[1] O kɔ, ne ye ne ɲɛ kɔrɔta ka filɛli kɛ. Ne ye mɔgɔ dɔ jɔlen ye ni sumanikɛ juru ye a bolo.
[2] Ne y'a fɔ o ye ko: «I bɛ taa min?» A ye ne jaabi ko: «Ne bɛ taa Jerusalɛm dugu janya ni a bonya suma ka u hakɛ dɔn.»
[3] Mɛlɛkɛ min tun bɛ kuma ne fɛ, o bɔra, ko a bɛ taa tuma min na, mɛlɛkɛ wɛrɛ nana o kunbɛn k'a fɔ a ye ko:
[4] «I ka boli nin kamalen jurukisɛtigi nɔ fɛ k'a fɔ a ye ko Jerusalɛm dugu da yɛlɛlen na to a kɔnɔ mɔgɔw ni a baganw cayali kosɔn.
[5] Matigi ko: ‹Ne na kɛ kogo tasumama ye k'a lamini. Ne na kɛ nɔorɔ ye a cɛma.›»
[6] Matigi ko: «Aw ka boli, saheli yanfan jamana mɔgɔw. A' ye boli ka bɔ yen k'a masɔrɔ ne, Matigi ko, ne ye aw jɛnsɛn ni sankolo fan naani fiɲɛ ye.
[7] Jerusalɛmka minw minɛna ka taa sigi Babilonɛ, aw ka boli ka aw yɛrɛw ni kisi.»
[8] Siya minw ye aw tiɲɛn, Matigi ye ne ci olu kama, k'a masɔrɔ Kɛlɛbolow Matigi ko: «Nin kɔ, nɔorɔ bɛ na. Mɔgɔ minw magara aw la, olu magara neɲɛkisɛ la.
[9] A filɛ, ne na ne bolo kɔrɔta o siyaw kama. Minw kɛra u ka jɔnw ye, olu na u cɛ ka u kɛ jɔnw ye. O tuma la u n'a dɔn ko Kɛlɛbolow Matigi ye ne ci.»
[10] Matigi ko: «Jerusalɛmkaw, aw ka dɔnkili da ka ɲagali, k'a masɔrɔ ne bɛ na sigi aw cɛma.
[11] O don na siya caman na tugu ne, Matigi la ka kɛ ne ka mɔgɔw ye. Ne na sigi aw cɛma.» O tuma la aw n'a dɔn ko Kɛlɛbolow Matigi ye ne ci aw ma.
[12] Matigi na Juda bɔnsɔn ka jamana ta k'a kɛ a ta ye k'a kɛ jamana senuma ye. A na Jerusalɛmɲɛnatɔmɔ ko kura.
[13] Hadamadenw bɛe ka u makun Matigi ɲɛ kɔrɔ k'a masɔrɔ sɔoni a na wuli ka bɔ a sigi yɔrɔ senuma la.