[1] سولیمان دوعانی قورتاردیقدا، گؤیدن اود دوشوب یاندیرما قوربانلاری و قوربانلاری اودّو. ربّئن جلالی معبدی دولدوردو.
[2] کاهئنلر ربّئن معبدئنه گئره بئلمئردئلر، چونکی ربّئن جلالی ربّئن معبدئنی دولدورموشدو.
[3] بوتون ائسرایئل اؤولادلاری اودون دوشدویونو و معبدئن اوستونده اولان ربّئن جلالینی گؤرنده، داش دؤشَمه‌نئن اوستونده اوزو اوسته یره دوشوب پرستئش اتدئلر و ربّه حمدلر ورئب ددئلر: «رب یاخشی‌دیر، اونون محبّتی ابدی‌دئر.»
[4] پادشاه و بوتون خالق ربّئن حوضوروندا قوربانلار کَسدئلر.
[5] سولیمان پادشاه قوربان اولاراق ائیئرمی ائکی مئن اؤکوز و یوز ائیئرمی مئن قویون-کچی تقدئم اتدی. بله‌جه، پادشاه و بوتون خالق تارینین معبدئنی تقدئس اتدئلر.
[6] کاهئنلر اؤز وظئفه‌لرئنه موطابئق دایاندیلار، لاوئلی‌لر ده ربّئن موسئقی آلَتلری ائله دوردولار. پادشاه داوود بونلاری دوزَلتمئشدی کی، اؤزو «ربّه شوکور اولسون، چونکی محبّتی ابدی‌دئر» اوخویوب حمد ادنده، لاوئلی‌لر چالسینلار. کاهئنلر ده اونلارین قاباغیندا کَره‌نایلار چالیردیلار و بوتون ائسرایئللی‌لر آیاق اوسته دایانمیشدیلار.
[7] سولیمان ربّئن معبدی قاباغینداکی حَیَطئن اورتاسینی تقدئس اتدی کی، یاندیرما قوربانلاری و باریش قوربانلارینین پئیئنی اورادا تقدئم اتسئن. چونکی دوزَلتدئیی بورونج قوربانگاها یاندیرما قوربانلاری، تاخیل تقدئملری و پئی یِرلَشمَزدی.
[8] او واخت سولیمان و اونونلا بئرلئکده چوخ بؤیوک بئر جاماعات، خَمات کِچئدئندن مئصئر دره‌سئنه قدر یاشایان بوتون ائسرایئللی‌لر یدّی گون بایرام توتدولار.
[9] سکّئزئنجی گون شؤوکتلی بئر ییغین توتدولار. قوربانگاهین تقدئسی اوچون یدّی گون ده بایرام اتدئلر.
[10] یدّئنجی آیین ائیئرمی اوچونجو گونو سولیمان خالقی اؤز اِولرئنه گؤندَ‌ردی. اونلار ربّئن داوودا، سولیمانا و خالقی ائسرایئله اتدئیی یاخشیلیقلارا گؤره، اورَکلرئنده شاد و خوشحال ائدئلر.
[11] بله‌جه سولیمان ربّئن معبدئنی و پادشاه سارایینی تئکئب قورتاردی. ربّئن معبدئنده و اؤز ساراییندا اوره‌یی ائسته‌دئیی هر شیی باجاریقلیقلا اتدی.
[12] رب سولیمانا گجه گؤرونوب اونا ددی: «سنئن دوعانی اشئتمئشم و بو یری اؤزومه قوربان اِوی سچمئشم.
[13] گؤیلری باغلادیغیم و یاغیش اولمادیغی واخت، چَیئرتکه‌یه امر اتدئیئم زامان کی، یِری یِیئب قورتارسینلار، خالقیمین آراسینا دا وبا گؤندَردئیئم زامان،
[14] اگر منئم آدیملا چاغیریلان خالقیم اؤزلرئنی آلچالتسالار، دوعا ادئب اوزومو آختارسالار و پئس یوللاریندان دؤنسه‌لر، او واخت گؤیدن اشئدئب اونلارین گوناهینی باغیشلایاجاغام و تورپاقلارینی صاغالداجاغام.
[15] ائندی بو یرده ادئلَن دوعانی گؤزلرئم گؤره‌جک و قولاقلاریم اِشئده‌جک.
[16] ائندی بو معبدی سچئب تقدئس اتمئشم کی، آدیم ابده‌لئک اورادا اولسون. منئم نظرئم و اوره‌یئم دائم اورادا اولاجاق.
[17] اگر منئم بوتون سنه امر اتدئکلرئمی یرئنه یتئرئب، آتان داوودون یِرئدئیی کئمی یولوملا گده‌سن، منئم قایدالاریما و حؤکملرئمه عمل اده‌سن،
[18] سنئن پادشاهلیق تختئنی پایدار اده‌جیم، نجه کی، آتان داوودلا عهد باغلاییب دمئشدئم: ”سنئن نسلئندن ائسرایئله حؤکم ادن بئر کئشی اَسکئک اولمایاجاق.“
[19] آمّا اگر دؤنوب قاباغینیزا قویدوغوم قایدالاریمی و امرلرئمی ترک اده‌سئنئز، گدئب آیری آللاهلارا قوللوق ادئب اونلارا پرستئش اده‌سئنئز،
[20] من سئزی، سئزه وردئیئم تورپاقدان قوووب آتاجاغام و اؤز آدیما تقدئس اتدئیئم بو معبدی حوضورومدان ردّ اده‌جیم. او واخت ائسرایئلی بوتون خالقلار آراسیندا مَثَل و عئبرت سؤزو اده‌جیم.
[21] اوجا اولان بو معبدئن یانیندان کچن هر کس حیرتدن مات قالیب دئیه‌جک: ”نه اوچون رب بو تورپاغا و بو معبده بونو اتدی؟“
[22] و دئیه‌جکلر: ”اونا گؤره کی، اونلار اؤزلرئنئن رب تاریلارینی، آتالارینی مئصئر تورپاغیندان چیخاردان رب تاریلاریلارینی ترک اتدئلر و آیری آللاهلاردان یاپیشیب، اونلارا پرستئش و قوللوق اتدئلر. بونا گؤره ده او بوتون بو بلانی اونلارین اوستونه گؤندَ‌ردی.“»