[1] Masakɛ Darius ka masaya san naaninan kalo kɔnɔntɔnnan la, Kislu kalo tile naaninan don, Matigi ka kuma sera Zakari ma.
[2] Bɛtɛlkaw tun ye Sarezɛr ni Regɛm-Melɛk ani mɔgɔ dɔw ci ka taa Matigi ɲininka.
[3] U ye Matigi ka so kɔnɔ sarakalasebaaw ani kiraw ɲininka ko: «An ka kan ka kasi ka sun don kalo duurunan la i ko a delila ka kɛ cogo min na ka kɔrɔ wa?»
[4] O tuma la Kɛlɛbolow Matigi ka kuma sera ne ma ko:
[5] «I k'a fɔ jamana kɔnɔ mɔgɔw bɛe ani sarakalasebaaw ye ko, kabini san biwolonwula aw bɛ sun don ka kasi kalo duurunan ni a wolonwulanan la. Sɛbɛ la, aw bɛ o sun don ne ye wa?
[6] Ni aw bɛ dumuni kɛ ka minni kɛ, aw m'a dɔn ko aw bɛ dumuni ni minni kɛ aw yɛrɛw ye wa?
[7] «Matigi ye kuma min fɔ fɔlɔfɔlɔ kiraw da la, k'a sɔrɔ mɔgɔw sigilen tun bɛ hɛrɛ la Jerusalɛm ani a dafɛ duguw ni worodugu yanfan jamana ani jɛkɛnɛ fana la, aw tɛ o kumaw dɔn wa?»
[8] O kɔ, Matigi kumana Zakari fɛ ko,
[9] Kɛlɛbolow Matigi ko: «Aw ka kiri tigɛ ni tiɲɛ ye ka makari ni hinɛ kow kɛ aw mɔgɔɲɔgɔnw la.
[10] Aw kana muso cɛ salenw ni falatɔw ni siginfɛw ani faantanw tɔorɔ. Aw kana ko jugu miiri aw mɔgɔɲɔgɔnw kama.
[11] «Nka u ma sɔn ka o lamɛn, u ma kan minɛli kɛ. U ye u tulow datugu walisa u kana lamɛnni kɛ.
[12] U ye u dusukunw gɛlɛya i ko diaman kabakurun walisa u kana Kɛlɛbolow Matigi ka sariya ni a Ni Senu ka kuma fɔlenw lamɛn fɔlɔ kiraw da la. O de kosɔn Kɛlɛbolow Matigi diminna u kɔrɔ kosɛbɛ.
[13] O de kosɔn Kɛlɛbolow Matigi ko, ne tun bɛ weleli kɛ tuma min na, u tun tɛ lamɛnni kɛ. O de kosɔn, u ye ne wele tuma min na, ne ma sɔn ka u lamɛn.
[14] U tun tɛ siya minw dɔn, ne ye u jɛnsɛn olu cɛma. Jamana lankolon tora u kɔ, mɔgɔ si ma to a kɔnɔ. U ye jamanaɲuman kɛ kungokolon ye.»