[1] منه ربّئن بو سؤزو نازئل اولدو:
[2] «ای بشر اوغلو، نبئلئک ادئب دِه کی، پروردئگار رب بله دیئر: ”آه، او گون دیئب شئون ادئن،
[3] چونکی او گون یاخیندیر، ربّئن گونو یاخیندیر؛ او گون بولودلو گوندور، مئلّتلرئن قئیامَت گونودور.
[4] مئصئرئن اوستونه قیلینج گله‌جک، کوش درد ائچئنده یاتاجاق او زامان کی، مئصئرده آداملار هلاک اولورلار، اؤلکه‌نئن ثروتی قارت اولونور، بونؤوره‌‌لری داغیلیر.
[5] مئصئرله بئرلئکده کوش، پوت، لود، بوتون عَرَبئستان، کوب و عهد باغلادیغی اؤلکه‌نئن آداملاری قیلینجدان کچئرئله‌جکلر.“
[6] رب بله دیئر: ”مئصئره آرخا اولانلار ییخیلاجاقلار، اونون کئبئرلَندئیی قودرت ییخیلاجاق؛ مئگدولدان سِوِنه قدر اراضئده قیلینجدان کچئردئلَنه‌جکلر.“ پروردئگار رب بله بویورور.
[7] ”مئصئر خارابا قالمیش اؤلکه‌لر آراسیندا خارابا قالاجاق. شهرلری وئران اولموش شهرلر آراسیندا وئران قالاجاق.
[8] من مئصئری اودا تسلئم ادنده، اونا کؤمک ادنلر اَزئلَنده بئله‌جکلر کی، رب منم.
[9] او گون گَمئلرله قاصئدلر گؤندَ‌ره‌جیم کی، لاقید اولان کوش اهالئسئنی قورخوتسونلار. اونلار مئصئرئن داغیلدیغی گون گلنده ائضطئرابا دوشه‌جکلر. باخ، او گون گلئر!“
[10] پروردئگار رب بله دیئر: ”بابئل پادشاهی نِبوکَدنِصّر واسئطه‌سی‌ائله مئصئرئن بوللوغونا آخیر قویاجاغام.
[11] او و قوشونو کی، مئلّتلر آراسیندا لاپ رحمسئزدئرلر، اؤلکه‌نی یِرله بئر اتمک اوچون گتئرئله‌جک. مئصئرئن ضئدّئنه قیلینج چکه‌جکلر، اؤلکه‌نی اؤلولرله دولدوراجاقلار.
[12] چایلاری قورودوب، اؤلکه‌نی پئس آداملارا ساتاجاغام. اؤلکه‌نی ده، اورادا اولان هر شیی ده یاداِللی‌لرئن اَلی ائله وئران اده‌جیم.“ من رب بونو ددئم.
[13] پروردئگار رب بله دیئر: ”بوتلری محو اده‌جیم، نوفداکی بوتلری یوخ اده‌جیم؛ آرتیق مئصئرده رهبر قالمایاجاق؛ بله‌جه مئصئر اؤلکه‌‌سئنی قورخوویا سالاجاغام.
[14] پَتروسو خارابالیغا چِوئره‌جیم، صوعَنی اودا وره‌جیم، نو شهرئنی موحاکئمه اده‌جیم.
[15] قضبئمی مئصئرئن قالاسی اولان صئن شهرئنئن اوستونه تؤکه‌جیم، نو شهرئنئن چوخلو اهالئسئنی یوخ اده‌جیم.
[16] مئصئری اودا وره‌جیم، صئن شهری آغیر بئر آغرییا دوشه‌جک، نو شهرئنئن دوواری یاریلاجاق. نوف هر گون ائضطئراب ائچئنده یاتاجاق.
[17] اون شهرئنئن، پئبِسِت شهرئنئن جاوانلاری قیلینجدان کچئرئله‌جک. اوراداکی اهالی اسئر اولوناجاق.
[18] تَخپِنخِسده مئصئرئن یوغونو قیردیغیم زامان اورادا گوندوز قارانلیغا چِورئله‌جک، کئبئرلَندئیی قودرت محو اولاجاق. شهر بولودلارلا اؤرتولَنه‌جک، قیز شهرلری اسئر اولوناجاق.
[19] بله‌جه مئصئری موحاکئمه اده‌جیم. او واخت بئله‌جکلر کی، رب منم.“»
[20] اسئرلئیئمئزئن اون بئرئنجی ائلئنده، بئرئنجی آیین یدّئنجی گونو منه ربّئن سؤزو نازئل اولدو:
[21] «ای بشر اوغلو، مئصئر پادشاهی فئرعونون قولونو قیردیم. باخ، قولو ساغالماق اوچون باغلانماییب، اونا مَرهم قویولماییب کی، قیلینج اَله آلاجاق قدر گوجلَنسئن.
[22] بونا گؤره ده پروردئگار رب بله دیئر: ”باخ، من مئصئر پادشاهی فئرعونون ضئدّئنه‌یَم. هر ائکی قولونو-صاغ اولانی دا، سینانی دا قیراجاغام، قیلینجی اَلئندن سالاجاغام.
[23] مئصئرلی‌لری مئلّتلر آراسینا یایاجاغام، اؤلکه‌لر آراسینا سَپه‌لَیه‌جیم.
[24] بابئل پادشاهینین قولونا گوج وره‌جیم، قیلینجیمی اونون اَلئنه وره‌جیم. آمّا فئرعونون قول‌لارینی قیراجاغام. او، بابئل پادشاهینین قاباغیندا آغیر یارالی کئمی ناله چکه‌جک.
[25] بابئل پادشاهینین قولونا گوج وره‌جیم، لاکئن فئرعونون قول‌لاری یانینا دوشه‌جک. قیلینجیمی بابئل پادشاهینین اَلئنه ورنده، او دا بو قیلینجی مئصئر اؤلکه‌سئنه اوزاداندا بئله‌جکلر کی، رب منم.
[26] مئصئرلی‌لری مئلّتلر آراسینا یایاجاغام و اؤلکه‌لر آراسینا سَپه‌لَیه‌جیم. او واخت بئله‌جکلر کی، رب منم.“»