[1] اَپولّوس قورئنتده ائکن، پولوس یوخاری اؤلکه‌لری کچئب اِفِسوسا گلدی و بئر نچه شاگئرد تاپدی.
[2] و اونلارا ددی: «آیا ائمان گتئردئیئنئز زامان موقدّس روحو آلدینیز؟» اونلار اونا ددئلر: «خیر، موقدّس روحون اولدوغونو بله اشئتمه‌مئشئک!»
[3] پولوس ددی: «بس نه‌یه اساسن تعمئد اولوندونوز؟» ددئلر: «یحیانین تعمئدئنه.»
[4] پولوس ددی: «یحیا تؤوبه تعمئدی ائله تعمئد ورئب خالقا دیئردی کی، اؤزوندن سونرا گلنه ائمان گتئرسئنلر، یعنی عئسایا.»
[5] بونو اشئدن واخت، اونلار رب عئسانین آدیندا تعمئد آلدیلار.
[6] و پولوس اَللرئنی اونلارین اوستونه قویاندا، موقدّس روح اونلارین اوستونه نازئل اولدو و قرئب دئللر‌له دانیشماغا و نبئلئک اتمه‌یه باشلادیلار.
[7] اونلار تخمئنَن اون‌ائکی کئشی ائدئلر.
[8] پولوس کنئسه‌یه گئرئب، اوچ آی جسارتله دانیشیردی و تارینین پادشاهلیغی حاقّیندا موباحئثه ادئب، اونلاری قانع ادئردی.
[9] آمّا او زامان کی، بعضئلری داش اورَکلی و ناموطئع اولوب جاماعاتین حوضوروندا طرئقتی پئسله‌دئلر، پولوس دا اونلاری ترک اتدی و شاگئردلری آییریب تئرانوس مکتبئنده هر گون موباحئثه ادئردی.
[10] بو، ائکی ائل داوام اتدی و آسئیا ایالتئنده یاشایانلارین هامیسی، هم یهودی، هم ده یونانی، ربّئن کلامینی اشئتدئلر.
[11] تاری پولوسون اَللری ائله عجایئب مؤجوزه‌لر یارادیردی.
[12] اله کی، حتّا اونون بدنئندن دستماللار و یا بِل‌باغی‌لار گؤتورولوب، ناخوشلارین اوستونه قویولوردو و ناخوشلوق اونلاردان گدئردی، پئس روحلار دا چیخیردی.
[13] لاکئن بعضی یهودی اووسونچولار دا وار ائدی کی، اورایا-بورایا گدئب چالیشیردیلار کی، پئس روحلارا توتولموش آداملارین اوستونه رب عئسانین آدینی اوخوسونلار و دیئردئلر: «پولوسون وعظ اتدئیی عئسانین آدی ائله سئزه امر ادئرئک.»
[14] بونو ادنلر اِسکئوا آدلی بئر یهودی باش کاهئنئن یدّی اوغوللاری ائدئلر.
[15] لاکئن پئس روح اونلارا جاواب ورئب ددی: «عئسانی تانی‌ییرام، پولوس حاقّیندا دا بئلئرم. لاکئن سئز کئمسئنئز؟»
[16] و ائچئنده پئس روح اولان آدام، اونلارین اوستونه یوگوردو و اونلارین هامیسینی توتوب باسدی، اِله کی، اونلار لوت و یارالی او اِودن قاچدیلار.
[17] بو حادئثه اِفِسوسدا یاشایان بوتون یهودئلره و یونانئلره معلوم اولدو و هامینی قورخو بورودو و رب عئسانین آدی موعظّم اولدو.
[18] ائمان گتئرنلردن بئر چوخو دا گلئردئلر و اعتئراف ادئب، عمللرئنی نقل ادئردئلر.
[19] جادوگرلئک ادنلردن بئر چوخو کئتابلارینی بئر یرده گتئرئب، هامینین گؤزو قاباغیندا یاندیردیلار. کئتابلارین دَیَرئنی حسابلاییب گؤردولر کی، اونلارین دَیَری الّی‌مئن دئرهم اولور.
[20] بله‌جه ربّئن کلامی قودرتله یاییلیب، نوفوذ قازانیردی.
[21] بو شیلر باش ورندن سونرا، پولوس موقدّس روحدا قرار وردی کی، مقدونئیّه و اَخایئه‌دن کچئب، اورشلئمه گتسئن. و دیئردی: «اورادا اولدوقدان سونرا، رومو دا گرک گؤروم.»
[22] و اونا خئدمت ادنلردن ائکئسئنی یعنی تئموتاعوس و اِراستوسو مقدونئیّه‌یه گؤندَ‌رئب، اؤزو بئر مودّت داها آسئیا ایالتئنده قالدی.
