[1] Liban, i ka i donda la konw dayɛlɛ, walisa tasuma ka i ka sedere jiriw jeni.
[2] Sipere jiriw bɛ nwunankan bɔ, k'a masɔrɔ sedere sun bira, jiriw bɛe laɲuman tigɛra ka bi. Basan sen sunw, aw ka nwunankan bɔ, k'a masɔrɔ mɔgɔ tɛ se ka don tu min kɔnɔ, o tigɛra.
[3] Saga gɛnnaw kasikan bɛ mɛn, k'a masɔrɔ u yɛrɛ bonya sababu tiɲɛnna. I tɛ foyi mɛn waraba kamalen konbokan kɔ, k'a masɔrɔ Jurdɛn ka yɛrɛ bonya sababu tiɲɛnna.
[4] Matigi, ne ka Ala ko: «I ka taa ni saga fagataw ye dumuni kɛ yɔrɔ la.
[5] U sanbaaw bɛ u faga, olu tɛ jalaki. U feerebaaw b'a fɔ ko: ‹Matigi ka tanu, ne bɛ ne yɛrɛ fɛntigiya. U gɛnbaaw si tɛ hinɛ u la.›»
[6] K'a masɔrɔ Matigi ko: «Jamana kɔnɔ mɔgɔw hinɛ tɛ ne la tun. Ne na o mɔgɔw donɲɔgɔn bolo ani u ka masakɛ fana bolo. U na jamana tiɲɛn, ne tɛna mɔgɔw si tila ka bɔ u bolo.»
[7] Saga barika dɛsɛlen minw bɛ sagakulu la ni olu ka kan ka faga, ne taara ni olu ye dumuni yɔrɔ la. Ne ye bere fila ta ka o kelen wele ko «kunnadiya bere» k'a to kelen wele ko «keleɲa bere». Ne ye sagaw dɛndɛ.
[8] Ne ye saga gɛnna saba gɛn kalo kelen na k'a masɔrɔ ne dusu sɛgɛnna olu ko la. Ne fana nege tun tɛ u la.
[9] Ne y'a fɔ ko: «Ne tɛna aw balo tun. Minw bɛ tunun, olu ka tunun, minw bɛ sa, olu ka sa. U tɔ tolenw kaɲɔgɔn sogo dun.»
[10] O kɔ, ne ye ne ka «kunnadiya» bere kari walisa ne tun ye layidu min ta siyaw bɛe ye, o ka tiɲɛn.
[11] O layidu tiɲɛnna o don na. Saga fasalen minw tun bɛ sagakulu la, olu ye ne filɛ, k'a dɔn ko Matigi ka kuma don.
[12] Ne y'a fɔ u ye ko: «Ni a ka di aw ye, aw ka ne sara di ne ma, n'o tɛ aw kana a di.» O tuma la u ye ne sara jate k'a kɛ warijɛ bisaba ye.
[13] Matigi y'a fɔ ne ye ko: «I ka o warijɛ fili daga dilala kɔrɔ. U tun ye sɔngɔba min ko fɔ, o don.» Ne ye o warijɛ bisaba ta ka u fili daga dilala kɔrɔ Matigi batoso kɔnɔ.
[14] O kɔ, ne ye ne ka bere filanan «keleɲa» bere kari walisa Juda bɔnsɔn ni Israɛl bɔnsɔn ka keleɲa ka tiɲɛn.
[15] Matigi y'a fɔ ne ye ko: «I ka saga gɛnna jugu ka finiw don ko kura,
[16] k'a masɔrɔ ne na saga gɛnna dɔ lawuli jamana kɔnɔ min tɛna hami saga sataw ko la. A tɛna saga tununnenw ɲini, a tɛna joginnenw fura kɛ, a tɛna dumuni di kɛnɛmaw ma. Nka a na to ka saga tɔlɔlenw sogo dun ka u sen ntɔrɔnw farafara.
[17] Saga gɛnna barikantan min bɛ a ka sagaw bila, bɔnɛ bɛ o ye. Npan na a bolo ni a kinin fɛɲɛ sɔgɔ. A bolo na ja, a kinin fɛɲɛ na ci.»