[1] بوندان سونرا موآبلی‌لار و عَمّونلولار، اونلارلا برابر ماعونلولاردان بعضئسی ده گلدئلر کی، یِهوشافاطین ضئدّئنه دؤیوشسونلر.
[2] بعضی آداملار گلئب یِهوشافاطا خبر گتئرئب ددئلر: «دهنزئن او بئری طرفئندن، اِدومدان سنئن ضئدّئنه بؤیوک بئر قوشون گلئر. باخ، ائندی اونلار خَصِصون-تاماردادیرلار. (یعنی عِین‌گِدئده)»
[3] یِهوشافاط قورخدو و اوزونو ربّی آختارماغا دؤندَردی و بوتون یهودا اوچون اوروج اعلان اتدی.
[4] یهودالی‌لار ربدن کؤمک ائسته‌مک اوچون ییغیلدیلار، حتّا یهودانین بوتون شهرلرئندن ده گلدئلر کی، ربّی آختارسینلار.
[5] یِهوشافاط ربّئن معبدئنده، تزه حَیَطئن قاباغیندا، یهودا و اورشلئم جاماعاتینین قاباغیندا دوروب ددی:
[6] «یارب، آتالاریمیزین تاریسی، گؤیلرده اولان تاری مگر سن دیئلسن؟ بوتون مئلّتلرئن پادشاهلیقلاری اوستونه حاکئم اولان مگر سن دیئلسن؟ قودرتله قووّت سنئن اَلئنده‌دئر و هچ کئم سنئن ضئدّئنه دورا بئلمز.
[7] ای تاریمیز، مگر سن دیئلسن کی، بو تورپاقدا یاشایانلاری خالقین ائسرایئلئن قاباغیندا قوودون و اونو دوستون ائبراهئمئن نسلئنه ابدی اولاراق وردئن؟
[8] اورادا مسکن سالدیلار، اورادا سنئن آدینا موقدّس بئر مکان تئکدئلر و ددئلر:
[9] ”اگر اوستوموزه بلا، قیلینج، جزا، وبا و یا آجلیق گلسه، آدین بو معبدئن اوستونده اولدوغونا گؤره بو معبدئن قاباغیندا، یعنی سنئن قاباغیندا دوراجاغیق و چتئن گونلرده سنه فریاد اده‌جیئک، اوندا سن اشئده‌جکسن و خئلاص اده‌جکسن.“
[10] ائندی باخ، عَمّونلولار، موآبلی‌لار، سِعئر داغینین ساکئنلری نه ادئر! مئصئر تورپاغیندان گلرکَن ائسرایئللی‌لری اونلارین تورپاغینا گئرمیه قویمادین، ائسرایئللی‌لر ده دؤنوب اونلاری محو اتمه‌دئلر.
[11] ائندی گؤر عوضئنی نجه ورئرلر؛ گلئرلر کی، بئزه ائرث وردئیئن مولکوندن بئزی قووسونلار.
[12] ای تاریمیز، اونلارا مگر حؤکم اتمیه‌جکسن؟ چونکی اوستوموزه گلن بو بؤیوک قوشونون ضئدّئنه گوجوموز یوخدور، نه اده‌جیئمئزی بئلمئرئک، آنجاق گؤزلرئمئز سنه دئکئلئب.»
[13] بوتون یهودالی‌لار کؤرپه‌لری، آروادلاری و اوشاقلاری ائله ربّئن حوضوروندا دورموشدولار.
[14] جاماعاتین آراسیندا ربّئن روحو آساف نسلئندن اولان بئر لاوئلی، مَتّنه‌ی اوغلو یِعی‌اِل اوغلو بِنایا اوغلو زِکَرئیّا اوغلو یَخه‌زی‌اِلئن اوستونه گلدی.
[15] او ددی: «بوتون یهودالی‌لار و اورشلئمده یاشایانلار و سن پادشاه یِهوشافاط، یاخشی اشئدئن! رب سئزه بله دیئر: ”بو بؤیوک قوشوندان قورخمایین و اوره‌یئنئز اوزولمه‌سئن، چونکی دؤیوش سئزئن یوخ، تارینیندیر.
[16] صاباح اونلارین ضئدّئنه اِنئن. باخ، اونلار صئص یوخوشو ائله قالخیب گله‌جکلر و اونلاری دره‌نئن آخیریندا، یِروعِل چؤلونون قاباغیندا تاپاجاقسینیز.
[17] بو موحارئبه‌ده دؤیوشمک سئزه لازیم اولمایاجاق. ای یهودالی‌لار و اورشلئملی‌لر، صف باغلاییب دورون، اؤز حاقّینیزدا ربّئن خئلاصینی گؤرون. قورخمایین و اوزولمه‌یئن. صاباح اونلارین قاباغینا گدئن و رب سئزئنله اولاجاق.“»
[18] یِهوشافاط اوزو اوسته یِره قاپاندی و بوتون یهودالی‌لار و اورشلئمده یاشایانلار ربّئن حوضوروندا یره قاپانیب اونو پرستئش اتدئلر.
