[1] اله بو زاماندا هئرود پادشاه اَل قالدیردی کی، کئلئسایا عایید اولان بعضئلرئنی ائنجئتسئن.
[2] و یوحنّانین قارداشی یعقوبو قیلینجلا اؤلدورتدو.
[3] و یهودئلرئن بو ائشدن خوشلاندیغینی گؤرَ‌نده، داوام ورئب پطروسو دا توتدوردو. او واخت فطئر بایرامینین گونلری ائدی.
[4] هئرود پطروسو توتدوراندان سونرا، اونو زئندانا سالدی و دؤرد نفردن عئبارت دؤرد دسته عسگره تحوئل وردی کی، اونون کشئیئنی چکسئنلر و ائسته‌یئردی کی، پاسخا بایرامیندان سونرا اونو خالقین حوضورونا چیخارتسین.
[5] بله‌جه پطروس زئنداندا ساخلانیردی، لاکئن کئلئسا طرفئندن تارینین حوضورونا اونون اوچون دائم دوعا ادئلئردی.
[6] و اِله همئن گجه کی، هئرود اونو خالقین حوضورونا چیخارداجاق ائدی، پطروس ائکی زنجئرله باغلانمیش ائکی عسگرئن آراسیندا یاتیردی. کشئکچئلر ده قاپی آغزیندا زئندانین کشئیئنی چکئردئلر.
[7] قفلتن ربّئن بئر مله‌یی ظاهئر اولدو و حوجره‌نی بئر نور ائشیقلاندیردی. ملک پطروسون بؤیرونه ووروب اونو اویاتدی و ددی: «تز دور!» و زنجئرلر پطروسون اَللرئندن دوشدو.
[8] ملک اونا ددی: «قورشاغینی باغلا، باشماغینی دا گِی!» او دا بله اتدی. و ملک اونا ددی: «عبانی گِی و دالیمجا گل.»
[9] پطروس اشئیه چیخیب اونون دالینجا گتمه‌یه داوام وردی. بئلمئردی کی، مله‌یئن اتدئکلری دوغرودور. اله دوشونوردو کی، یوخو گؤرور.
[10] بئرئنجی و ائکئنجی کشئکچئنی کچندن سونرا، شهره چیخان دمئر قاپینین یانینا یتئشدئلر کی، اؤزو-اؤزوندن اونلارا آچیلدی. اونلار چیخیب بئر کوچه‌نی کچدئلر و بئر آندا ملک اوندان آیریلدی.
[11] پطروس اؤزونه گلدئیی واخت ددی: «ائندی دوغرودان بئلئرم کی، رب مله‌یئنی گؤندَ‌رئب، منی هئرودون اَلئندن و یهود خالقینین بوتون گؤزله‌دئکلرئندن قورتارسین.»
[12] بونو باشا دوشدویو زامان، مرقوس چاغیریلان یوحنّانین آناسی مریمئن اِوئنه گتدی. بئر چوخلاری اورادا ییغیلیب دوعا ادئردئلر.
[13] کوچه قاپینی دؤین واخت، رودا آدلی خئدمتچی بئر قیز جاواب ورمه‌یه گلدی.
[14] و پطروسون سسئنی تانییاندا، شادلیقدان قاپینی آچمادان ائچه‌ری قاچیب خبر وردی کی، پطروس قاپیدادیر.
[15] آمّا اونلار اونا ددئلر: «دلی اولوبسان!» لاکئن قیز تأکئد ادئردی کی، بله‌دئر. اونلار دا دیئردئلر: «بو اونون مله‌یی‌دئر.»
[16] آمّا پطروس دؤیمه‌یه داوام وردی و آچدیقلاری زامان، اونو گؤروب حیرته دوشدولر.
[17] لاکئن پطروس اونلارا الی ائله ائشاره اتدی کی، ساکئت اولسونلار. سونرا ربّئن اونو زئنداندان نجه چیخارتدیغینی اونلارا نقل ادئب ددی: «بونلاری یعقوب و قارداشلارا خبر ورئن.» و اورادان چیخیب آیری بئر یره گتدی.
[18] سحر آچیلاندا عسگرلر آراسیندا بؤیوک بئر ولوله وار ائدی کی، گؤره‌سن پطروسا نه اولدو.
[19] هئرود پطروسو آختاریب تاپمایاندا کشئکچئلری ائستئنطاق اتدی و امر وردی کی، اونلار اعدام اولونسونلار. اؤزو ده یهودئیه‌دن قیصرئیّه‌یه گدئب، اورادا قالیردی.
[20] هئرود صور و صئدون اهالئسئنه قضبلنمئشدی؛ اونلار دا سؤزو بئر اِدئب یانینا گلدئلر و پادشاهین فرّاشباشیسی بلاستوسو اؤز طرفلرئنه چکئب صولح ائسته‌یئردئلر، چونکی اونلارین مملکتی پادشاهین مملکتئندن ارزاق آلیردی.
[21] تعیئن اولونموش گونده، هئرود سلطنت پالتارینی گیئب، تخت اوستونده اَیلَشدی و اونلارا خئطاب اتمه‌یه باشلادی.
[22] و خالق قیشقیریردی: «بو ائنسان سسی یوخ، بئر آللاه سسی‌دئر!»
[23] او آندا ربّئن بئر مله‌یی هئرودو ووردو، چونکی عئزّتی تارییا ورمه‌دی و قوردلار طرفئندن ییئلئب جان وردی.
[24] لاکئن تارینین کلامی ووسعت آلیب یاییلیردی.
[25] بارنابا و شاعول خئدمتلرئنی یرئنه یتئرندن سونرا، مرقوس چاغیریلان یوحنّانی دا اؤزلری ائله گؤتوروب اورشلئمدن قاییتدیلار.