[1] اسئرلئیئمئزئن دوقّوزونجو ائلئنده، اونونجو آیین اونونجو گونو منه ربّئن بو سؤزو نازئل اولدو:
[2] «ای بشر اوغلو، بو گونون، همئن بو گونون تارئخئنی یاز. چونکی بابئل پادشاهی محض بو گون اورشلئمی موحاصئره‌یه آلیب.
[3] بو عاصی خالقا بئر مثل دا‌نیشیب دِه کی، پروردئگار رب بله دیئر: ”قازانی اودا قوی، اودا قوی، ائچئنه سو دا دولدور.
[4] اَتئن تئکه‌لرئنی، لاپ یاخشی تئکه‌لرئنی، بودو و دؤشو اورایا ییغ. اونو لاپ یاخشی سوموکلرله دولدور.
[5] سورودن لاپ یاخشی قویونلاری گؤتور، قازانین آلتینا دا اودون ییغ. قوی ائچئنده‌کی سو قایناسین کی، قازانداکی سوموکلر ده پئشسئن.“
[6] بله‌جه پروردئگار رب بله دیئر: ”قان تؤکَن شهرئن وای حالینا! او قازانا کی، پاسلانیب، و پاسی اوندان تمئزلَنمه‌یئب. پوشک آتمادان اَتی تئکه-تئکه قازاندان چیخاردین.
[7] چونکی اونون تؤکدویو قان حله ائچئنده‌دئر؛ اونو چیلپاق قایانین اوستونه قویدو، اونو یِره تؤکمه‌دی کی، توزلا اوستو اؤرتولسون.
[8] من ده قضبی آلوولاندیراراق قئصاص اوچون اونون قانینی چیلپاق بئر قایانین اوستونه تؤکموشم کی، اوستو اؤرتولمه‌سئن.“
[9] بونا گؤره ده پروردئگار رب بله دیئر: ”قان تؤکَن شهرئن وای حالینا! من ده اودون قالاغینی بؤیوده‌جیم.
[10] اودونلاری ییغ، اودو آلوولاندیر، اَتی یاخشی پئشئر، اَدوئیّاتینی قات، قوی سوموکلر یانسین.
[11] سونرا قازانی اونون کؤزلری اوستونه قوی کی، قیزسین، بورونجو قیزارسین، کثئفلئیی اونون ائچئنده اَرئسئن، پاسیندان تمئزله‌نسئن.
[12] مشقّتله اؤزونو طاقتدن سالیب، آمّا حله ده قالین پاسی اوندان تمئزلَنمه‌یئب. قوی پاسی اود ائچئنده قالسین!
[13] عئفّتسئزلئک سنئن کثئفلئیئنده‌دئر، چونکی سنی تمئزله‌مئش اولاردیم، آمّا سن حله ده کثئفلئیئندن تمئز دیئلسن. سنئن باشینا قضبئمی تؤکمه‌ینه قدر اؤز کثئفلئیئندن تمئزلَنمیه‌جکسن.
[14] من، رب، بونو دِمئشم؛ او واخت گلئر و من بونا عمل اده‌جیم. چکئنمیه‌جیم، آجیمایاجاغام، پِشمان اولمایاجاغام؛ یوللارینا و عمل‌لرئنه گؤره سنی موحاکئمه اده‌جیم.“ پروردئگار رب بله دیئر.»
[15] منه ربّئن بو سؤزو نازئل اولدو:
[16] «ای بشر اوغلو، باخ، گؤزونده چوخ دَیَرلی اولان بئر نفری بئر ضربه ائله اَلئندن آلاجاغام. آمّا سن یاس توتمایاجاقسان، آغلامایاجاقسان، گؤز یاشی دا تؤکمه‌یه‌جکسن.
[17] سَس‌سئز ناله چک؛ اؤلولر اوچون یاس توتما. عمّامه‌نی باشینا قوی، چاریغینی دا آیاغینا گِی. اوزونون بوغونو اؤرتمه، یاس توتانلارین چؤره‌یئنی ده یِمه.»
[18] من سحر خالقا بو سؤزلری ددئم. آخشام‌اوستو آروادیم اؤلدو. او گونون صاباحی، سحر منه امر اولونانی یرئنه یتئردئم.
[19] خالق منه ددی: «اتدئیئن بو شیلرئن بئزه نه دخلی وار؟ بئزه بئلدئرمَزسن؟»
[20] او واخت اونلارا ددئم: «منه ربّئن بو سؤزو نازئل اولدو:
[21] ائسرایئل نسلئنه دِه کی، پروردئگار رب بله دیئر: ”باخ، قووّتئنئزئن فخرئنه، گؤزونوزده لاپ عزئز اولان شیه، اوره‌یئنئزئن آرزوسو اولان موقدّس مکانیمین نجئسلَنمه‌سئنه ائجازه وره‌جیم. آرخادا قویدوغونوز اوغوللارینیز و قیزلارینیز قیلینجدان کچئرئله‌جکلر.
[22] من نه اتدئم، سئز ده اِله اده‌جکسئنئز؛ اوزونوزون بوغونو اؤرتمیه‌جکسئنئز، یاس توتانلارین چؤره‌یئنی یِمیه‌جکسئنئز.
[23] عمّامه‌لرئنئز باشینیزدا، چاریغینیز آیاغینیزدا اولاجاق. یاس توتمایاجاقسینیز، آغلامایاجاقسینیز، آنجاق تقصئرلرئنئزئن ائچئنده کوفسه‌یئب یوخ اولاجاقسینیز، باش-باشا ورئب ناله چکه‌جکسئنئز.
[24] حِزِقیال سئزه بئر علامت اولاجاق: او نه اده‌جک، سئز ده اونو اده‌جکسئنئز؛ بو حادئثه‌لر باش ورنده بئله‌جکسئنئز کی، پروردئگار رب منم.“
[25] سن، ای بشر اوغلو، قالالارینی، شادلیق و عئزّتلرئنی، گؤزلرئندن عزئز اولان شیی، اورَکلرئنئن آرزوسونو، اوغوللاری ائله قیزلارینی اونلاردان آلدیغیم واخت -
[26] او گون فلاکتدن قاچیب قورتولان آدام مگر سنه بو خبری بئلدئرمیه‌جک؟
[27] او گون بو قاچاغین یانیندا دئلئن آچیلاجاق، دانیشاجاقسان و آرتیق دئلسئز قالمایاجاقسان. بله‌جه اونلار اوچون بئر علامت اولاجاقسان. اونلار دا بئله‌جکلر کی، رب منم.»