[1] Kɛlɛbolow Matigi ka kuma sera ne ma ko kura.
[2] Kɛlɛbolow Matigi ko: «Ne ka kanuya bonyara Sion dugu ko la. Ne bɛ Sion dugu kanu kosɛbɛ haali.»
[3] Matigi ko: «Ne na kɔsegin Sion ka sigi Jerusalɛm dugu kɔnɔ. Jerusalɛm na wele ko dannamɔgɔw ka dugu. Kɛlɛbolow Matigi ka kulu na wele ko kulu senuma.»
[4] Kɛlɛbolow Matigi ko: «Cɛkɔrɔbaw ni musokɔrɔbaw sigilen na ye Jerusalɛm dugu bɔlɔnw la ni u ka berew ye u bolo u si janya kosɔn.
[5] Jerusalɛm dugu bɔlɔnw na fa kamalenw ni npogotigiw tulon kɛtɔ la.»
[6] Kɛlɛbolow Matigi ko: «Ni o don sera, o na kɛ kabako ye ne ka mɔgɔ tɔ tolenw ɲɛ na. O na kɛ kabako ye ne fanaɲɛ na wa?»
[7] Kɛlɛbolow Matigi ko: «Ne na ne ka mɔgɔw labɔ kɔrɔn yanfan ni tilebi yanfan jamanaw kɔnɔ
[8] ka u lana ka u sigi Jerusalɛm dugu kɔnɔ. U na kɛ ne ka mɔgɔw ye, ne na kɛ u ka Ala ye tiɲɛ ni tilennenya la.»
[9] Kɛlɛbolow Matigi ko: «Kuma minw fɔra kiraw da la Kɛlɛbolow Matigi ka so ju sigi tuma la, aw ye o kumaw mɛn bi, aw ka aw ja gɛlɛya.
[10] K'a masɔrɔ sani nin waati ka se, mɔgɔ tun tɛ sara, bagan ka baaraw tun tɛ sara. Mɔgɔ minw tun bɛ taa ka segin kɛ, foyi tun tɛ olu bolo ka u juguw bali. Ne tun ye mɔgɔw bɛe lawuliɲɔgɔn kama.»
[11] Kɛlɛbolow Matigi ko: «Nka kabini sisan, ne tun ye min kɛ ne ka mɔgɔ tɔ tolenw la ka kɔrɔ, ne tɛna o ɲɔgɔn kɛ u la tun.
[12] Sumanw na caya, rezɛn sunw na den, dugukolo sɛnɛ fɛnw naɲɛ, sankolo na ngomiji bɔn dugukolo kan, ne na sigi yɔrɔɲuman di ne ka mɔgɔ tɔ tolenw ma.
[13] Juda ka so ni Israɛl ka so, aw tun kɛra dangali kɛ fɛnw ye siyaw cɛma cogo min na, ne na kisili di aw ma, aw na kɛ duba kɛ fɛnw ye o cogo la. Aw kana siran, a' ye aw ja gɛlɛya.»
[14] Kɛlɛbolow Matigi ko: «Aw bɛnbaw ye ne dusu dimin tuma min na, ne ko ne na ko jugu min kɛ aw la, ne ma nimisa o la cogo min na,
[15] ne na ko ɲuman kɛ Jerusalɛm ni Juda ka so ye ten. Aw kana siran.» Kɛlɛbolow Matigi ko ten.
[16] «Ayiwa aw ka kan ka min kɛ, o filɛ nin ye. Aw bɛe kelen-kelen ka tiɲɛ fɔ a mɔgɔɲɔgɔn ye ka kiri tigɛ ni tiɲɛ ye aw ka duguw dondaw la hɛrɛ kama.
[17] Aw kana ko jugu miiriɲɔgɔn kama, aw kana aw kali nkalon kan, k'a masɔrɔ ne bɛ o fɛnw bɛe koniya.» Matigi ko ten.
[18] Kɛlɛbolow Matigi ka kuma sera ne ma, ko:
[19] «Kɛlɛbolow Matigi ko: ‹Sun donni minw bɛ kɛ san kalo naaninan ni kalo duurunan ni kalo wolonwulanan ni kalo tannan la, olu na yɛlɛma ka kɛ seli ni nisɔndiya ani barika dali niɲagali donw ye Juda ka so kɔnɔ. Nka aw ka tiɲɛ ni hɛrɛ kanu.›
[20] «Kɛlɛbolow Matigi ko: ‹Siya caman na bɔ dugu caman na,
[21] dugu dɔw mɔgɔw na taa dugu wɛrɛ mɔgɔw sɛgɛrɛ k'a fɔ ko: «A' ye na, an ka taa Matigi deli. An ka taa Kɛlɛbolow Matigi ɲini. An ka taa ɲɔgɔn fɛ.»
[22] Siya caman ni siya barikamaw na taa ka Kɛlɛbolow Matigi ɲini Jerusalɛm ka Matigi deli.›
[23] «Kɛlɛbolow Matigi ko: ‹O don na cɛ tan na bɔ kan fɔbaaw ni siyaw bɛe la ka Yahutu cɛ kelen ka dulɔkiba senkɔrɔlan minɛ k'a fɔ ko: «An b'a fɛ ka taa i fɛ, k'a masɔrɔ an y'a mɛn ko Ala bɛ aw cɛma.» ›»