[1] قیصرئیّه‌ده ائتالیالی دیئلن فوجدان، کورنِلئیوس آدلی بئر یوز باشی وار ائدی.
[2] دوروستکار بئر آدام ائدی و تاری قورخوسو هم اؤزونون هم ده بوتون اِو اهلئنئن اوره‌یئنده وار ائدی. بو آدام خالقا چوخ صدقه ورئب دائم تارییا دوعا اِدَردی.
[3] گونون تقرئبن دوقّوزونجو ساعاتیندا، رؤیادا آیدین تارینین بئر مله‌یئنی گؤردو کی، اونون یانینا گلئب ددی: «ای کورنِلئیوس!»
[4] کورنِلئیوس گؤزلرئنی اونا زئلّه‌دی و قورخو ائله ددی: «نه‌دئر، یارب؟» ملک ده اونا ددی: «دوعالارین و صدقه‌لرئن تارینین حوضورونا یتئشئب و خاطیرلانیب.
[5] ائندی یافایا آداملار گؤندَر و شمعون آدلی بئر آدامی گتئرت کی، اونا پطروس دا دیئلئر.
[6] او شمعون آدلی بئر دابّاغین یانیندا کی، اِوی دهنز قیراغیندادیر، قوناقدیر.»
[7] اونونلا دانیشان مله‌یئن گتدئیئندن سونرا، کورنِلئیوس نؤکرلرئندن ائکئسئنی و اونا دائم خئدمت ادن عسگرلردن دوروستکار بئرئنی چاغیردی
[8] و هر شیی نقل ادندن سونرا، اونلاری یافایا گؤندَ‌ردی.
[9] او گونون صاباحی، اونلار یولدا شهره یاخینلاشارکن، آلتینجی ساعاتا یاخین پطروس دوعا اتمک اوچون داما چیخدی.
[10] و آج اولوب یمک ائسته‌یئردی؛ آمّا اونلار حله یمه‌یی حاضیرلایارکن، پطروسو بئر هوشسوزلوق توتدو.
[11] و او، گؤیون آچیلدیغینی و دؤرد بوجاغیندان آسیلمیش بؤیوک ملفه‌یه بنزه‌ر بئر جئسمی گؤردو کی، یرئن اوستونه اندئرئلئر.
[12] ائچئنده یرئن هر جور دؤرد آیاقلی حیوانلاری و سورونن‌لری و هاوانین قوشلاری وار ائدی.
[13] و اونا بئر سس گلدی: «پطروس، قالخ، کس و یه!»
[14] لاکئن پطروس ددی: «خیر، یارب! چونکی من اصلا ناپاک و نجئس بئر شی یمه‌مئشم.»
[15] گئنه ائکئنجی دفه اونا بئر سس گلدی: «تارینین پاک اتدئیئنی، سن ناپاک سایما!»
[16] بو اوچ دفه تکرار اولدو و جئسم تزلئکله گؤیه قالدیریلدی.
[17] پطروس حله فئکرئنده بو رؤیانین نه دمک اولدوغونا تعجّوب ادئردی کی، کورنِلئیوس طرفئندن گؤندَ‌رئلن آداملار شمعونون اِوئنی سوروشوب، قاپی آغزیندا دوردولار.
[18] و اوجا سسله سوروشوردولار کی، آیا پطروس چاغیریلان شمعون اورادا قوناقدیر.
[19] پطروس حله رؤیا حاقّیندا دوشونوردو کی، موقدّس روح اونا ددی: «باخ، اوچ نفر سنی آختاریر.
[20] آمّا سن دور، آشاغی اِن و هچ تردّود اتمه‌یئب اونلارلا گت. چونکی اونلاری من گؤندَ‌رمئشم.»
[21] پطروس آداملارین یانینا آشاغی دوشوب اونلارا ددی: «باخین، آختاردیغینیز آدام منم. نه ائش اوچون گلئبسئنئز؟»
[22] اونلار دا ددئلر: «یوزباشی کورنِلئیوس کی، صالح، تاریدان قورخان، و بوتون یهودی خالقینین طرفئندن یاخشی تانینان بئر آدامدیر، موقدّس بئر مله‌یئن وسئله‌سی‌ائله اونا ائلهام اولوندو کی، سنئن دالینجا گؤندَ‌رئب، سنی اؤز اِوئنه گتئرتسئن و سنئن سؤزلرئنی اشئتسئن.»
[23] بله‌جه پطروس اونلاری ائچه‌ری چاغیردی کی، اونا قوناق اولسونلار. او گونون صاباحی قالخیب اونلارلا گتدی و یافادا اولان قارداشلارین بعضئلری ده اونونلا گتدئلر.
[24] او بئری گون قیصرئیّه‌یه چاتیب گئردئلر. کورنِلئیوس اؤز قارداشلارینی و یاخین دوستلارینی بئر یره چاغیریب اونلاری گؤزله‌یئردی.
[25] پطروس ائچه‌ری گئرنده، کورنِلئیوس پئشوازینا گلئب اونون آیاقلارینا دوشدو و اونا سجده اتدی.