[23] او واختلاردا طرئقت اوزوندن بؤیوک بئر ائغتئشاش باش وردی.
[24] چونکی دئمئترئیوس آدلی بئر زرگر کی، آرتِمئس معبدئنئن تئمثاللارینی دوزَلدئردی و صنتکارلارا چوخ ائش گتئرئردی؛
[25] بونلاری و آیری بله صنتکارلاری ییغیب ددی: «جنابلار، بئلئرسئنئز کی، رئفاهیمیز بو صنته باغلی‌دیر.
[26] و گؤروب اشئدئرسئنئز کی، بو پولوس، نه‌ائنکی اِفِسوسدا، حتّا تقرئبن بوتون آسئیا ایالتئنده، بئر چوخ آدامی قانع ادئب و یولدان چیخاردیب. و ائنسان اَلی ائله دوزَ‌لَن تاریلارین اصلا تاریلار اولمادیغینی دیئر.
[27] و خطر آنجاق صنتئمئزئن اعتئباردان دوشمه‌سئنده دیئل، بوندادیر دا کی، بؤیوک ائلاهه آرتِمئسئن معبدی اهمئیّتدن دوشسون و بو ائلاهه‌نئن عظمتی کی، اونو بوتون آسئیا و دونیا پرستئش ادئر، یوخا چیخسین.»
[28] اونلار، بونو اشئدن زامان، چوخ قضبلندئلر و قیشقیریب دیئردئلر: «بؤیوکدور اِفِسوسلولارین آرتِمئسی!»
[29] و شهر ائغتئشاشلا دولدو و بئرلئکده تاماشا میدانینا طرف قاچیب، پولوسلا مقدونئیّه‌دن سفره چیخان یولداشلار غایوس و ارئسترخوسو یاخالادیلار.
[30] پولوس خالقین ائچئنه گئرمک ائسته‌ینده، شاگئردلر اونو قویمادیلار.
[31] آسئیا ایالتئنئن ریئسلرئندن بعضئلری ده اونون دوستلاری اولدوغوندان، اونا خبر گؤندَ‌رئب یالواردیلار کی، تاماشا میدانینا آیاق قویماسین.
[32] بو آرادا هره بئر شی باغیریردی؛ چونکی جاماعاتی ائغتئشاش بوروموشدو و اکثرئیّتی بئلمئردی کی، نه‌دن اؤتری ییغیلیبلار.
[33] یهودئلر ائسکندری ائره‌لی سوردوکلری اوچون، جاماعات ائچئندن بعضئلری حادئثه‌نی ائسکندره باغلادیلار. ائسکندر اَلی ائله ائشاره ادئب، ائسته‌یئردی کی، جاماعاتا مودافئعه نئطقی اتسئن.
[34] لاکئن اونون یهودی اولدوغونو بئلدئکده، هامی بئر سَسله ائکی ساعاتا یاخین باغیریردیلار: «بؤیوکدور اِفِسوسلولارین آرتِمئسی!»
[35] آمّا شهرئن کاتئبی خالقی ساکئت ادئب ددی: «اِفِسوسلولار! کئم بئلمئر کی، اِفِسوسلولارین شهری عظمتلی ائلاهه آرتِمئسئن و گؤیدن دوشموش تئمثالین موحافئظی‌دئر؟!
[36] ائندی کی، بونلاری هچ کس ائنکار اده‌بئلمز، سئز گرک ساکئت اولوب تله‌سئک بئر ائش گؤرمه‌یه‌سئنئز.
[37] چونکی سئز بو آداملاری بورایا گتئرئبسئنئز کی، نه معبدی قارت ادئبلر، نه ده ائلاهه‌مئزه کوفر دیئبلر.
[38] بله‌جه، اگر دئمئترئیوس و اونونلا اولان صنتکارلارین کئمسه‌دن شئکایتی وارسا، هم محکمه ائجلاسلاری وار، هم ده حاکئملر. قوی بئربئرئندن شئکایت اتسئنلر.
[39] لاکئن اگر اؤزگه بئر شی دالینجاسینیز، بو، قانونو ائجلاسدا حلّ اولونار.
[40] چونکی بو گونکو حادئثه اوزوندن بو خطرده‌یئک کی، ائغتئشاشین سببی اولمادیغی اوچون، قئیام ائتّئهامی بئزه باغلانسین و بو ییغیناقدان اؤتری جاواب ورمه‌یه قادئر اولمایاجاغیق.»
[41] و بونو دیئب، ائجلاسی داغیتدی.