[1] اسئرلئیئمئزئن اونونجو ائلئنده، اونونجو آیین اون‌ائکئنجی گونو منه ربّئن سؤزو نازئل اولدو:
[2] «ای بشر اوغلو، اوزونو مئصئر پادشاهی فئرعونا طرف چِوئر، اونون و بوتون مئصئرئن ضئدّئنه نبئلئک ادئب دِه کی،
[3] پروردئگار رب بله دیئر: ”ای اؤز چایلاری ائچئنده یاتان بؤیوک اَژداها مئصئر پادشاهی فئرعون، باخ، من سنئن ضئدّئنه‌یَم. او دیئب: نئل چایی منئمدئر، اونو اؤزوم اوچون یاراتمیشام.
[4] سنئن چَنه‌نه قارماق کچئرده‌جیم، چایلارینداکی بالیقلاری سنئن پولجوقلارینا یاپیشدیراجاغام. سنی چایلارینین ائچئندن چیخارداجاغام، چایلارینین بوتون بالیقلاری سنئن پولچوقلارینا یاپیشاجاقلار.
[5] سنی ده، چایلارینداکی بوتون بالیقلاری دا صحرایا آتاجاغام. چؤل‌لره دوشه‌جکسن؛ ییغیلیب توپلانیلمایاجاقسان. سنی یِم کئمی یِرئن وحشی حیوانلارینا، گؤیده‌کی قوشلارا وره‌جیم.
[6] او واخت مئصئرده یاشایان هر کس بئله‌جک کی، رب منم. چونکی سن ائسرایئل خالقی اوچون قامیشدان اولان بئر دَیَنَک اولدون.
[7] سندن یاپیشدیقلاری زامان قیریلیب اونلارین چئیئنلرئنی یاردین؛ سنه سؤیکَندئکلری زامان قوپوب اونلارین بِل‌لرئنی بورخوتدون.“
[8] بونا گؤره ده پروردئگار رب بله دیئر: ”باخ، من سنئن اوستونه قیلینج گتئره‌جیم، ائنسانی دا، حیوانی دا اوستوندن سئلئب محو اده‌جیم.
[9] مئصئر اؤلکه‌سی کئمسه‌سئز قالاجاق و خارابالیغا چِورئله‌جک. او واخت بئله‌جکلر کی، رب منم. چونکی سن ددئن: نئل چایی منئمدئر، اونو من یاراتدیم.
[10] بونا گؤره ده باخ، من سنئن و چایلارینین ضئدّئنه‌یَم. مئصئر تورپاغینی مئگدولدان سِوِنه، کوش سرحدئنه قدر کئمسه‌سئز قویاجاغام و خارابالیغا چِوئره‌جیم.
[11] ائچئندن ائنسان آیاغی دا، حیوان آیاغی دا کچمیه‌جک، اورادا قیرخ ائل آدام یاشامایاجاق.
[12] مئصئری خارابا قالان اؤلکه‌لر آراسیندا خارابالیغا چِوئره‌جیم. شهرلری وئران اولموش شهرلر آراسیندا قیرخ ائل کئمسه‌سئز قالاجاق. مئصئرلی‌لری مئلّتلر آراسینا یایاجاغام، اؤلکه‌لر آراسینا سَپه‌لَیه‌جیم.“
[13] پروردئگار رب بله دیئر: ”قیرخ ائلدن سونرا مئصئرلی‌لری سَپه‌لَندئکلری خالقلارین آراسیندان بئر یِره ییغاجاغام.
[14] اسئر اولونان مئصئرلی‌لری پَتروس تورپاغینا یعنی اؤز وطنلرئنه گری قایتاراجاغام. اونلار اورادا ضعئف بئر مملکت اولاجاقلار.
[15] اونلار مملکتلرئن لاپ گوجسوزو اولاجاقلار، بئر داها مئلّتلرئن اوستونده آغالیق اتمیه‌جکلر. اونلاری اِله کئچئک اده‌جیم کی، بئر داها مئلّتلره حؤکمران اولماسینلار.
[16] مئصئر بئر داها ائسرایئل خالقینین بِل باغلادیغی یِر اولمایاجاق. مئصئرلی‌لر اونلارا مئصئره اوز گتئرمکله گوناه اتدئکلرئنی خاطیرلاداجاقلار. ائسرایئللی‌لر اوندا بئله‌جکلر کی، پروردئگار رب منم.“»
[17] اسئرلئیئمئزئن ائیئرمی یدّئنجی ائلئنده، بئرئنجی آیین بئرئنجی گونو منه ربّئن سؤزو نازئل اولدو:
[18] «ای بشر اوغلو، بابئل پادشاهی نِبوکَدنِصّر صورلا موحارئبه‌ده اؤز قوشونونا چوخ زحمت وردی. عسگرلرئن ساچی تؤکولدو، آغیر یوک داشیماقدان چئیئنلرئنئن دَرئسی آچیلدی. لاکئن نه او نه ده قوشونو صوردان بئر شی آلا بئلدئلر کی، اونون ضئدّئنه موحارئبه‌ده چکدئیی زحمتئن عوضی اولسون.
[19] بونا گؤره ده پروردئگار رب بله دیئر: ”باخ، من مئصئر اؤلکه‌سئنی بابئل پادشاهی نِبوکَدنِصّره وره‌جیم؛ او، ثروتئنی آپاریب اؤلکه‌نی قارت و تالان اده‌جک. قوشونونون اوجرتی بو اولاجاق.
[20] چکدئیی زحمتئن عوضئنده مئصئر اؤلکه‌سئنی اونا ورمئشم، چونکی او دا، قوشونو دا بو ائشی منئم اوچون اتدی.“ پروردئگار رب بله بویورور.
[21] ”او گون ائسرایئل نسلئنئن گوجونو اؤزونه قایتاراجاغام. اونلارین آراسیندا سنئن دئلئنی آچاجاغام. او واخت بئله‌جکلر کی، رب منم.“»