[1] شِبا ملکه‌سی سولیمانین شؤهره‌تئنی اشئدئب اورشلئمه گلدی کی، اونو تاپماجالارلا ائمتاحان اتسئن. او، چوخ بؤیوک کاروانلا، عطرئیّات، چوخلو قیزیل و قئیمتلی داشلارلا یوکلَنمئش دَوه‌لرله سولیمانین یانینا گلدی و اوره‌یئنده اولان هر شی باره‌ده اونونلا صؤحبت اتدی.
[2] سولیمان اونون بوتون سوآللارینا جاواب وردی؛ هچ بئر گئزلی شی اولمادی کی، پادشاه اونا تشرئح اتمه‌سئن.
[3] شِبا ملکه‌سی سولیمانین حئکمتئنی و اونون تئکدئیی سارایی،
[4] سوفره‌سئنده‌کی یِمه‌یی، اعیانلارینین اوتوروشونو، قوللوقچولارینین خئدمتئنی و اونلارین پالتارلارینی، ساقئلرئنی و اونلارین پالتارلارینی، ربّئن معبدئنده گتئردئیی یاندیرما قوربانلارینی گؤرنده حیران قالدی.
[5] او، پادشاها ددی: «سنئن ائشلرئن و حئکمتئن باره‌ده اؤز اؤلکَمده اشئتدئیئم خبر دوز ائمئش.
[6] هرچند گلئب اؤز گؤزلرئمله گؤره‌نه قدر، من اونلارین سؤزلرئنه ائنانمامیشدیم. باخ، منه سنئن بؤیوک حئکمتئنئن یاریسی بله، دانیشیلماییب. سن اشئتدئکلرئمدن ده اوستونسن.
[7] سنئن آداملارین و قوللوقچولارین نه بختوردئرلر کی، همئشه حوضوروندا دوروب حئکمتئنی اشئدئرلر.
[8] تارین رب موبارک اولسون کی، سندن راضی اولوب و سنی تارین رب اوچون تختئنده پادشاه اوتوردوب! سنئن تارین ائسرایئلی سِودئیی اوزوندن هم ده اونو ابده‌جک پایدار اتمکدن اؤتری، سنی اونلارین اوستونه پادشاه ادئب کی، عدالت و صالحلئکله عمل اده‌سن.»
[9] شِبا ملکه‌سی پادشاها یوز ائیئرمی تالانت قیزیل، چوخلو عطرئیّات و قئیمتلی داشلار باغیشلادی. اونون پادشاه سولیمانا وردئیی قدر عطرئیّات هچ واخت گلمه‌مئشدی.
[10] اوفئردن قیزیل گتئرن خورامین آداملاری ائله سولیمانین آداملاری، اَردَج آغاجی و قئیمتلی داشلار دا گتئردئلر.
[11] پادشاه اَردَج آغاجیندان ربّئن معبدی و پادشاه سارایی اوچون پئلّه‌کَنلر، موسئقئچئلر اوچون طنبورلار و چنگلر دوزَلتدی. یهودا دئیاریندا بو گونه قدر بِله‌سی گؤرونمه‌مئشدی.
[12] سولیمان پادشاه شِبا ملکه‌سئنه آرزولادیغی و ائسته‌دئیی بوتون شیلری وردی. سولیمان ملکه‌نئن گتئردئکلرئندن داها چوخ وردی. او دا آداملاری ائله بئرلئکده قاییدیب اؤز اؤلکه‌سئنه گتدی.
[13] بئر ائلده سولیمانا گلن قیزیلین چکئسی آلتی یوز آلتمیش آلتی تالانت ائدی.
[14] آل-وِر ادن آداملارین و تاجئرلرئن گتئردئیی قیزیل بورایا داخئل دیئلدی. بوتون عرب پادشاهلاری و ائسرایئلئن والئلری ده سولیمانا قیزیل و گوموش گتئردئلر.
[15] سولیمان پادشاه دؤیمه قیزیلدان ائکی یوز سئپر دوزَلتدی. هر بئر سئپره آلتی یوز شِکِل دؤیمه قیزیل ائشلَندی.
