[1] ولوله ساکئت اولاندان سونرا، پولوس شاگئردلری چاغیردی و اونلاری تشوئق ادندن سونرا وئداعلاشیب، مقدونئیّه‌یه گتمه‌یه یولا دوشدو.
[2] و او دئیارلاردان کچئب ائمانلی‌لاری چوخلو تشوئق ادندن سونرا یونانئستانا گلدی.
[3] و اوچ آی اورادا قالدی و گمی ائله سورئیه‌یه گتمک قصدئنده اولاندا، یهودئلر اونون ضئدّئنه سوئی‌‌قصد حاضیرلادیلار. اونا گؤره ده قرار وردی کی، مقدونئیّه یولوندان قاییتسین.
[4] اونونلا پئرهوس اوغلو بئرئیه‌لی سوپاتِر، تسالونئکلی‌لردن اَرئسترخوس و سِکوندوس، دِربه‌لی غایوس و تئموتاعوس و آسئیالی تئخئکوس و تَروفئموس همراه اولدولار.
[5] لاکئن بونلار قاباقجا گدئب، بئزی تِروآسدا گؤزله‌یئردئلر.
[6] بئز ده فطئر بایرامینین گونلرئندن سونرا، فئلئپئدن گمی ائله یولا دوشدوک و بش گون عرضئنده تِروآسا، اونلارین یانینا چاتدیق و اورادا یدّی گون قالدیق.
[7] هفته‌نئن بئرئنجی گونونده، او زامان کی، چؤرک بؤلمک اوچون بئر یره ییغیلمیشدیق، پولوس صاباحی گون یولا دوشمک نئیّتئنده اولدوغوندان، اونلارا صؤحبت اتمه‌یه باشلادی و گجه یاریسینا قدر سؤزونو اوزاتدی.
[8] ییغیلدیغیمیز بالاخانادا چوخلو چیراق یانیردی.
[9] اوتئخوس آدلی بئر جاوان پنجره‌ده حرکتسئز اوتوروب، اونو آغیر یوخو باسمیشدی. پولوس سؤزونو اوزاتدیقجا، یوخو اوتئخوسا قالیب گلدی و اوچونجو مرتبه‌دن آشاغی ییخیلدی و یردن اؤلو گؤتورولدو.
[10] آمّا پولوس آشاغی انئب، اونون اوستونه دوشدو و اونو قوجاقلاییب ددی: «ناراحات اولمایین، چونکی اونون جانی ائچئنده‌دئر.»
[11] و گئنه یوخاری چیخدی و چؤرک بؤلوب یئیندن سونرا، سحره قدر اونلارلا صؤحبت اتدی و سونرا یولا دوشدو.
[12] اونلار جاوان اوغلانی دئری آپاردیلار و حدسئز تسلّی تاپمیشدیلار.
[13] لاکئن بئز قاباقجا گمئیه گدئب آسوسا طرف یولا دوشدوک کی، پولوسو اورادان گؤتورَک. چونکی بله قرار ورمئشدی کی، اؤزو پئیادا گتسئن.
[14] آسوسدا بئزه قوشولاندان سونرا، اونو گمئیه گؤتوروب، مئتئله‌نه‌یه گلدئک.
[15] اورادان گمی ائله یولا دوشوب صاباحیسی خئیوسون موقابئلئنه یتئشدئک. بئر گون سونرا ساموسدان کچئب صاباحیسی دا مئلئتوسا گلدئک.
[16] پولوس قصد اتمئشدی کی، گمی ائله اِفِسوسون یانیندان کچسئن. چونکی ائسته‌مئردی کی، آسئیا ایالتئنده واخت ائتئرمک مجبورئیّتئنده قالسین. پولوس تَله‌سئردی کی، اگر مومکون اولسا، پنطئکاست گونونده اورشلئمده اولسون.
[17] پولوس مئلئتوسدان اِفِسوسا آدام گؤندَ‌رئب، کئلئسانین آغساقّاللارینی یانینا چاغیرتدیردی.
[18] یانینا گلدئکلری زامان اونلارا ددی: «سئز اؤزونوز بئلئرسئنئز کی، آسئیا ایالتئنه آیاق قویدوغوم ائلک گوندن بری، سئزئنله بوتون واختی نجه کچئرتمئشم؛
[19] بوتون تواضؤع، گؤز یاشلاری، و یهودئلرئن سوئی‌‌قصدلری ائله باشیما گلن ائمتاحانلارلا ربّه خئدمت اتدئم.
