[1] و اِله اولدو کی، ائقونئیه‌ده پولوس و بارنابا بئرلئکده یهودئلرئن کنئسه‌لرئنه گئردئلر و اِله دانیشدیلار کی، هم یهودئلردن، هم ده قیری‌یهودئلردن بئر بؤیوک خالق ائمان گتئردی.
[2] آمّا ائمان گتئرمه‌ین یهودئلر قیری‌یهودئلری قیزیشدیریب، ذهئنلرئنی قارداشلارین ضئدّئنه بولاندیردیلار.
[3] بله‌جه پولوس و بارنابا اورادا اوزون بئر مودّت قالیب، ربّئن حاقّیندا جسارتله دانیشیردیلار. رب ده اؤز فیضئنئن کلامینا شهادت ورئب، اونلارین اَلی ائله علامتلر و عجایئبلر یارادیردی.
[4] لاکئن شهرئن خالقی ائکی یره بؤلوندو؛ بعضئلری یهودئلرئن طرفئنی توتموشدو، بعضئلری ده حوارئلرئن.
[5] او زامان کی، قیری‌‌یهودئلر و یهودئلر، ریئسلری ائله بئرلئکده بئر سوئی‌‌‌قصد حاضیرلادیلار کی، اونلاری روسوای ادئب داشلاسینلار،
[6] اونلار بوندان خبردار اولوب، لئکایونیانین لئستره و دِربه شهرلرئنه و اطرافلارینا قاچدیلار.
[7] و اورادا ائنجئلئن خوش خبرئنی وعظ اتمه‌یه داوام وردئلر.
[8] لئستره‌ده آیاقلاری چولاق بئر آدام اوتورموشدو؛ آنادان شل دوغولموشدو و هچ یرئمه‌مئشدی.
[9] بو آدام پولوسون دانیشدیغینا قولاق آسیردی. پولوس دا اونا گؤز دئکئب صاغالماغی اوچون ائمانی اولدوغونو گؤرنده،
[10] اوجا سَسله اونا ددی: «آیاقلارین اوستونده دوز دایان!» او دا یردن آتیلیب یرئمه‌یه باشلادی.
[11] پولوسون نه اتدئیئنی گؤرَن خالق، سَسئنی اوجالدیب لئکایونیا دئلئنده دیئردئلر: «آللاهلار ائنسانلار شکلئنه دؤنوب آرامیزا اِنئبلر.»
[12] و بارنابانی زِعوس، پولوسو دا باش ناطئق اولدوغو اوچون هِرمِس چاغیریردیلار.
[13] شهرئن اِشئیئنده اولان زِعوس معبدئنئن کاهئنی ده شهرئن دروازاسینین یانینا اؤکوزلر و گولدسته‌لر گتئردی و ائسته‌یئردی کی، خالقلا بئرلئکده قوربان کسسئن.
[14] لاکئن حوارئلر، بارنابا و پولوس، بونو اشئدن واخت، پالتارلارینی ییرتیب، خالقین اورتاسینا آتیلدیلار و قیشقیریب
[15] ددئلر: «کئشئلر! بونلاری نئیه ادئرسئنئز؟ بئز ده سئزئن طبئعتئنئزه بنزه‌ین ائنسانلاریق. و سئزه ائنجئلئن خوش خبرئنی وعظ اتدئک کی، سئز بو باطئل شیلردن دئری تاری طرفئنه دؤنه‌‌سئنئز؛ او تاری کی، گؤیو، یری، دهنزی، و اونلارین ائچئنده‌کی هر شیی یاراتدی.
[16] او، کچمئش نسئللرده بوتون مئلّتلره ائجازه ورمئشدی کی، اؤز یوللاری ائله گتسئنلر.
[17] آمّا گئنه ده اؤزونو شهادتسئز بوراخمادی. یاخشیلیق اتدی و گؤیدن سئزه یاغیش و ثمره‌لی مؤوسوملر ورئب اورَکلرئنئزی یمک و شادلیقلا دویوردو.»
[18] و حتّا بو شیلری دئیندن سونرا دا، گوجله خالقی اونلارا قوربان تقدئم اتمکدن اَل چکدئردئلر.
[19] لاکئن یهودئلر انطاکئیه و ائقونئیه‌دن گلئب خالقی قیزیشدیردیلار. اونلار دا پولوسو داشا باسیب، شهردن اشئیه سورودولر و اونو اؤلموش گومان اتدئلر.
[20] آمّا او زامان کی، شاگئردلر اونون اطرافینا ییغیلمیشدیلار، او دوردو و شهره گئردی. و صاباحی گون بارنابا ائله دِربه‌یه گتدئلر.
[21] و ائنجئلئن خوش خبرئنی او شهره وعظ ادئب بئر چوخ آدامی شاگئرد ادندن سونرا، لئستره‌یه، ائقونئیه‌یه و انطاکئیه‌یه قاییتدیلار.
[22] و شاگئردلرئن جانلارینی قووّتلندئرئب اونلاری تشوئق ادئردئلر کی، ائماندا مؤحکم دایانسینلار و دیئردئلر کی، «بئز تارینین پادشاهلیغینا چوخ اذئیّتلرله گئرمه‌لی‌یئک.»
[23] و هر کئلئسادا اونلار اوچون آغساقّاللار تعیئن اتدئلر و اوروج آغیزلا دوعا ادئب اونلاری ائمان گتئردئکلری ربّه تاپشیردیلار.
[24] و پئسئدئیه‌دن کچئب پامفئلئیه‌یه گلدئلر.
[25] و پِرجه‌ده کلامی دانیشاندان سونرا آتالیایا گتدئلر.
[26] و گمی ائله اورادان انطاکئیه‌یه قاییتدیلار، او یره کی، یرئنه یتئردئکلری ائش اوچون اورادا تارینین فیضئنه تاپشیریلمیشدیلار.
[27] اورایا یتئشئب کئلئسانی بئر یره ییغدیقلاری زامان، اونلارا نقل اتدئلر کی، تاری اونلارین واسئطه‌سی‌ائله نه‌لر اتدی و نجه ائمان قاپیسینی قیری‌یهودئلرئن اوزونه آچدی.
[28] و شاگئردلرله بئرلئکده اوزون زامان اورادا قالدیلار.