[1] او واخت باش کاهئن ددی: «بو شیلر دوزدور؟»
[2] استئفان ددی: «منه قولاق آسین، ای قارداشلار و آتالار! جلال تاریسی آتامیز ائبراهئمه حاراندا ساکئن اولمادان، حله بین‌اَلنهرِینده یاشایارکن، گؤروندو.
[3] و اونا ددی: ”وئلایتئندن و قوحوملارینین یانیندان چیخ و سنه گؤرسده‌جه‌یئم یره گت.“
[4] او زامان ائبراهئم کلدانئلرئن وئلایتئندن چیخیب، حاراندا ساکئن اولدو. و آتاسی اؤلندن سونرا، تاری اونو ائندی یاشادیغینیز بو اؤلکه‌یه کؤچورتدو.
[5] و اورادا اونا بئر آیاق قویماق یری بله مئراث ورمه‌دی. لاکئن گئنه ده، حله اوشاغی یوخ ائکن، وعده وردی کی، اورانی اونا و اوندان سونراکی نسلئنه مولک وره‌جک.
[6] لاکئن تاری بله ده ددی کی، سنئن نسلئن اؤزگه بئر اؤلکه‌ده قرئب اولاجاق و دؤرد یوز ائل اونلاری قول ادئب، اونلارا جفا چکدئره‌جکلر.
[7] تاری ددی: ”و من اؤزوم، اونلاری اسارته چکن مئلّته حؤکم اده‌جه‌یم و اوندان سونرا اورادان چیخیب بو یرده منه خئدمت اده‌جکلر.“
[8] و اونا ختنه عهدئنی وردی و بله‌جه ائبراهئم ائسحاقین آتاسی اولوب، سکّئزئنجی گونده اونو ختنه اتدی. ائسحاق دا یعقوبون، یعقوب دا اون‌ائکی بؤیوک اجدادلارین آتاسی اولدو.
[9] و اجدادلار یوسئفه پاخیلّیق ادئب اونو مئصئره ساتدیلار. آمّا تاری اونونلا ائدی.
[10] و اونو بوتون فلاکتلرئندن خئلاص ادئب، مئصئر پادشاهی فئرعونون نظرئنده اونا لوطف و حئکمت عطا اتدی. فئرعون دا اونو مئصئرئن و بوتون اِو اهلئنئن اوستونه ریئس تعیئن اتدی.
[11] سونرا بوتون مئصئر و کَنَعان اؤلکه‌سئنه آجلیق و بؤیوک فلاکت گلدی و آتالاریمیز یمک تاپا بئلمئردئلر.
[12] لاکئن یعقوب مئصئرده غلّه اولدوغونو اشئدن واخت، آتالاریمیزی ائلک دفه اورایا گؤندَ‌ردی.
[13] ائکئنجی دفه اونلار گلنده، یوسئف قارداشلارینا اؤزونو تانیتدی و یوسئفئن نَسَبی فئرعونا بلّی اولدو.
[14] و یوسئف گؤندَ‌رئب آتاسی یعقوبو و بوتون قوحوم-اَقرباسینی، یتمئش بش آدامی دعوت اتدی.
[15] یعقوب دا مئصئره کؤچدو و اورادا او و آتالاریمیز اؤلدولر.
[16] و شِکِمه گتئرئلئب او مقبره‌یه قویولدولار کی، ائبراهئم اونو شِکِمده، خمورون اوغوللاریندان پوللا ساتین آلمیشدی.
[17] آمّا تارینین ائبراهئمه وردئیی وعده‌نئن واختی یاخینلاشان حالدا، خالق مئصئرده آرتدی و چوخالدی.
[18] او واختا قدر کی، مئصئر تختئنه یوسئفی تانیمایان آیری بئر پادشاه چیخدی.
[19] بو پادشاه ائدی کی، خالقیمیزا حئیله قوروب آتالاریمیزا جفا چکدئردی، اله کی، کؤرپه اوشاقلارینی چؤله آتسینلار و حیاتلاری داوام اتمه‌سئن.
[20] همئن بو زاماندا موسا آنادان اولدو؛ و تارینین نظرئنده چوخ جاناسئنَن ائدی. موسا اوچ آی آتاسی اِوئنده بؤیودولدو.
[21] و چؤله آتیلاندان سونرا، فئرعونون قیزی اونو گؤتوروب اؤز اوغلو کئمی بؤیوتدو.
