[1] «O don na ji boyi dɔ na dayɛlɛ Dawuda ka so ani Jerusalɛmkaw ye walisa u ka jurumuw ni u ka nɔgɔlenya kow ka ko ka u saniya.»
[2] Kɛlɛbolow Matigi y'a fɔ fana ko: «O don na ne na jamana kɔnɔ boliw bɛe tɔgɔw ban walisa u kana miiri olu ko la tun. Ne na kira nkalontigɛlaw ni ne jugu fana gɛn ka bɔ jamana kɔnɔ.
[3] Ni mɔgɔ dɔ ye kiraya kɛli daminɛ, o wolofa ni a woloba n'a fɔ a ye ko a man kan ka balo tun, k'a masɔrɔ a bɛ nkalon tigɛ Matigi tɔgɔ la. Ni a ye kiraya kɛ don min na, a fa ni a ba na a sɔgɔ fo k'a faga o don yɛrɛ la.
[4] O don na kiraw bɛe na maloya u ka yeli fɛnw kosɔn. Ni u b'a fɛ ka kiraya kɛ tuma min na, u tɛna sagasi dulɔki don u kan na ka mɔgɔw lafili tun.
[5] U bɛe kelen-kelen n'a fɔ ko: ‹Ne tɛ kira ye, ne ye sɛnɛkɛla ye. Ne makɛ ye ne san kabini ne denmisɛnma.›
[6] Ni mɔgɔ dɔ y'a ɲininka ko mun ye a bolow jogin tan? a na jaabili kɛ ko: ‹Ne ye o jogindaw sɔrɔ ne teriw ka so.›»
[7] Kɛlɛbolow Matigi ko: «Npan, i ka wuli ne ka saga gɛnna ani ne tɔɲɔgɔn kama. I ka saga gɛnna gosi walisa sagaw ka jɛnsɛn. Ne na ne bolo mɔonɔbɔ saga barikantanw ye.»
[8] Matigi ko: «Don dɔ la, jamana tila fila na halaki ka ban, tila kelen dama na to.
[9] Ne na a tila sabanan bila tasuma la. Ne na a kɔrɔbɔ i ko mɔgɔ bɛ warijɛ kɔrɔbɔ cogo min na, ka a kɔrɔbɔ i ko sanu bɛ kɔrɔbɔ cogo min na. Jamanadenw na ne tɔgɔ wele, ne na u jaabi. Ne n'a fɔ ko, ninw ye ne ka mɔgɔw ye. U fana n'a fɔ ko: ‹Matigi ye an ka Ala ye.›»