[1] انطاکئیه‌ده اولان کئلئسادا بعضی پیغمبرلر و موعلّئملر وار ائدی؛ بارنابا، و نئگر چاغیریلان شمعون، کرِنِیلی لوکئیوس، تِترارخ هئرودون سود قارداشی ماناعِن، و شاعول.
[2] و او زامان کی، ربّه اونلار خئدمت ادئب، اوروج توتموشدولار، موقدّس روح ددی: «تعیئن اتدئیئم ائش اوچون بارنابا و شاعولو منه آییرین.»
[3] او زامان اوروج توتوب دوعا ادندن سونرا، اونلارین اوستونه اَللرئنی قویوب یولا سالدیلار.
[4] بله‌جه، اونلار موقدّس روح طرفئندن گؤندَ‌رئلن حالدا، سلوکئیه‌یه گتدئلر و اورادان گمی ائله قئبرئسه گلدئلر.
[5] سالامئسه چاتدیقلاری زامان، یهودئلرئن کنئسه‌لرئنده تارینین کلامینی وعظ اتمه‌یه باشلادیلار. یوحنّا دا اونلارا کؤمکچی ائدی.
[6] بوتون جزئره‌نی پافوسا قدر گزندن سونرا، باریشّوع آدلی یهودی بئر جادوگر و یالانچی پیغمبره راست گلدئلر کی،
[7] درّاکه‌لی بئر آدام اولان والی سرگئیوس پولوسون یانیندا ائدی. بو آدام بارنابا و شاعولو چاغیریب، تارینین کلامینی اشئتمک ائسته‌دی.
[8] آمّا جادوگر علئما (چونکی آدی بله ترجومه اولونور) اونلارا ضئدّ دوروب چالیشدی کی، والئنی ائماندان آزدیرسین.
[9] لاکئن شاعول کی، پولوس آدیندا دا تانینیردی، موقدّس روحلا دولو گؤزلرئنی اونا دئکئب،
[10] ددی: «ای سن، هر جور حئیله و حؤقّه‌بازلیقلا دولو آدام، سن ای ائبلئس اوغلو، سن ای بوتون صالحلئیئن دوشمنی، ربّئن دوز یوللارینی اَیری اِتمکدن اَل چکمه‌یه‌جکسن؟!
[11] ائندی باخ، ربّئن الی سنئن اوستونه گلئب؛ کور اولاجاقسان و موعیّن بئر واختا قدر گونشی گؤرمه‌یه‌جکسن!» او آندا اونون اوستونه بئر دومان و بئر قارانلیق دوشدو و اورا-بورا سورونوب، بئرئنی آختاریردی کی، الئندن توتوب آپارسین.
[12] او زامان والی، نه باش وردئیئنی گؤرَ‌نده، ربّئن تعلئمئنه مات قالیب ائمان گتئردی.
[13] پولوس و یولداشلاری دهنزه ووروب، پافوسدان پامفئلئیه‌نئن پِرجه شهرئنه گلدئلر. لاکئن یوحنّا اونلاردان آیریلیب اورشلئمه قاییتدی.
[14] اونلار پِرجه‌دن کچئب پئسئدئیه انطاکئیه‌سئنه گلدئلر و سبّت گونو کنئسه‌یه گدئب اوتوردولار.
[15] شرئعت و پیغمبرلردن اوخویاندان سونرا، کنئسه ریئسلری اونلارا خبر گؤندَ‌رئب ددئلر: «قارداشلار، اگر خالقا تشوئق اوچون سؤزونوز وار، دیئن.»
[16] او زامان پولوس قالخدی و اَلی ائله ائشاره ادئب ددی: «ای ائسرایئلئن کئشئلری، تاریدان قورخانلار، قولاق آسین!
[17] بو ائسرایئل خالقینین تاریسی آتالاریمیزی سچدی و مئصئر دئیاریندا قالان زامان اونلاری بؤیوک اتدی، و قالدیریلمیش بئر قوللا اونلاری اورادان چیخارتدی.
[18] و قیرخ ائله قدر چؤلده اونلاری دؤزدو.
[19] کَنَعان دئیاریندا یدّی مئلّتی هلاک ادندن سونرا، اونلارین اؤلکه‌لرئنی بؤلوب اونلارا مئراث وردی کی، بونلارین هامیسی دؤرد یوز الّی ائل عرضئنده باش وردی.
[20] و بونلاردان سونرا سمویئل پیغمبره قدر اونلارا داورلر وردی.
[21] سونرا پادشاه ائسته‌دئلر؛ تاری دا بنیامئن قبئله‌سئندن قئش اوغلو شاعول آدلی بئر کئشئنی قیرخ ائل اونلارا وردی.
[22] و اونو ردّ ادندن سونرا، داوودو اونلارا پادشاه تعیئن اتدی و اونون باره‌سئنده شهادت ورئب ددی: ”یسّه اوغلو داوودو اوره‌یئمه مووافئق بئر آدام تاپمیشام کی، بوتون ائسته‌دئیئمی یرئنه یتئره‌جک.“
[23] بو آدامین نسلئندن، تاری، وعده‌یه گؤره، ائسرایئله بئر قورتاریجی گتئرئب کی، عئسا اولسون.
[24] اونون گلمه‌سئندن قاباق، یحیا بوتون ائسرایئل خالقینا تؤوبه تعمئدئنی اعلان اتمئشدی.
[25] یحیا اؤز دؤورونو تاماملایارکن دیئردی؛ ”منی کئم ساییرسینیز؟ من او دیئلم. آمّا باخین، مندن سونرا بئری گلئر کی، اونون آیاقلارینین چاریغینی آچماغا بله لایئق دیئلم.“
[26] قارداشلار، ائبراهئم عایئله‌سئنئن اوغوللاری، و آرانیزدا اولان تاریدان قورخانلار! بو نئجات کلامی بئزه گؤندَ‌رئلئب.