[19] قوحات و قورَخ نسئل‌لرئندن اولان لاوئلی‌لر آیاغا قالخیب ائسرایئلئن تاریسی ربّه چوخ اوجا سَسله شوکور اتدئلر.
[20] اونلار سحر تزدن قالخدیلار و تِقوعه چؤلونه چیخدیلار. چیخدیقلاری زامان یِهوشافاط دوروب ددی: «ای یهودا و اورشلئمده یاشایانلار، منی اشئدئن: تارینیز ربّه بِل باغلایین، پایدار قالارسینیز، اونون پیغمبرلرئنه ائنانین و اوغور قازانارسینیز.»
[21] خالقلا مصلحت اتدئکدن سونرا، ربّه نغمه اوخویانلاری تعیئن اتدی کی، قوشونونون قاباغیندا گتسئنلر و موقدّس جلالینا حمد ادئب اوخوسونلار: «ربّه شوکور ادئن، چونکی اونون محبّتی ابدی‌دئر.»
[22] تَرَنّومله حمده باشلادیقلاری زامان، رب یهودایا گلن عَمّونلولارین، موآبلی‌لارین، و سِعئر داغینین ساکئنلرئنئن ضئدّئنه کمئن قوردو و اونلار قیریلدیلار.
[23] چونکی عَمّونلولارلا موآبلی‌لار سِعئر داغینین ساکئنلرئنئن ضئدّئنه قالخیب اونلاری کامئل قیردیلار. سِعئر ساکئنلرئنی قیراندان سونرا دا بئربئرلرئنی محو اتمه‌یه باشلادیلار.
[24] یهودالی‌لار چؤله باخان گؤزَتچی یرئنه چاتدیقدا، قوشونا باخیب یره ییخیلمیش مِیئتلر گؤردولر. صاغ قالان یوخ ائدی.
[25] یِهوشافاط و اونون خالقی اونلارین قنئمتئنی گؤتورمیه گلدئلر، اونلارین آراسیندا دؤیوش ماللار، پالتارلار و قئیمتلی شیلر تاپدیلار. بونلاردان او قدر ییغدیلار کی، داشییا بئلمه‌دئلر. قنئمت او قدر چوخ ائدی کی، اونو اوچ گون ییغیردیلار.
[26] دؤردونجو گون بِراکا دره‌سئنده ییغیلدیلار کی، ربّه حمد اتسئنلر. بوندان اؤتری او یرئن آدینی بِراکا دره‌سی قویدولار و بو گونه قدر ده بله‌دئر.
[27] یهودا و اورشلئمدن اولان آداملارین هامیسی، یِهوشافاطین باشچیلیغی آلتیندا شادلیقلا اورشلئمه گری دؤندولر، چونکی رب دوشمنلری اوستونده ظفره گؤره اونلارا شادلیق ورمئشدی.
[28] چنگلر، طنبورلار و کَره‌نایلار چالاراق اورشلئمه، ربّئن معبدئنه گلدئلر.
[29] بوتون اؤلکه‌لرده‌کی پادشاهلار او زامان کی، ائسرایئلئن دوشمنلرئنئن ضئدّئنه ربّئن دؤیوشدویونو اشئتدئلر، اونلارین اوستونه تارینین قورخوسو دوشدو.
[30] بله‌جه یِهوشافاطین پادشاهلیغینا اَمئن-آمانلیق ساکئن اولدو، چونکی تاریسی اونا هر طرفدن دئنجلئک وردی.
[31] یِهوشافاط یهودا اوستونده پادشاه اولدو. پادشاه اولدوغو واخت اوتوز بش یاشیندا ائدی. او، اورشلئمده ائیئرمی بش ائل پادشاهلیق اتدی. آناسینین آدی شئلخی قیزی عَزوبا ائدی.
[32] یِهوشافاط آتاسی آسانین یولو ائله گتدی و اوندان آزماییب ربّئن گؤزونده دوز اولان ائشلر اتدی.
[33] آنجاق پرستئشگاهلار آرادان قالدیریلمادی و خالقین اوره‌یی حله آتالارینین تاریسی ربّه طرف دؤنمه‌مئشدی.
[34] یِهوشافاطین قالان ائشلری، ائلک ائشلرئندن آخیر ائشلرئنه قدر، خَنانی اوغلو یِیهونون تارئخ کئتابیندا یازیلیب کی، ائسرایئل پادشاهلارینین کئتابیندادیر.
[35] اوندان سونرا یهودا پادشاهی یِهوشافاط، ائسرایئل پادشاهی اَخَزیا ائله ائتّئفاق قوردو. اونون بو عملی شرارت ائدی.
[36] موتّفئق اولدولار کی، تَرشئشه گتمه‌یه گَمئلر دوزَلتسئنلر و گَمئلری عِصیون‌گِبِرده دوزَلتدئلر.
[37] مارِشادان اولان دوداویاهونون اوغلو اِلئعِزِر یِهوشافاطین ضئدّئنه پیغمبرلئک ادئب ددی: «اَخَزیا ائله ائتّئفاق قوردوغون اوچون رب سنئن ائشلرئنی پوزدو.» بله‌جه گَمئلر پارچالاندی و تَرشئشه گده بئلمه‌دئلر.