[1] منه ربّئن بو سؤزو نازئل اولدو:
[2] «ای بشر اوغلو، اوزونو اورشلئمه طرف چِوئر و موقدّس مکانلارین ضئدّئنه دانیش. ائسرایئل تورپاغینین ضئدّئنه نبئلئک ات.
[3] ائسرایئل تورپاغینا دِه کی، رب بله دیئر: ”باخ، من سنئن ضئدّئنه‌یَم. قیلینجیمی قینیندان چیخاردیب سنئن ائچئنده اولان صالح آدامی دا، پئس آدامی دا قیریب تؤکه‌جیم.
[4] سنئن ائچئنده اولان صالح آدامی دا، پئس آدامی دا قیریب تؤکه‌جَیئم اوچون قیلینجیم قینیندان چیخاجاق کی، جنوبدان شئمالاجاق، اراضئده یاشایان بوتون بشرئن اوستونه اِنسئن.
[5] او واخت بوتون بشر بئله‌جک کی، رب منم. قیلینجیمی قینیندان چکمئشم و بئر داها یرئنه قاییتمایاجاقدیر.“
[6] سن ناله چک، ای بشر اوغلو؛ اَزئک بئر اورَک و آجی بئر قَمله اونلارین گؤزو قاباغیندا ناله چک.
[7] اونلار سنه دئیَنده کی، ”نه‌یه گؤره ناله چکئرسن؟“ اونلارا دئیَرسن: ”گلن خبره گؤره. هر اورَک اَرئیه‌جک، هر اَل یانینا دوشه‌جک، بوتون روحلار ضعئفلَیه‌جک و بوتون دئزلر سو کئمی تئتره‌یه‌جک. باخ، او خبر گلئر و یرئنه یِتئشه‌جک.“ پروردئگار رب بله بویورور.»
[8] منه ربّئن بو سؤزو نازئل اولدو:
[9] «ای بشر اوغلو، نبئلئک ادئب دِه کی، پروردئگار بله دیئر: ”دِه کی، قیلینج، بئر قیلینج ائتئله‌نئب، جئلالانیب.
[10] اؤلدورمک اوچون ائتئله‌نئب، شئمشَک کئمی چاخماق اوچون جئلالانیب! نجه سِوئنه بئله‌رئک؟ اوغلومون عصاسی بوتون آغاجلارا خور باخیر.
[11] قیلینج اَلده توتولماق اوچون جئلالانماغا ورئلئب. اؤلدوره‌نئن اَلئنه ورئلمک اوچون ائتئله‌نئب، جئلالانیب.
[12] ای بشر اوغلو، باغیر، شئون ات. چونکی بو قیلینج خالقیمین ضئدّئنه‌دئر، بوتون ائسرایئل رهبرلرئنئن ضئدّئنه‌دئر. اونلار خالقیملا بئرلئکده قیلینجا تسلئم ادئلئبلر. بونون اوچون بودونو دؤی.“
[13] پروردئگار رب بویورور: ”قاباقدا ائمتاحان وار. حتّا اگر خور باخان عصا داها سالامات قالمازسا، نه اولار؟
[14] سن ای بشر اوغلو، نبئلئک ات، اَللرئنی بئربئرئنه وور. قوی قیلینج ائکی، اوچ دفه وورسون. او اؤلدورَن بئر قیلینجدیر، چوخلو آدام قیران، ائنسانی هر طرفدن آرایا سالان قیلینجدیر کی،
[15] اونلارین اوره‌یی اَرئسئن، و بوتون دروازالاریندا چوخ آدام یِره سَرئلسئن. قیرغین قیلینجینی ورمئشم. آه، او، شئمشَک کئمی چاخیب وورماق اوچون دوزَ‌لئب، اؤلدورمک اوچون حاضیر دورور.
[16] ای قیلینج، اؤزونو ائتی گؤرسد، صاغا دؤن، کَس. سولا دؤن، کَس، اوزون هارا چِورئلسه، اورا گت.