[27] چونکی اورشلئمده ساکئن اولانلار و اونلارین ریئسلری نه اونو تانیدیلار، نه ده هر سبّت گونو اوخونان پیغمبرلرئن یازیلارینی کی، اونو محکوم اتمکله بونلاری یرئنه یتئردئلر.
[28] و اوندا اؤلومه لایئق بئر سبب تاپمادیقلاری حالدا، پئلاطدان ائسته‌دئلر کی، اونو اؤلدورسون.
[29] و اونون باره‌سئنده یازیلمیش اولان بوتون شیلری یرئنه یتئرئب، اونو چارمیخدان اِندئردئلر و قبئره قویدولار.
[30] لاکئن تاری اونو اؤلولردن دئرئلتدی.
[31] و او، چوخ گونلر عرضئنده اؤزونو اونونلا جلئلدن اورشلئمه گلنلره گؤرستدی، اله همئن او آداملارا کی، ائندی خالقین آراسیندا اونون شاهئدلری‌دئرلر.
[32] و بئز، آتالاریمیزا ورئلن وعده‌نئن خوش خبرئنی سئزه وعظ ادئرئک کی،
[33] بو وعده‌نی تاری، عئسانی دئرئلتمکده اونلارین اؤولادلاری اولان بئزلر اوچون یرئنه یتئردی. نجه کی، ائکئنجی مزموردا دا یازیلیب: ”سن منئم اوغلومسان، بو گون من سنی تؤولئد اتدئم.“
[34] بو حقئقت کی، تاری اونو اؤلولردن دئرئلتدی و اصلا چورومه‌یه قویمادی، بله دیئلئب: ”داوودون موقدّس و یقئن برکتلرئنی سئزه وره‌جه‌یم.“
[35] بونا گؤره آیری بئر یرده بونو دا دیئر: ”سن موقدّسئنی چورومه‌یه قویمایاجاقسان.“
[36] چونکی داوود اؤز نسلئنده تارینین آماجینا خئدمت ادئب، گؤزلرئنی حیاتا یومدو و آتالارینا قوشولوب چورومَکلئک گؤردو.
[37] لاکئن تارینین دئرئلتدئیی شخص چورومَکلئک گؤرمه‌دی.
[38] بله‌جه، ای قارداشلار، بئلئن کی، اونون واسئطه‌سی‌ائله گوناهلارین باغیشلانماسی سئزه اعلان اولونور
[39] و اونون سایه‌سئنده ائمان گتئرن هر کس هر شیدن آزاد اولونور، او شیلردن کی، موسانین شرئعتی‌ائله آزاد اولا بئلمئردئنئز.
[40] بونون اوچون دئقّت ادئن کی، پیغمبرلرئن کئتابلاریندا دیئلن سئزئن باشینیزا گلمه‌سئن:
[41] ”باخین، ای تحقئر ادنلر، حیرتدن مات قالین و محو اولون؛ چونکی سئزئن گونلرئنئزده من اِله بئر ائش گؤرورَم کی، اونو بئری سئزه بیان اتسه ده، ائنانمازسینیز.“»
[42] پولوس و بارنابا اشئیه چیخان واخت، اونلار اونا یالواریردیلار کی، گلن سبّت ده اونلارا بو سؤزلر دیئلسئن.
[43] و کنئسه‌دن داغیلاندا، یهودئلردن و یهود دئنئنه دؤنَنلردن چوخلاری پولوس و بارنابانین دالینجا گتدئلر؛ اونلار دا بو آداملارلا دانیشیب تشوئق ادئردئلر کی، تارینین فیضئنده ثابئت قالسینلار.
[44] گلن سبّت تخمئنَن بوتون شهر ییغیلدی کی، تارینین کلامینی اشئتسئن.
[45] آمّا یهودئلر، جاماعاتی گؤرنده، پاخیلّیقلا دولدولار و پولوسون ددئیی سؤزلره ضئدّ دانیشیب کوفر دیئردئلر.
[46] لاکئن پولوس و بارنابا جسارتله دانیشیب ددئلر: «لازیم ائدی کی، تارینین کلامی اوّلجه سئزه دیئلسئن. ائندی کی، سئز اونو ردّ ادئرسئنئز و ابدی حیاتا لایئق اولمادیغینیزا حؤکم ادئرسئنئز، باخین، بئز ده قیری‌یهودئلر طرفئنه دؤنوروک.
[47] چونکی رب بئزه بله امر ادئب: ”سنی قیری‌یهودئلر اوچون ائشیق قویدوم کی، نئجاتی یرئن او بئری باشینا قدر گتئره‌سن.“»
[48] قیری‌یهودئلر بو سؤزو اشئدن واخت سوئندئلر و شادلیق ادئب تارینین کلامینی عئزّتلندئرئردئلر؛ و ابدی حیاتا تعیئن اولونانلارین هامیسی ائمان گتئردئلر.
[49] و ربّئن کلامی بوتون او دئیاردا یاییلیردی.
[50] آمّا یهودئلر مؤعتبر دئندار آروادلاری و شهرئن نوفوذلو آداملارینی قالدیریب فئتنه یاراتدیلار کی، پولوس و بارنابایا اذئیّت یتئرسئنلر. و اونلاری اؤز دئیارلاریندان قوودولار.
[51] لاکئن پولوس و بارنابا آیاقلارینین توزونو اونلارین ضئدّئنه سئلکئب، ائقونئیه‌یه گتدئلر.
[52] و شاگئردلر دائم شادلیق و موقدّس روحلا دولوردولار.