[1] او آدام منی شئمالا گِدن یولدان باییر حیطه چیخارتدی، و او اوتاغا آپاردی کی، آچیق ساحه‌یه و باییر حیطئن شئمالینداکی تئکئلی‌لره باخیردی.
[2] بو تئکئلئنئن اوزونلوغو یوز، اِنی اَلّی قول‌آچ ائدی و قاپیسی شئمالا باخیردی.
[3] ائچه‌ری حیطئن ائیئرمی قولاچلیق حئصّه‌سی ائله باییر حیطئن داش یولونا باخان اوچ مرتبه‌نئن دهلئزلری اوز-اوزه ائدی.
[4] اوتاقلارین قاباغیندا اِنی اون قول‌آچ، اوزونلوغو دا یوز قول‌آچ اولان بئر ائچه‌ری دهلئز وار ائدی. قاپیلاری شئمالا باخیردی.
[5] تئکئلئنئن اوست مرتبه‌ده‌کی اوتاقلاری، آلت و اورتا مرتبه‌ده‌کی اوتاقلاردان داها دار ائدی، چونکی اوست مرتبه‌ده‌کی دهلئزلر داها چوخ یِر توتوردو.
[6] حیطلرده سوتونلار اولدوغو حالدا، اوچونجو مرتبه‌‌ده اولان اوتاقلارین سوتونلاری یوخ ائدی. بونا گؤره ده اوست مرتبه‌ده‌کی اوتاقلار، آلت و اورتا مرتبه‌ده‌کی اوتاقلاردان داها دار ائدئلر.
[7] اوتاقلارین قاباغیندا، اوتاقلارلا و باییر حیطله یاناشی بئر باییر دووار وار ائدی: اَلّی قول‌آچ اوزونلوغوندا ائدی.
[8] چونکی باییر حیطئن یانینداکی یان‌بایان اوتاقلارین اوزونلوغو اَلّی قول‌آچ ائدی. معبدئن بؤیوک اوتاغینا داها یاخین یان‌بایان اوتاقلارین اوزونلوغو دا یوز قول‌آچ ائدی.
[9] بو اوتاقلارین آشاغیدا شرقه طرف بئر قاپیسی وار ائدی کی، باییر حیطدن گئرمک اولاردی.
[10] دووارین اوزونلوغو بویونجا ائچه‌ری حیطئن جنوبو بویو باشقا اوتاقلار وار ائدئلر کی، آچیق ساحه‌یه و باییر حیطده‌کی تئکئلی‌لره باخیردیلار.
[11] شئمال طرفده‌کی اوتاقلاردا اولدوغو کئمی، بو اوتاقلارین قاباغیندا دا بئر کِچئش وار ائدی. اوتاقلارین اوزونلوغو و اِنی هَمَن ائدی، چیخیشلاری و اؤلچولری شئمال طرفده اولان اوتاقلارینکی کئمی ائدی.
[12] جنوبداکی اوتاقلارین قاپیلاری دا شئمالداکی‌لار کئمی ائدی. کِچئدئن باشلانیشیندا بئر قاپی وار ائدی. آرخا دووارلار بویونجا شرقه اوزانان بو کِچئش اوتاقلارا آچیلیردی.
[13] سونرا او آدام منه ددی: «معبدئن آچیق ساحه‌سئنه باخان شئمالداکی و جنوبداکی اوتاقلار موقدّسدئر. ربّئن حوضوروندا خئدمت ادن کاهئنلر اورادا لاپ موقدّس تقدئملردن یئیه‌جکلر. لاپ موقدّس تقدئملری-تاخیل تقدئملرئنی، گوناه قوربانلارینی و تقصئر قوربانلارینی اورادا قویاجاقلار، چونکی اورا موقدّسدئر.
[14] کاهئنلر موقدّس ساحه‌یه گئرَنده، خئدمت اِدَرکَن، اَیئنلرئنده‌کی پالتارلاری اورادا قویمادان باییر حیطده چیخماسینلار، چونکی بو پالتارلار موقدّسدئرلر. اونلار خالقین اولدوغو یِرلره گتمه‌دن قاباق باشقا پالتارلار گِیمه‌لی‌دئرلر.»
[15] او آدام معبدئن ائچ اوتاغینی اؤلچوب قورتاراندان سونرا، منی شرق قاپیسیندان باییرا آپاردی و هر طرفدن بو ساحه‌نی اؤلچدو.
[16] شرق طرفئنی قامیشلا اؤلچدو: اوزونلوغو بش یوز قول‌آچ ائدی.
[17] شئمال طرفئنی ده قامیشلا اؤلچدو: اوزونلوغو بش یوز قول‌آچ ائدی.
[18] جنوب طرفئنی ده قامیشلا اؤلچدو: اوزونلوغو بش یوز قول‌آچ ائدی.
[19] قرب طرفئنه دؤنوب اونو قامیشلا اؤلچدو: اوزونلوغو بش یوز قول‌آچ ائدی.
[20] بله‌جه ساحه‌نئن دؤرد طرفئنی اؤلچدو. ساحه‌نئن اطرافیندا بئر دووار وار ائدی کی، موقدّس اولانی موقدّس اولمایاندان آییریردی: اوزونلوغو و اِنی هر بئری بش یوز قول‌آچ ائدی.