[26] آمّا پطروس اونو قالدیریب ددی: «دور، من ده آنجاق بئر ائنسانام.»
[27] و کورنِلئیوسلا صؤحبت اِده‌رک ائچه‌ری گئردی و چوخلو آدامین ییغیلدیغینی گؤردو.
[28] و اونلارا ددی: «سئز اؤزونوز بئلئرسئنئز کی، بئر یهودئیه اؤزگه مئلّتدن اولان بئر آداملا موصاحئبتچئلئک و یا گؤروشمک جائز دیئل. لاکئن تاری منه گؤرسه‌دئب کی، هچ آدامی ناپاک یا دا نجئس سایماییم.
[29] بونا گؤره ده، چاغیریلدیغیم زامان، هچ اعتئراض اتمه‌دن گلدئم. ائندی سوروشورام؛ نه ائش اوچون منئم دالیمجا گؤندَ‌ردئنئز؟»
[30] کورنِلئیوس ددی: «دؤرد گون بوندان قاباق اؤز اِوئمده گونون دوقّوزونجو ساعاتیندا دوعا ادئردئم. بئردن پارلاق پالتار گیمئش بئر آدام قاباغیمدا دوروب،
[31] ددی: ”کورنِلئیوس! سنئن دوعالارین اشئدئلئب و صدقه‌لرئن تارینین حوضوروندا خاطیرلانیب.
[32] ائندی یافایا آداملار گؤندَر و شمعونو کی، اونا پطروس دا دیئلئر، سنئن یانینا گلمه‌یه دعوت ات. او دهنز قیراغیندا دبّاغ شمعونون اِوئنده قوناقدیر.“
[33] بله‌جه تزلئکله سنئن دالینجا گؤندَ‌ردئم و سن ده نه یاخشی اتدئن کی، گلدئن! ائندی بئز هامیمیز تارینین حوضوروندا بورادا حاضیریق کی، ربّئن سنه امر اتدئیی هر شیی اشئدک.»
[34] پطروس آغزینی آچیب ددی: «دوغرودان دا آنلاییرام کی، تاری طرفدارلیق ادن بئری دیئل،
[35] لاکئن هر مئلّتده اوندان قورخان و دوز عمل ادن هر کس اونا مقبولدور.
[36] او کلام کی، او، اونو ائسرایئل اوغوللارینا گؤندَ‌ردی، و هامینین ربّی اولان عئسا مسئحئن واسئطهسیائله باریش وعظ اولوندو.
[37] سئز اؤزونوز بئلئرسئنئز کی، یحیانین اعلان اتدئیی تعمئددن سونرا، جلئلدن باشلاییب یهودئیه‌نئن بوتون هر یرئنده نه باش وردی.
[38] کی، تاری نجه ناصئره‌لی عئسانی موقدّس روح و قووّتله مسح اتدی و او، نجه گدئب یاخشیلیق ادئردی و ائبلئس طرفئندن بوتون اَزئلنلره شفا ورئردی. چونکی تاری اونونلا ائدی.
[39] و بئز اونون هم یهودئیه مملکتئنده، و هم اورشلئمده اتدئیی بوتون ائشلرئن شاهئدئیئک. و اونلار اونو داردان آسیب اؤلدوردولر.
[40] تاری اونو اوچونجو گونده دئرئلتدی و عطا اتدی کی، آچیقجا گؤرونسون.
[41] نه کی، هامی آداملارا، آمّا قاباقدان تاری طرفئندن سچئلمئش شاهئدلره، یعنی بئزه کی، اونون اؤلولردن دئرئلمه‌سئندن سونرا، اونونلا ییئب ائچدئک.
[42] و بئزه امر اتدی کی، خالقا اعلان ادئب شهادت ورک کی، بو، اله همن اودور کی، تاری طرفئندن دئرئلره و اؤلولره حاکئم تعیئن اولونوب.
[43] بوتون پیغمبرلر اونون حاقّیندا شهادت ورئرلر کی، اونا ائمان گتئرن هر کس اونون آدینین واسئطهسیائله گوناهلارین باغیشلانماسینی آلیر.»
[44] پطروس بو سؤزلری حله دانیشیردی کی، موقدّس روح کلامی اشئدنلرئن هامیسینین اوستونه نازئل اولدو.
[45] و پطروسلا گلمئش ختنه اولونان ائمانلی‌لارین هامیسینی حیرت باسدی، چونکی موقدّس روحون عطاسی قیری‌یهودئلرئن اوستونه ده تؤکولموشدو.
[46] چونکی اونلارین قرئب دئللرده دانیشدیقلارینی و تارینی مدح اتدئکلرئنی اشئدئردئلر. او زامان پطروس ددی:
[47] «بئزئم کئمی موقدّس روحو آلان بو آداملارا کئم سویو ردّ اده بئلر کی، تعمئد آلماسینلار؟»
[48] و اونلارا امر اتدی کی، عئسا مسئحئن آدیندا تعمئد آلسینلار. سونرا پطروسدان خاهئش اتدئلر کی، بئر نچه گون اورادا قالسین.