед к'аһинайә кӧр'ин дькарьн же бьхwьн. Әва йа һәрә пироз ә.
[30] Ле һәр дийарийа паqьжбуне, хуна wе биньнә Коне Щьвине Щийе Пирозда бона к'әwандьн бе кьрьне, әw т'ӧ щар нәйе хwарьне, ле ль сәр егьр әw бе шәwьтандьне›».