[17] من ده اَللرئمی بئربئرئنه ووراجاغام، بله‌جه قضبئمی یاتیرداجاغام. بونو من رب ددئم.“»
[18] منه ربّئن بو سؤزو نازئل اولدو:
[19] «سن، ای بشر اوغلو، بابئل پادشاهینین قیلینجینین گلمه‌سی اوچون ائکی یول حاضیرلا؛ ائکئسی ده بئر اؤلکه‌دن چیخسین. بئر یرده نئشان قوی، اونو شهر یولونون باشینا قوی.
[20] قیلینجا بئر یول حاضیرلا کی، عَمّون اؤولادلارینین رَبّا شهرئنه، یهودایا، قالالی اورشلئمه گلسئن.
[21] چونکی بابئل پادشاهی یولون آیریلدیغی یرده، ائکی یولون باشیندا دایانیر کی، فالچیلیق اتسئن؛ اوخلاری سئلکَله‌یئر، اِو بوتلرئندن مصلحت آلیر، کَسئلَن بئر حیوانین قارا جئیه‌رئنه باخیر.
[22] اونون صاغ اَلئنده اورشلئمی گؤرسه‌دن فال وار کی، مانجاناقلاری قویسون، اؤلدورمک امری ورسئن، دؤیوش هارایینی اوجالتسین، مانجاناقلاری دروازالارین قاباغیندا قویسون، تورپاق قالاغی و موحاصئره دووارلاری دوزَ‌لتسئن.
[23] اونونلا آند ائچئب سازئش باغلایانلار فالین یالان اولدوغونو گومان اده‌جکلر. لاکئن پادشاه تقصئرلرئنی خاطیرلاییر کی، اونلار اسئر آلینسینلار.
[24] بونا گؤره ده پروردئگار رب بله دیئر: ”ائندی کی تقصئرئنئزی اِله ادئبسئنئز کی، یادلاردا قالسین و بوندا سئزئن خاطالارینیز آشکارا چیخیب، اِله کی، بوتون عمل‌لرئنئزده گوناهلارینیز بَلّی‌دئر، یادا دوشدویونوز اوچون اسئر آلیناجاقسینیز.
[25] سن ای نجئس و پئس اولان ائسرایئل رهبری، گونون چاتدی، نهایت، جزا واختین گلدی.“
[26] پروردئگار رب بله دیئر: ”عمّامه‌نی و تاجی گؤتور؛ داها بو بله اولمایاجاق. آلچالانی اوجالت، اوجالانی آلچالت.
[27] وئران، وئران، وئران قویاجاغام اورانی! بو دا اولمایاجاق، او زاماناجاق کی، حاق صاحئبی گلسئن و من اورانی اونا وره‌جیم.“
[28] سن ای بشر اوغلو، نبئلئک ادئب دِه کی، عَمّونلولار و اونلارین اتدئکلری تحقئر باره‌ده پروردئگار رب بله دیئر: ده: ”بئر قیلینج، بئر قیلینج هلاک اتمک اوچون سئیرئلئب. قیرغین اوچون جئلالانیب کی، شئمشَک کئمی پارلاسین.
[29] اِله بئر زاماندا کی، سنه بوش رؤیالار گؤرورلر، سنه یالان فالچیلیق آچیرلار کی، سنی اؤلمه‌لی اولان پئس آداملارین بویونلارینا اِندئرسئنلر، ای قیلینج! بو آداملارین گونو چاتدی، سِوَن جزا واختی گلدی.
[30] قیلینجی قینینا قایتار! سنی یارادیلدیغین یرده، دوغولدوغون اؤلکه‌ده موحاکئمه اده‌جیم.
[31] قضبئمی اوستونه تؤکه‌جیم؛ حئدّتئمئن اودونو اوستونه پوفلَیه‌جیم و سنی وحشی آداملارا کی، محو اتمکده ماهئردئرلر، تسلئم اده‌جیم.
[32] سن اودا اودون اولاجاقسان؛ اؤلکه ائچئنده قانین تؤکوله‌جک. داها یادا سالینمایاجاقسان، چونکی من رب بونو دِمئشم.“»