[1] Masakɛ Darius ka masaya san filanan kalo seginnan la, Matigi ka kuma sera kira Zakari ma. Zakari fa tun ye Berekiya ye, Berekiya fa tun ye Ido ye.
[2] Matigi y'a fɔ a ye ko a k'a fɔ Israɛl bɔnsɔn ye ko: «Ne, Kɛlɛbolow Matigi, ne tun diminna aw bɛnbaw kɔrɔ kosɛbɛ.
[3] Nka aw ka kɔsegin ne ma, ne na kɔsegin aw ma. Ne bɛ layidu ta aw ye.» Kɛlɛbolow Matigi ko ten.
[4] «Aw kana aw bɛnbaw ladɛgɛ. Fɔlɔfɔlɔ kiraw y'a fɔ u ye ko, Kɛlɛbolow Matigi ko, u ka u yɛlɛma ka u ka sira juguw ni u ka kɛwale juguw bila. Nka u ma sɔn ka ne lamɛn, u ma u tulo majɔ ne ka kuma la.»
[5] Matigi ko: «Aw bɛnbaw dun bɛ min? Yala o kiraw ɲɛnama tun bɛ se ka to badaa wa?
[6] Nka ne tun ye kuma ni ci minw di ne ka baaraden kiraw ma, olu ma se aw bɛnbaw ma wa? Aw bɛnbaw yɛlɛmana ka nimisa k'a fɔ ko: ‹Kɛlɛbolow Matigi tun ye ko minw latigɛ an kama an taama cogo juguw ni an ka kɛwalew kosɔn, a ye olu bɛe bi an kan.›»
[7] Darius ka masaya san filanan kalo tan ni kelennan, Sebat kalo tile mugan ni naaninan don, Matigi ka kuma sera kira Zakari ma, a ko:
[8] Ne ye yeli fɛn dɔ ye su fɛ. Ne ye mɔgɔ dɔ yɛlɛlen ye jube kan. A jɔlen tun bɛ mirite jiriw kɔrɔ kuluw furancɛ la. Jube ni dafejɛ ani kale tugulen bɛ a kɔ.
[9] O tuma la ne y'a fɔ ko: «Ne matigi, nin sow bɛ mun jira?» Mɛlɛkɛ min kumana ne fɛ, o ko: «U bɛ min jira, ne na o fɔ i ye.»
[10] Cɛ min jɔlen tun bɛ mirite sunw cɛma, o y'a fɔ ne ye ko: «Matigi ye minw ci ka dugukolo yɔrɔw bɛe yaala, olu don.»
[11] O kɔ, Matigi ka mɛlɛkɛ min jɔlen tun bɛ mirite sunw cɛma, sotigiw y'a fɔ o ye ko: «An ye jamana yɔrɔw bɛe yaalayaala. An y'a sɔrɔ dugukolo kan mɔgɔw bɛe lafiyalen don. U bɛ hɛrɛ la.»
[12] O tuma la Matigi ka mɛlɛkɛ y'a fɔ ko kura ko: «Kɛlɛbolow Matigi, i diminna Jerusalɛm ni Juda bɔnsɔn ka dugu minw kɔrɔ kabini san biwolonwula, i na makari ka o dimiya ban tuma jumɛn?»
[13] Mɛlɛkɛ min kumana ne fɛ, Matigi ye kumaɲuman ani dusu saalo kuma fɔ o ye.
[14] O kɔ, mɛlɛkɛ min tun bɛ kuma ne fɛ, o y'a fɔ ne ye ko ne ka pɛrɛn k'a fɔ ko Kɛlɛbolow Matigi ko: «Keleyaba tun bɛ ne la Jerusalɛm ni Sion kulu kosɔn.
[15] Ne dusu bɔlen bɛ o siya lakanalenw kɔrɔ kosɛbɛ, k'a masɔrɔ ne diminna Israɛl bɔnsɔn kɔrɔ dɔɔnin tuma min na, o siyaw ye dɔ fara Israɛl tɔorɔ kan.»
[16] O de kosɔn Matigi ko: «Ne na kɔsegin Jerusalɛm ni makari ye. Ne batosoba na jɔ yen ko kura. Sumanikɛ juru na da Jerusalɛm la.» Kɛlɛbolow Matigi ko ten.
[17] I ka pɛrɛn ni kanba ye ko kura ko Kɛlɛbolow Matigi ko: «Ne ka duguw na jiidi ko kura. Matigi na Sion dusu saalo ko kura, a na Jerusalɛmɲɛnatɔmɔ ko kura.»
[18] O kɔ, ne ye ne ɲɛ kɔrɔta ka filɛli kɛ. Ne ye biɲɛkolo naani ye.
[19] Mɛlɛkɛ min tun bɛ kuma ne fɛ, ne y'a fɔ o ye ko: «Nin biɲɛkolow ye mun ye?» A ye ne jaabi ko: «Biɲɛkolo minw ye Juda bɔnsɔn ni Israɛl bɔnsɔn ani Jerusalɛmkaw jɛnsɛn, olu don.»
[20] O kɔ, Matigi ye numukɛ naani jira ne la.
[21] Ne y'a fɔ ko: «Ninw fana bɛ na mun kɛ?» Mɛlɛkɛ ye ne jaabi ko: «O biɲɛkolo minw tun ye Juda bɔnsɔn jɛnsɛn fo mɔgɔ si tun tɛ se ka a kun kɔrɔta, o numuw nana walisa ka o biɲɛkolow lasiran ka siyaw barika ban, olu minw tun ye u biɲɛkolow kɔrɔta Juda bɔnsɔn kama ka u jɛnsɛn.»