[1] یهودئیه وئلایتئنده اولان حوارئلر و قارداشلار اشئتدئلر کی، قیری‌‌یهودئلر ده تارینین کلامینی قبول ادئبلر.
[2] و پطروس اورشلئمه گلنده، ختنه اولونانلار اوندان ائراد توتدولار،
[3] و دیئردئلر: «سن ختنه اولونمایان آداملارین یانینا گتدئن و اونلارلا یمک یدئن.»
[4] پطروس دا باشلاییب ترتئبله اونلارا نقل اتدی و ددی:
[5] «من یافا شهرئنده دوعا ادئردئم. هوشدان گتدئیئم حالدا بئر رؤیا گؤردوم؛ دؤرد گوشه‌سئندن آسیلمیش بؤیوک ملفه‌یه بنزه‌ر بئر جئسئم گؤیدن اندئرئلدی و یانیما قدر گلدی.
[6] اونون ائچئنه گؤزومو دئکئب دئقّتله باخیردیم و یرئن دؤرد آیاقلی حیوانلارینی، وحشی حیوانلارینی، سوروننلری و گؤی قوشلارینی گؤردوم.
[7] بئر سس ده اشئتدئم کی، منه دیئردی: ”قالخ پطروس، کس و یه.“
[8] آمّا من ددئم: ”اصلا، یارب، چونکی نجئس یا دا ناپاک بئر شی آغزیما اصلا گئرمه‌یئب.“
[9] سس ائکئنجی دفه گؤیدن منه خئطاب اتدی: ”تارینین پاک اتدئیئنی سن آرتیق نجئس سایما.“
[10] و بو اوچ دفه تکرار اولدو و هر شی گئنه گؤیه چکئلدی.
[11] و باخ، او آندا قیصرئیّه‌دن منئم یانیما گؤندَ‌رئلن اوچ آدام، قالدیغیم اِوئن قاباغیندا دوردولار.
[12] موقدّس روح منه ددی کی، هچ تردّود اتمه‌دن اونلارلا گدئم. بو آلتی قارداش دا منئمله گتدئلر و او آدامین اِوئنه گئردئک.
[13] او دا بئزه نقل اتدی کی، نجه اِوئنده دوران مله‌یی گؤردو کی، اونا دیئر: ”یافایا آدام گؤندَر و پطروس چاغیریلان شمعونو بورایا گتئرت.
[14] او سنه سؤزلر دانیشار کی، اونلارلا سن نئجات تاپارسان؛ هم سن، و هم سنئن بوتون اِو اهلئن.“
[15] و من دانیشماغا باشلایاندا، موقدّس روح اونلارین اوستونه نازئل اولدو، نجه کی، باشلانیشدا بئزه اولموشدو.
[16] و ربّئن سؤزونو خاطیرلادیم کی، نجه دئیردی: ”یحیا سو ائله تعمئد وردی، لاکئن سئز موقدّس روحلا تعمئد اولوناجاقسینیز.“
[17] ائندی اگر تاری اونلارا دا همن عطانی وردی کی، بئزه ده رب عئسا مسئحه ائمان گتئردئیئمئز زامان عطا اتمئشدی، من کئمم کی، تارییا مانع اولا بئلم؟!»
[18] اونلار بو سؤزلری اشئدندن سونرا، ساکئت اولدولار و تارینی عئزّتلندئرئب دیئردئلر: «بله اولسا، تاری قیری‌‌یهودئلره ده حیات گتئرن تؤوبه‌نی عطا ادئب.»
[19] بله‌جه، استئفانین اؤلوموندن سونرا باشلانان اذئیّتلر سببئندن، داغیلمیش اولانلار فئنئقئیه، قئبرئس و انطاکئیه‌یه قدر گدئب تارینین کلامینی یهودئلردن باشقا هچ کسه دمه‌دئلر.
[20] آمّا اونلارین ائچئنده قئبرئس و کرِنِیلی اولان بعضئلر وار ائدی کی، انطاکئیه‌یه گلئب یونانئلرله ده دانیشدیلار و رب عئسانی اونلارا وعظ اتدئلر.
[21] و ربّئن اَلی اونلارلا ائدی و چوخ آدام ائمان گتئرئب ربّه دؤندولر.
[22] اونلارین حاقّیندا اولان خبر اورشلئمده‌کی کئلئسانین قولاغینا چاتدی. اونلار دا بارنابانی انطاکئیه‌یه گؤندَردئلر.
[23] بارنابا دا گلدی و تارینین فیضئنه شاهئد اولان زامان سوئندی و هامینی تشوئق اتدی کی، ربّه اورَکدن باغلی اولوب صادئق قالسینلار؛
[24] چونکی او، یاخشی بئر آدام، و موقدّس روح و ائمانلا دولو ائدی و چوخ آدام ربّه گتئرئلدی.
[25] و بارنابا شاعولو آختارماق اوچون طرسوسا گتدی؛
[26] و تاپدیغی زامان اونو انطاکئیه‌یه گتئردی. و بئر ائل تامام کئلئسا ائله قالیب چوخ آداما تعلئم وردئلر و شاگئردلر ائلک دفه انطاکئیه‌ده مسئحی چاغیریلدیلار.
[27] او گونلرده اورشلئمدن انطاکئیه‌یه پیغمبرلر گلدئلر.
[28] و اونلاردان آقابوس آدلی بئری دوروب موقدّس روحون واسئطه‌‌سی‌ائله بئلدئردی کی، بوتون روم دونیاسینا بؤیوک بئر قحطی گله‌جک. و بو کلودئیوسون دؤورانیندا باش وردی.
[29] و شاگئردلر قرار وردئلر کی، هر بئری گوجو چاتدیغینا قدر، یهودئیه‌ده یاشایان قارداشلارینا کؤمک گؤندَ‌رسئنلر.
[30] و بونا عمل ادئب، کؤمه‌یی بارنابا و شاعولون اَلی ائله آغساقّاللارا گؤندَردئلر.