[22] موسا مئصئرلی‌لرئن بوتون علمئنده تربئیه تاپدی، سؤزده و عمللرئنده قودرتلی ائدی.
[23] لاکئن قیرخ یاشینا یتئشنده اوره‌یئنه دوشدو کی، قارداشلاری اولان ائسرایئل اوغوللارینا باش چکسئن.
[24] و بئرئسئنه حاقسیزلیق اِدئلدئیئنی گؤرن واخت، اونون کؤمه‌یئنه چیخدی و حاقسیزلیق ادن مئصئرلئنی ووروب، مظلومون قئصاصینی آلدی.
[25] او اله دوشونوردو کی، قارداشلاری آنلایاجاقلار کی، تاری اونون اَلی ائله اونلارا نئجات ورمک ائسته‌یئر. آمّا اونلار باشا دوشمه‌دئلر.
[26] او گونون صاباحی، بعضئلری بئربئری ائله ساواشان زامان، اونلارا یاخینلاشدی و اونلاری باریشدیرماغا چالیشیب، دیئردی: ”کئشئلر، سئز قارداشسینیز. نه اوچون بئربئرئنئزی ائنجئدئرسئنئز؟“
[27] لاکئن قونشوسونو ائنجئدن آدام، اونو ائته‌له‌یئب ددی: ”کئم سنی بئزئم اوستوموزه ریئس و حاکئم اتدی؟
[28] دونَن مئصئرلئنی اؤلدوردویون کئمی، منی ده اؤلدورمک ائسته‌یئرسن؟“
[29] بو سؤزلر اوزوندن موسا قاچدی و مئدیان اؤلکه‌سئنده قرئب اولوب، اورادا اونا ائکی اوغول دوغولدو.
[30] و قیرخ ائل کچندن سونرا، سئنا داغینین چؤلونده، بئر ملک، یانان بئر بوتانین آلوووندا اونا گؤروندو.
[31] موسا بو منظره‌نی گؤرَ‌نده حیرتدن مات قالدی. باخماق اوچون یاخینلاشدیغی زامان، ربّئن سسی گلدی:
[32] ”من سنئن آتالارینین تاریسی‌یام؛ ائبراهئمئن، ائسحاقین و یعقوبون تاریسی.“ موسا قورخودان تئتره‌یئب اورایا باخماغا جورعت اتمه‌دی.
[33] رب اونا ددی: ”آیاقلاریندان چاریقلاری چیخارت، چونکی دوردوغون یر موقدّسدئر.
[34] دوغرودان دا کی، من مئصئرده اولان خالقیمین چکدئیی جفاسینی گؤرموشم و اونلارین ناله‌لرئنی اشئتمئشم و نازئل اولموشام کی، اونلاری خئلاص ادئم. ائندی گل، من سنی مئصئره گؤندَ‌ره‌جه‌یم.“
[35] همئن بو موسا کی، اونلار ردّ ادئب دیئردئلر ”کئم سنی بئزه ریئس و حاکئم تعیئن اتدی“، اله اودور کی، تاری، یانان بوتانین ائچئنده، اونا گؤرونن مله‌یئن واسئطه‌سی‌ائله، اونو هم ریئس، هم ده قورتاریجی گؤندَ‌ردی.
[36] بو کئشی مئصئر اؤلکه‌سئنده، قیرمیزی دهنزده و قیرخ ائل چؤلده مؤجوزه‌لر و علامتلر گؤرسدمکله اونلاری خئلاص اتدی.
[37] بو همئن موسا ائدی کی، ائسرایئل اوغوللارینا ددی: ”تاری سئزه قارداشلارینیزدان منئم کئمی بئر پیغمبر قالدیراجاق.“
[38] بو اودور کی، چؤلده‌کی جاماعات ائچئنده، آتالاریمیزلا و سئنا داغیندا اونونلا دانیشان ملکله ائدی و حیات ورن احکامی آلدی کی، بئزه ورسئن.
[39] و آتالاریمیز ائسته‌مئردئلر کی، اوندان ائطاعت اتسئنلر. لاکئن اونو ردّ ادئب اورَکلرئنده مئصئره دؤندولر.