[16] او، دؤیمه قیزیلدان اوچ یوز قالخان دا دوزَلتدی و هر بئر قالخانا اوچ یوز شِکِل قیزیل ائشلَندی. پادشاه اونلاری «لوبنان مِشه‌سی» آدلی سارایینا قویدو.
[17] پادشاه فئل دئشئندن بؤیوک بئر تخت دوزَلتدی و اونو خالئص قیزیللا اؤرتدو.
[18] تختئن آلتی پئلّه‌سی و آیاق قویماق اوچون قیزیل کَتئلی وار ائدی، بونلار تخته باغلی ائدئلر. اوتوراجاغین هر ائکی طرفئنده قوللار وار ائدی و قوللارین یانیندا ائکی شئر موجسّمه‌سی وار ائدی.
[19] آلتی پئلّه‌نئن ائکی طرفئنده ده اون ائکی شئر موجسّمه‌سی وار ائدی. هچ پادشاهلیقدا بله بئر شی دوزَ‌لدئلمه‌دی.
[20] سولیمان پادشاهین بوتون ائچکی قابلاری قیزیلدان ائدی. «لوبنان مِشه‌سی» آدلی ساراییندا اولان بوتون اشیالار دا خالئص قیزیلدان ائدی. چونکی گوموش سولیمانین دؤورونده دَیَرلی ساییلمیردی.
[21] پادشاهین گَمئلری خورامین آداملاری ائله بئرلئکده تَرشئشه گِدَردی. اوچ ائلده بئر دفه تَرشئش گَمئلری گلئب قیزیل، گوموش، فئل دئشی، میمونلار و طاووسلار گتئرَردئلر.
[22] بله‌جه سولیمان پادشاه وار-دؤولتده و حئکمتده یر اوزونون بوتون پادشاهلاریندان اوستون ائدی.
[23] بوتون یر اوزونون پادشاهلاری ائسته‌یئردئلر کی، سولیمانین حوضورونا گلسئنلر و تارینین اونون اوره‌یئنه قویدوغو حئکمتی اشئتسئنلر.
[24] اونون یانینا گلن هر کس هدئیّه گتئرئردی. بله‌جه اونا هر ائل قیزیل و گوموش قابلار، پالتارلار، سئلاحلار، عطرئیّات، آتلار و قاطیرلار گتئرئلئردی.
[25] سولیمانین دؤرد مئن آخوروندا دؤیوش عارابالاری اوچون آتلاری و اون ائکی مئن آتلیسی وار ائدی. اونلاری عارابالار اوچون آیریلان شهرلرده و اورشلئمده، پادشاهین یانیندا یِرلَشدئردی.
[26] او، فَرات چاییندان فئلئسطلی‌لرئن تورپاغینا و مئصئر سرحدئنه قدر بوتون پادشاهلار اوستونده حؤکمرانلیق ادئردی.
[27] پادشاه اورشلئمده گوموشو، چوخلوغوندان داشلارا، سئدر آغاجینی دا هامار بؤلگه‌ده بئتَن وحشی انجئر آغاجینا برابر اتمئشدی.
[28] سولیمانین آتلارینی مئصئردن و بوتون باشقا اؤلکه‌لردن گتئرئردئلر.
[29] سولیمانین قالان ائشلری، ائلک ائشلرئندن آخیر ائشلرئنه قدر، مگر ناتان پیغمبرئن تارئخ کئتابیندا و شئلولو اَخئیانین پیغمبرلئیئنده و گؤروجو یَعَدّونون نِباط اوغلو یَروبعام حاقّینداکی وحی‌لرئنده یازیلماییبدیر؟
[30] سولیمان، اورشلئمده بوتون ائسرایئل اوستونده قیرخ ائل پادشاهلیق اتدی.
[31] سولیمان اؤلوب آتالاری ائله یاتدی و آتاسی داوودون شهرئنده باسدیریلدی. اونون یرئنه اوغلو رِحوبعام سلطنت اتدی.