[1] Ne ye ne ɲɛ kɔrɔta ko kura ka filɛli kɛ, ne ye wotoro naani ye ka bɔ kulu fila furancɛ la. O kuluw tun ye nsiranɛgɛ kuluw ye.
[2] Wotoro fɔlɔ la sow tun ye jubew ye. Wotoro filanan la sow tun ye finmanw ye.
[3] Wotoro sabanan la sow tun ye dafejɛw ye. Wotoro naaninan la sow tun ye dafebilenw ye.
[4] O kɔ, ne y'a fɔ ne fɛ mɛlɛkɛ ye ko: «Ne matigi, nin wotorow kɔrɔ ye mun ye?»
[5] Mɛlɛkɛ ye ne jaabi ko: «Sankolo fan naani fiɲɛw bɔtɔ don u mara yɔrɔw la dugukolo bɛe Matigi ɲɛ kɔrɔ.»
[6] So finw sirilen bɛ wotoro min na, o bɛ taa saheli yanfan jamana fan fɛ. Dafejɛw fana bɛ taa o fan kelen fɛ. Dafebilenw bɛ taa worodugu yanfan jamana fan fɛ.
[7] Jubew bɔra ka taa dugukolo yɔrɔw bɛe yaala. Matigi y'a fɔ u ye ko: «A' ye taa dugukolo fan bɛe yaala.» U y'a daminɛ ka dugukolo yɔrɔw yaala.
[8] O kɔ, mɛlɛkɛ ye ne wele k'a fɔ ne ye ko: «A filɛ, minw taalen bɛ saheli yanfan jamana fan fɛ, olu bɛ taa ne ka dimiya mada o saheli yanfan jamana la.»
[9] Matigi ka kuma sera ne ma a siɲɛ filanan la ko:
[10] «Helidayi ni Tobija ani Jedaga nana ni jɔnyadenw ka nili fɛn minw ye ka bɔ Babilonɛ, i ka u minɛ. I yɛrɛ ka taa Sofoni denkɛ Josiasi ka so bi. O cɛw bɔra Babilonɛ ka se yen.
[11] I ka o warijɛ ni o sanu minɛ u bolo ka olu kɛ masafugula ye ka o don Jozadak denkɛ sarakalasebaaw kuntigi Josue kun na.
[12] I k'a fɔ u ye ko Kɛlɛbolow Matigi ko: ‹Cɛ min tɔgɔ ko Jiribolo, o filɛ nin ye. A bɛ yɔrɔ min na, a na nugu yen ka Matigi batosoba jɔ.
[13] Ale de na Matigi batosoba jɔ. A na masiri ni masaya nɔorɔ ye. A na sigi a ka masasigilan kan i ko masakɛ, ka sigi a ka masasigilan kan i ko sarakalasebaa. A na o baara fila kɛ hɛrɛ dafalen na.
[14] Masafugula na mara Matigi batosoba kɔnɔ ka kɛ hakili jigin fɛn ye Helɛm ni Tobija ni Jedaja ani Sofoni denkɛ Hen ko la.›»
[15] Yɔrɔ jan na mɔgɔw bɛ na ka Matigi batosoba jɔli baara kɛ. O tuma la aw n'a dɔn ko Kɛlɛbolow Matigi de ye ne ci aw ma. Ni aw ye Matigi aw ka Ala kan minɛ, o kow bɛe na kɛ ka dafa.