[40] و هارونا ددئلر: ”بئزه آللاهلار دوزَلت کی، قاباغیمیزدا گتسئنلر. چونکی بئلمئرئک کی، بئزی مئصئردن چیخاردان بو موسانین باشینا نه گلئب.“
[41] او گونلرده بئر دانا دوزَلتدئلر و بو بوته قوربان تقدئم اتدئلر و اؤز اَللرئنئن ائشلرئندن شادلیق ادئردئلر.
[42] آمّا تاری اونلاردان اوز دؤندَردی و اونلاری بوراخدی کی، گؤیده‌کی جئسملره پرستئش اتسئنلر. نجه کی، پیغمبرلرئن کئتابیندا یازیلیب: ”ای ائسرایئل اِوی، قیرخ ائل چؤلده کسدئیئنئز و قوربان اتدئیئنئز حیوانلاری مگر منه تقدئم ادئردئنئز؟
[43] سئز مولوکون چادیرینی دا، رومفا بوتونون اولدوزونو دا اؤزونوزله گؤتوردونوز کی، اونلارا پرستئش اده‌سئنئز. من ده سئزی بابئلدن داها او یانا کؤچورده‌جه‌یم.“
[44] چؤلده آتالاریمیزین شهادت خیمه‌سی وار ائدی. نجه کی، موسایا دانیشیب هئدایت اتمئشدی کی، گؤردویو نومونه‌یه گؤره بئنا اتسئن.
[45] آتالاریمیز دا کی، او خیمه‌نی قبول اتمئشدئلر، یوشعله برابر قیری‌‌یهودئلرئن مولکونو ضبط ادنده اونو اورایا گتئردئلر؛ او مئلّتلری کی، تاری آتالاریمیزین قاباغیندان قوودو. خیمه داوودون زامانینا کئمی اورادا قالدی.
[46] داوود تارینین نظرئنده لوطف تاپیب درخواست اتدی کی، یعقوبون تاریسینا بئر مسکن تاپسین.
[47] لاکئن تارییا اِو تئکن سولیمان ائدی.
[48] آمّا حاق-تاعالا، اَل‌له تئکئلن اِوده ساکئن اولماز، نجه کی، پیغمبر ده دیئر:
[49] گؤی منئم تختئمدئر، یر ده آیاقلاریما کتئلدئر. رب دیئر؛ منه نه جور اِو دوزَلده‌جکسئنئز و یا منئم راحاتلیغیم اوچون نه یر وار؟
[50] مگر بوتون بونلاری یارادان، منئم اَلئم دیئل؟!
[51] ای بوینو یوغونلار، اورَک و قولاقلاریندا ختنه اولونمامیشلار! آتالاریمیز کئمی، سئز ده همئشه موقدّس روحا ضئدّ چیخیرسینیز.
[52] آتالارینیز پیغمبرلرئن هانسینی ائنجئتمه‌دئلر؟! اونلاری کی، او صالح اولانین گله‌جه‌یئنی قاباقجادان خبر ورئردئلر، اؤلدوردولر کی، سئز ده ائندی اونلارا خیانت ادنلر و اونلاری اؤلدورنلر اولوبسونوز.
[53] سئز کی، شرئعتی ملکلرئن ترتئب اتدئکلری کئمی آلدینیز، گئنه ده اونلاری رئعایت اتمه‌دئنئز.»
[54] اونلار، بونلاری اشئدن واخت، چوخ قضبلندئلر و اونون ضئدّئنه دئشلرئنی قیجیرتدیلار.
[55] لاکئن استئفان موقدّس روحلا دولوب گؤزلرئنی گؤیه دئکدی و تارینین شؤوکتئنی، و عئسانی تارینین صاغ طرفئنده دورموش گؤردو.
[56] و ددی: «باخین، گؤیلری آچیلمیش و ائنسان اوغلونو تارینین صاغیندا دورموش گؤرورم!»
[57] آمّا اونلار برکدن باغیریب، قولاقلارینی توتدولار و بئرلئکده اونا یوگوردولر.
[58] اونو شهردن قیراغا چیخاردیب، داشلادیلار و شاهئدلر پالتارلارینی شاعول آدلی بئر جاوانین آیاقلاری یانینا قویدولار.
[59] و استئفانی داشلادیلار. استئفان دوعا ادئردی: «یارب عئسا، روحومو قبول ات!»
[60] و دئزلرئنه دوشوب اوجا سَسله باغیردی: «یارب، بو گوناهی اونلارین بوینونا قویما!» و بونو دیئب، گؤزونو بو حیاتا یومدو.