[1] O kɔ, mɛlɛkɛ min tun bɛ kuma ne fɛ, o segira ka na. A ye ne lakunun i ko mɔgɔ bɛ kunun ka bɔ sunɔgɔ la cogo min na.
[2] A y'a fɔ ne ye ko: «Iɲɛ bɛ mun na?» Ne y'a jaabi ko: «Neɲɛ bɛ sanu fitinɛ la. Tulu kɛ bara bɛ a la. Burukolo wolonwula bɔra o fitinɛ tulu kɛ bara la ka taa fitinɛ bɛelɛw bɛe kelen-kelen na san fɛ.
[3] Olive sun fila bɛ o fitinɛ kɛrɛ fɛ. Kelen bɛ a tulu kɛ yɔrɔ kinin yanfan fɛ, kelen bɛ a tulu kɛ yɔrɔ numan yanfan fɛ.»
[4] Mɛlɛkɛ min tun bɛ kuma ne fɛ, ne ye o ɲininka ko kura ko: «Ne matigi, nin fɛnw bɛe kɔrɔ ye mun ye?»
[5] Ne fɛ mɛlɛkɛ ye ne jaabi ko: «I ma o kɔrɔ dɔn wa?» Ne y'a jaabi ko: «Ayi, ne matigi.»
[6] O tuma la a ko: «Matigi bɛ kuma min fɔ Zorobabɛl ye, o filɛ nin ye, ko Kɛlɛbolow Matigi ko: ‹Fanga nɔ tɛ, sebaaya nɔ tɛ, nka ne Ni nɔ don.
[7] Kuluba, e ye mun ye Zorobabɛl ɲɛ na? I na dakɛɲɛ. A na o kabakurun da ni woyokanba ye ko: «Nɛema ka kɛ, nɛema ka kɛ a ye.» ›»
[8] Matigi ka kuma sera ne ma ko kura.
[9] A ko: «Zorobabɛl bolo de ye nin so ju sigi, ale bolo na a laban fana. Ni o kɛra, ne ka mɔgɔw n'a dɔn ko ne, Kɛlɛbolow Matigi de ye i ci u ma.
[10] Mɔgɔ minw bɛ fɛn fitinin daminɛ don mafiɲɛya, olu na ɲagali kogo latilen juru la Zorobabɛl bolo. O fitinɛɲɛ wolonwula ye Matigi ɲɛw ye. A bɛ dugukolo yɔrɔw bɛe filɛ.»
[11] Ne y'a fɔ ko kura ko: «Nin olive sun fila minw bɛ fitinɛ kinin yanfan ani numan yanfan fɛ, olu kɔrɔ ye mun ye?»
[12] Ne ye ɲininkali kɛ ko kura ko: «Nin olive bolo fila minw bɛ sanu fitinɛ fan fila la, tulu senuma taa siraw fɛ, o kɔrɔ ye mun ye?»
[13] Mɛlɛkɛ ye ne jaabi ko: «I ma o kɔrɔ dɔn wa?» Ne ko: «Ayi, ne matigi.»
[14] O tuma la, a y'a fɔ ne ye ko: «Cɛ fila minw munna Matigi fɛ ni u jɔlen bɛ dugukolo bɛe Matigi ɲɛ kɔrɔ, olu don.»