[20] نجه سئزه فایدالی اولان هچ بئر شیی بیان اتمکدن چکئنمه‌دئم؛ ائستر آچیقجا تعلئم ورمک اولسون، ائستر اِودن اِوه.
[21] هم یهودئلره و هم یونانئلره جئدّی شهادت وردئم کی، تارییا تؤوبه اتسئنلر و ربّئمئز عئسا مسئحه ائمان گتئرسئنلر.
[22] ائندی، باخین، موقدّس روحدا باغلانیب اورشلئمه گدئرم و اورادا باشیما نه گله‌جه‌یئنی بئلمئرم.
[23] آنجاق هر شهرده موقدّس روح منه شهادت ورئر کی، منی زنجئرلر و موصئبتلر گؤزله‌یئر.
[24] لاکئن من حیاتیمی هچ بئر جهتدن اؤزومه عزئز توتمورام. یتر کی، دؤورومو باشا چاتدیریم و رب عئسادان آلدیغیم خئدمتی، یعنی تاری فیضئنئن خوش خبرئنی جئدّی بئر شکئلده شهادت ورئم.
[25] ائندی، باخین، بئلئرم کی، آرانیزدا تارینین پادشاهلیغینی وعظ اتدئیئم سئزلردن هچ بئرئنئز، منئم اوزومو آرتیق گؤرمه‌یه‌جکسئنئز.
[26] اونا گؤره ده، بو گونکو گونده سئزه شهادت ورئرم کی، بوتون ائنسانلارین قانیندان تمئزم.
[27] چونکی تارینین بوتون ائراده‌سئنی سئزه بیان اتمکدن چکئنمه‌دئم.
[28] اؤزونوزه و بوتون سورویه گؤز-قولاق اولون. موقدّس روح سئزی او سورونون ائچئنده ناظئر تعیئن ادئب کی، اؤز قانی باهاسینا آلدیغی تارینین کئلئساسینا چوبانلیق اده‌سئنئز.
[29] بئلئرم کی، من گدندن سونرا، ییرتیجی قوردلار آرانیزا گله‌جکلر و سورویه رحم اتمه‌یه‌جکلر.
[30] اؤز آرانیزدان دا آداملار چیخاجاقلار کی، شاگئردلری داللارینجا چکئب آزدیرماق اوچون ترسه سؤزلر دانیشاجاقلار.
[31] بونا گؤره آییق اولون. خاطیرلایین کی، اوچ ائل گجه-گوندوز گؤز یاشلاری ائله هر بئرئنئزه نصئحت ورمکدن ال چکمه‌دئم.
[32] ائندی سئزی تارییا و اونون فیضئنئن کلامینا تاپشیریرام کی، قادئردئر سئزی بئنا اتسئن و تقدئس اِدئلمئشلرئن هامیسی آراسیندا سئزه مئراث ورسئن.
[33] هچ کئمئن گوموشونه، و یا قیزیلینا، یا دا پالتارینا گؤز دئکمه‌مئشم.
[34] اؤزونوز بئلئرسئنئز کی، منئم بو اَللرئم اؤز احتئیاجلاریما و منئمله اولان آداملارا خئدمت ادئب.
[35] اتدئیئم هر شیده سئزه گؤرستدئم کی، بو جور زحمت چکمکله گرک ضعئفلره کؤمک اده‌سئنئز و رب عئسانین سؤزونو خاطیرلایین کی، او اؤزو ددی: ”ورمه‌یئن آلماقدان داها چوخ برکتی وار.“»
[36] بونلاری دئیندن سونرا، پولوس دئز چؤکوب، اونلارین هامیسی ائله دوعا اتدی.
[37] اونلار دا اوجا سَسله آغلادیلار و پولوسو قوجاقلاییب، دالبادال اؤپوردولر.
[38] اونلاری لاپ چوخ قمگئن ادن، اونون ددئیی بو سؤزلر ائدی کی، آرتیق اونون اوزونو گؤرمه‌یه‌جکلر. سونرا اونو گمئیه قدر یولا سالدیلار.