[1] Хӧдан Мусар'а хәбәрда у гот:
[2] «Т'әви Һарун, кӧр'ед wи у һ'әму зар'ед Исраел хәбәр дә у бежә wан, кӧ әв ә әw тьште кӧ Хӧдан ә'мьр кьр у гот:
[3] ‹һәгәр жь мала Исраел кәсәк га йан пез йан бьзьне зомеда сәржекә, йан жь зоме дәр сәржекә
[4] у нәйнә ль бәр дәре Коне Щьвине, ль бәр Коне Шә'дәтийа Хӧдан, кӧ Хӧданр'а бькә qӧрбан, әw хуне ль сәр wи мәрьви бе һ'әсабе, әwи хун р'етийә, әw мәрьва жь нава щьмә'та хwә гәрәке бе ӧндакьрьне.
[5] Әв йәк бона wе йәке йә, кӧ зар'ед Исраел әw qӧрбанед кӧ ль чоле сәржедькьн, Хӧданр'а биньнә ль бәр дәре Коне Щьвине щәм к'аһин, чаwа дийарийед һәләqәтийе бона Хӧдан сәржекьн.
[6] У к'аһин хуне бьр'әшинә ль сәр горигәһа Хӧданә ль бәр дәре Коне Щьвине у бәз жи бона бинхwәшийе Хӧданр'а бьшәwьтинә.
[7] Qӧрбанед хwә жи әw иди бьра щьнар'а нәкьн qӧрбан, кӧ пәй wан дьчьн беә'сьлийе дькьн. Әв йәка нава ньсьлед wанда бьра бьбә qәйдә-qануна һ'әта-һ'әтайе›.
[8] У бежә wан: ‹һәгәр йәки жь мала Исраел йан жи хәрибәки кӧ нава wанда дьминә дийарийа т'әвайишәwате йан qӧрбане бькә
[9] у нәйнә ль бәр дәре Коне Щьвине кӧ Хӧданр'а бьдә, әw мәрьва жь нава щьмә'та хwә бе ӧндакьрьне.
[10] Һәгәр йәки жь мала Исраел, йан жи хәрибәки кӧ нава wанда дьминә хуна һ'әйwанәки бьхwә, әзе бәре хwә бьдьмә әw кәсе хунхwар у wи жь нава щьмә'та wи ӧнда кьм.
[11] Чьмки ә'мьре һәр бинбәри хунеда йә у мьн әw да wә кӧ һун пе wе ль сәр горигәһе к'әwандьне бона ә'мьре хwә бькьн, чьмки хун бона ә'мьр к'әwандьне дькә.
[12] Ләма мьн готә зар'ед Исраел: «Жь wә т'ӧ кәс хуне нәхwә, ӧса жи хәрибе кӧ нава wәда дьминә хуне нәхwә».
[13] Һәгәр кәсәки жь зар'ед Исраел, йан жи хәрибәки кӧ нава wанда дьминә неч'иреда һ'әйwанәки йан тәйрәдәкә кӧ те хwарьне бьгьрә, гәрәке бьһелә хун же һәр'ә у пе хwәлийе хуне бьньхемә.
[14] Чьмки ә'мьре һәр бинбәри хуна wи йә, хуна wи ә'мьре wи йә. Ләма мьн готә зар'ед Исраел: «Хуна т'ӧ бинбәри нәхwьн, чьмки хуна һәр бинбәри ә'мьре wи йә, к'е кӧ бьхwә wе бе ӧндакьрьне».
[15] У әw кәсе кӧ мьрар йан дә'вәхwари бьхwә, һәгәр бьнәли бә йан хәриб, гәрәке к'ьнщед хwә бьшо, пе аве хwә бьшо у һ'әта еваре нәпаqьж бә, паше паqьж бе һ'әсабе.
[16] Ле һәгәр әw к'ьнщед хwә нәшо у хwә нәшо, һьнге әw гӧнә дькә стуйе хwә›».