[1] यहोवा ह कहिथे, “हे ठड़गी माईलोगन, गीत गा, तें, जऊन ह कभू लइका नइं जनमाय; तोला लइका जनमे के पीरा कभू नइं होईस, जोर से गीत गा अऊ आनंद के मारे चिचिया; काबरकि तियागे माईलोगन के लइकामन बिहाता माईलोगन के लइकामन ले जादा हवंय,” यहोवा ह कहत हे।
[2] “अपन तम्बू के जगह ला चाकर कर, अऊ तम्बू के परदा ला चौड़ा कर, अपन हांथ ला झन रोक; अपन डोरीमन ला लम्बा कर, अऊ खूंटीमन ला मजबूत कर।
[3] काबरकि तेंह जेवनी कोति अऊ डेरी कोति बगरबे; तोर संतानमन जाति-जाति के मनखेमन ला बेदखल कर दीहीं अऊ ओमन के उजरे नगरमन म बस जाहीं।
[4] “झन डर; तोला लज्जित होना नइं पड़य। कलंक के बात ले झन डर; तेंह अपमानित नइं होवस। तें अपन जवानी के लज्जा ला भुला जाबे अऊ अपन बिधवापन के अपमान ला फेर सुरता नइं करबे।
[5] काबरकि तोर रचइया ह तोर घरवाला ए— सर्वसक्तिमान यहोवा ओकर नांव ए— इसरायल के पबितर परमेसर तोर छुड़इया ए; ओला जम्मो धरती के परमेसर कहे जाथे।
[6] यहोवा ह तोला वापिस बलाही मानो तेंह एक छोंड़ दिये गय घरवाली रहय अऊ मन म दुखी हस— एक अइसन घरवाली, जेकर बिहाव जवानी म ये कारन होय रिहिस ताकि ओला छोंड़ दिये जावय,” तोर परमेसर ह कहत हे।
[7] “पल भर बर ही मेंह तोला छोंड़ दे रहंय, पर अब बड़े दया करके में तोला वापिस लानहूं।
[8] रिस म आके पल भर बर मेंह तोर ले अपन मुहूं छुपा ले रहेंव, पर अब अनंत करूना ले में तोर ऊपर दया करहूं,” तोर छुड़इया यहोवा ह कहत हे।
[9] “मोर नजर म येह नूह के समय के सहीं अय, जब मेंह किरिया खाय रहेंव कि नूह के समय के सहीं जल-परलय करके मेंह धरती ला फेर कभू नइं बुड़ोवंव। एकरसेति अब मेंह ये किरिया खाय हंव कि फेर कभू तोर ऊपर रिस नइं करंव, तोला फेर कभू नइं डांटंव।
[10] चाहे पहाड़मन कांपंय अऊ पहाड़ीमन हट जावंय, पर तोर बर मोर अटल मया ह नइं टलय अऊ न ही सांति के मोर करार ह टलही,” ओ यहोवा ह कहत हे, जऊन ह तोर ऊपर दया करथे।
[11] “हे दुखियारी सहर, तें जऊन ह आंधी ले सताय गय अऊ जऊन ला सांति नइं मिलिस, में तोला बहुंत कीमती पथरामन ले फेर बनाहूं, अऊ तोर नीवमन ला नीलमनि ले बनाहूं।
[12] में तोर दीवारमन के कलस ला मूंगा ले, तोर दुवारमन ला चमकत मनि ले अऊ तोर जम्मो दीवारमन ला कीमती पथरामन ले बनाहूं।
[13] तोर जम्मो लइकामन यहोवा के दुवारा सिखोय जाहीं, अऊ ओमन ला बड़े सांति मिलही।
[14] तोला धरमीपन म स्थिर करे जाही: अतियाचार ह तोर ले दूरिहा होही; तोला कोनो डर-भय नइं होही। आतंक ला तोर ले बहुंत दूरिहा कर दिये जाही; येह तोर लकठा म नइं आही।
[15] कहूं कोनो तोर ऊपर हमला करथे, त जान ले, येह मोर काम नइं होही; जऊन ह घलो तोर ऊपर हमला करथे, ओह तोर सरन म आही।
[16] “देख, येह में अंव, जऊन ह लोहार ला बनाईस जऊन ह धुकके कोइला म आगी लगाथे अऊ सही काम करे बर गढ़के एक हथियार बनाथे। अऊ येह में अंव, जऊन ह नास करइया ला बनाथे कि ओह बिनास के बदला लेवय;
[17] तोर बिरूध बनाय गे कोनो घलो हथियार जय नइं पा सकय, अऊ तें हर ओ मनखे ला लबरा साबित करबे, जऊन ह तोर ऊपर दोस लगाही। येह यहोवा के सेवकमन ला मिले भाग ए, अऊ येह मोर कोति ले ओमन बर नियाय के बात ए,” यहोवा ह घोसना करत हे।