[1] منه ربّئن بو سؤزو نازئل اولدو:
[2] «ای بشر اوغلو، سن عاصی بئر خالقین آراسیندا یاشاییرسان. اونلارین گؤرمک اوچون گؤزلری وار، آمّا گؤرمورلر، اشئتمک اوچون قولاقلاری وار، آمّا اشئتمئرلر، چونکی اونلار عاصی بئر خالقدیر.
[3] سنه گلئنجه، ای بشر اوغلو، سن اسئرلئیه گتمک اوچون شیلرئنی حاضیرلا و اونلارین گؤزو قاباغیندا گوندوز چاغی کؤچ. اونلارین گؤزو قاباغیندا اسئرلئیه گِدن کئمی اؤز یِرئندن باشقا بئر یِره کؤچ. عاصی بئر خالق اولسالار دا، بلکه بونو باشا دوشدولر.
[4] اؤز شیلرئنی اسئرلئیه گتمک اوچون لازیم اولان شیلر کئمی اونلارین گؤزو قاباغیندا گوندوز چاغی چیخارت. اؤزون ده هامینین گؤزو قاباغیندا آخشام اوستو اسئرلئیه گتمه‌لی اولان بئری کئمی چیخ.
[5] اونلارین گؤزو قاباغیندا دوواردا دِشئک آچ و شیلرئنی اورادان چیخارت.
[6] هامینین گؤزو قاباغیندا شیلرئنی چئینئنده داشی و قارانلیقدا چیخارت. اوزونو ده اؤرت کی، اؤلکه‌نی گؤرمه‌یه‌سن، چونکی سنی ائسرایئل نسلئنه بئر علامت اتمئشم.»
[7] منه نجه امر اولونموشدو، اِله‌جه ده اتدئم. شیلرئمی اسئرلئیه گتمک اوچون لازیم اولان شیلر کئمی، گونون گوندوز چاغی چیخارتدیم و آخشام اوستو دوواری اؤز اَللرئمله دِشدئم. شیلرئمی قارانلیقدا چیخارتدیم و اونلارین گؤزو قاباغیندا چئینئمده داشیدیم.
[8] سحر منه ربّئن بو سؤزو نازئل اولدو:
[9] «ای بشر اوغلو، مگر ائسرایئل نسلی-او عاصی خالق سنه دِمه‌دی کی ”نه ادئرسن؟“
[10] سن اونلارا دِه: پروردئگار رب بله دیئر: ”بو ائخطار اورشلئمده اولان رهبر و اورادا یاشایان بوتون ائسرایئل نسلی اوچوندور.“
[11] سن بله دِه: ”من سئزئن اوچون علامتم. من نجه اتمئشم، اونلارا دا بله ادئله‌جک. اسئرلئیه و اسارته گده‌جکلر.
[12] آرالاریندا یاشایان رهبر شیلرئنی قارانلیقدا چئینئنده داشییاجاق و باییرا چیخاجاق. دوواری دِشه‌جکلر کی، اونو اورادان چیخارتسینلار. او، اوزونو اؤرته‌جک کی، اؤلکه‌نی گؤزلری ائله گؤرمه‌سئن.
[13] اونون اوستونه تور سَره‌جیم و منئم تله‌مه دوشه‌جک. اونو بابئله-کَلده اؤلکه‌سئنه گتئره‌جیم. آمّا گئنه ده اورانی گؤرمه‌یه‌جک، اورادا اؤله‌جک.
[14] اطرافینداکی‌لارین هامیسینی-کؤمکچئلرئنی و بوتون قوشونلارینی، اَسن هر کوله‌یئن اَلئنه ورئب سَپه‌جیم و اونلارین دالیسیجا قیلینج چکه‌جیم.
[15] من اونلاری مئلّتلر آراسینا یایاندا و اؤلکه‌لر آراسینا سَپه‌له‌ینده بئله‌جکلر کی، رب منم.
[16] آنجاق اونلاردان بئر آزینی قیلینجدان، آجلیقدان و وبادان صاغ بوراخاجاغام کی، اؤز ائیرنج ائشلرئنئن هامیسینی، آرالارینا گده‌جکلری مئلّتلره دانیشسینلار. او واخت بئله‌جکلر کی، رب منم.“»
[17] منه ربّئن بو سؤزو نازئل اولدو:
[18] «ای بشر اوغلو، چؤره‌یئنی تئتره‌یه‌رَک یِه، سویونو اَسه-اَسه، ائضطئرابلا ائچ.
[19] اؤلکه خالقینا دِه کی، ائسرایئل تورپاغیندا، اورشلئمده یاشایانلار اوچون پروردئگار رب بله دیئر: ”اونلار چؤرکلرئنی ائضطئرابلا یئیه‌جکلر، سولارینی دهشتله ائچه‌جکلر. بله‌جه اؤلکه‌لری، اورادا یاشایانلارین هامیسینین قدّارلیغیندان اؤتری بوللوقدان محروم اولاجاق.
[20] آدام یاشایان شهرلر وئران اولاجاق و اؤلکه خارابالیغا چِورئله‌جک. او واخت بئله‌جکسئنئز کی، رب منم.“»
[21] منه ربّئن بو سؤزو نازئل اولدو:
[22] «ای بشر اوغلو، ائسرایئل تورپاغیندا نه اوچون بو مثلی ائشله‌دئرسئنئز: ”گونلر کچئر، هر رؤیا پوچ اولور“؟
[23] بونا گؤره ده اونلارا دِه کی، پروردئگار رب بله دیئر: ”بو مثله آخیر قویاجاغام، آرتیق ائسرایئلده بو مثلی ائشلَتمیه‌جکلر. لاکئن اونلارا دِه کی، هر رؤیانین یرئنه یِته‌جیی گونلر یاخیندیر.
[24] داها بوندان سونرا ائسرایئل نسلئنئن آراسیندا هچ بئر بوش رؤیا و آلدادیجی فالچیلیق اولمایاجاق.
[25] چونکی رب منم؛ من سؤز دئیه‌جیم و نه سؤز دِسَم، یرئنه یِتئشه‌جک، آرتیق تأخئره دوشمه‌یه‌جک. لاکئن، ای عاصی خالق، بو سؤزو سئزئن گونلرئنئزده دئیه‌جیم و اونو یرئنه یتئره‌جیم.“ پروردئگار رب بویورور.»
[26] منه ربّئن بو سؤزو نازئل اولدو:
[27] «ای بشر اوغلو، ائسرایئل نسلی بله دیئر: ”اونا گلن رؤیا اوزون مودّت سونرا باش وره‌جک، او، اوزاق گله‌جک باره‌ده نبئلئک ادئر.“
[28] بونا گؤره ده اونلارا دِه کی، پروردئگار رب بله دیئر: ”هچ بئر سؤزومو تأخئره سالمایاجاغام، دِدئیئم سؤز یرئنه یِتئشه‌جک.“ پروردئگار رب بویورور.»