[1] San kalo wolonwulanan tile mugan ni kelennan don, Matigi kumana kira Agize da la ko:
[2] «I ka kuma Juda jamana kuntigi Zorobabɛl fɛ, o ye Sealtiɛl denkɛ ye, ani sarakalasebaaw kuntigi Josue fɛ, o ye Jozadak denkɛ ye, ani mɔgɔ tɔ tolenw fɛ ko,
[3] yala mɔgɔ minw ye o batoso nɔorɔma ye ka kɔrɔ, o dɔw ɲɛnama bɛ yan wa? Ayiwa, a dun bɛ aw ɲɛ na cogo di sisan? A tɛ aw ɲɛ na i ko foyi tɛ wa?
[4] O bɛe n'a ta Matigi ko: ‹Zorobabɛl, i ka i ja gɛlɛya, sarakalasebaaw kuntigi Josue, i ka i jija. Jamana kɔnɔ mɔgɔw bɛe, a' ye aw ja gɛlɛya. Aw ka baara kɛ k'a masɔrɔ ne bɛ aw fɛ.› Kɛlɛbolow Matigi ko ten.
[5] ‹Ne ye layidu min ta aw ye aw bɔ tuma la Misira jamana kɔnɔ, o filɛ nin ye ko ne Ni na sigi aw cɛma. O de kosɔn aw kana siran.›
[6] «Ɔwɔ, Kɛlɛbolow Matigi ko: ‹Ne na sankolo ni dugukolo ani kɔgɔji ni dugukolo bɛe yuguyugu sɔoni.
[7] Ne na siyaw bɛe yɛrɛyɛrɛ, siyaw bɛe ka nafolow na lajɛ yan. Ne na nin so fa ni nɔorɔ ye.› Kɛlɛbolow Matigi ko ten.
[8] ‹Warijɛw ni sanuw bɛe ye ne ta ye.› Kɛlɛbolow Matigi ko ten.
[9] ‹Nin batoso filanan nɔorɔ na bonya kosɛbɛ ka tɛmɛn fɔlɔ ta kan. Ne na hɛrɛ kɛ nin yɔrɔ la.› Kɛlɛbolow Matigi ko ten.»
[10] Masakɛ Darius ka masaya san filanan kalo kɔnɔntɔnnan tile mugan ni naaninan don, Matigi kumana kira Agize da la.
[11] A ko: «Kɛlɛbolow Matigi ko: ‹I ka sarakalasebaaw ɲininka sariya ko la ko,
[12] ni mɔgɔ dɔ ye saraka sogo senuma dɔ ta a ka dulɔki bolo la ka a ka dulɔki maga buuru wala diwɛn wala tulu wala dumuni fɛn, fɛn o fɛn na, yala o na kɛ fɛn senuma ye wa?›» Sarakalasebaaw y'a jaabi ko: «Ayi.»
[13] Agize y'a fɔ ko kura ko: «Ni mɔgɔ dɔ nɔgɔlen bɛ su dɔ kosɔn, ni o tigi magara fɛn senumaw la, o fɛnw fana na kɛ nɔgɔlenw ye wa?» Sarakalasebaaw y'a jaabi ko: «Ɔwɔ, u na kɛ fɛn nɔgɔlenw ye.»
[14] O tuma la kira Agize kumana u fɛ ko kura ko, Matigi ko: «Nin siya cogo bɛ ten ne ɲɛ kɔrɔ, u bolo baara nɔw fana bɛ ten. U bɛ nili fɛn minw di ne ma, olu nɔgɔlen bɛ.
[15] Aw ka miiri ko tɛmɛnnenw na kosɛbɛ. Sani aw ka Matigi ka so jɔli kabakurunw daɲɔgɔn kan,
[16] ni mɔgɔ dɔ taara ko a bɛ mureɲɛ mugan bɔɲɔ tonnen na, a b'a sɔrɔ o ye mureɲɛ tan dɔrɔn ye. Ni mɔgɔ dɔ taara diwɛn mara yɔrɔ la ko a bɛ filenɲɛ biduuru bɔ a la, a b'a sɔrɔ o ye filenɲɛ mugan dɔrɔn ye.
[17] Ne ye ja niɲɔ diro ni sanbɛlɛ lase aw ma ka aw ka fɛnw bɛe tiɲɛn. Halio, aw ma sɔn ka kɔsegin ne ma.» Matigi ko ten.
[18] «Ko min kɛra kabini san kalo kɔnɔntɔnnan tile mugan ni naaninan don, Matigi batosoba ju sigi don kɔni, ani minw bɛ kɛ bi tɛmɛnnen kɔ, aw ka miiri o kow bɛe la.
[19] Suman kisɛ dɔw bɛ aw fɛ aw ka jiginɛw kɔnɔ wa? Rezɛn ni toro sun ani olive sunw si ma den. Ayiwa k'a daminɛ bi la, ne na ne ka duba caya aw kan.»
[20] Matigi kumana kira Agize da la a siɲɛ filanan la san kalo tile mugan ni naaninan don,
[21] ko a ka kuma Juda jamana kuntigi Zorobabɛl fɛ ko: «Ne na sankolo ni dugukolo yuguyugu.
[22] Ne na masayaw bɛe ka masasigilanw dabiri duguma. Ne na siyaw ka masayaw barika ban ne ka mɔgɔw cɛma. Ne na kɛlɛkɛ wotorow ni u kɔnɔ donbaaw bɛe dabiri duguma. Sow ni u ka yɛlɛnbaaw bɛe na faga npan fɛ. U naɲɔgɔn faga.»
[23] Kɛlɛbolow Matigi ko: «O don na, ne na ne ka jɔnkɛ Zorobabɛl ta k'a kɛ taamashyɛn ye i ko bolonkɔni nɛgɛ, k'a masɔrɔ ne ye a ɲɛnatɔmɔ.» Kɛlɛbolow Matigi ko ten.