[1] یِهوشافاطین بول ثروت و احتئشامی وار ائدی. او، اِولئلئک یولو ائله اَخابلا موتّفئق اولدو.
[2] بئر نچه ائل سونرا اَخابلا گؤروشمک اوچون سامئره‌یه گتدی. اَخاب اونون اوچون و اونونلا برابر اولان خالق اوچون چوخ قویون-کچی و اؤکوز کَسدی، اونو تحرئک اتدی کی، راموت-گئلعادا قالخسین.
[3] ائسرایئل پادشاهی اَخاب یهودا پادشاهی یِهوشافاطدان سوروشدو: «آیا سن، منئمله بئرلئکده راموت-گئلعادا گِدَرسن؟» یِهوشافاط اونا جاواب وردی: «منی اؤزون کئمی، خالقیمی خالقین کئمی حساب ات، دؤیوشده سنئنله اولاجاغیق.»
[4] یِهوشافاط گئنه ائسرایئل پادشاهینا ددی: «اوّلجه گؤرَک ربّئن سؤزو نه‌دئر؟»
[5] ائسرایئل پادشاهی دؤرد یوز پیغمبری ییغدی و اونلاردان سوروشدو: «ووروشماق اوچون راموت-گئلعادا گِدَک یا گتمه‌یک؟» اونلار ددئلر: «گت، تاری اونو پادشاها تسلئم اده‌جک.»
[6] آمّا یِهوشافاط سوروشدو: «بورادا اولانلاردان باشقا، آیا ربّئن بئر پیغمبری یوخدور کی، اوندان سوروشاق؟»
[7] ائسرایئل پادشاهی یِهوشافاطا ددی: «ربدن سوروشماق اوچون بئر نفر ده وار: یئملا اوغلو مئکایا. آنجاق منئم اوندان زَهلَم گدئر، چونکی همئشه یاخشیلیغیما یوخ، پئسلئیئمه پیغمبرلئک ادئر.» یِهوشافاط ددی: «قوی پادشاه بله دِمه‌سئن.»
[8] ائسرایئل پادشاهی بئر سارای خئدمتچئسئنی چاغیریب ددی: «تِز یئملا اوغلو مئکایانی بورایا گتئر.»
[9] بو زامان ائسرایئل پادشاهی و یهودا پادشاهی یِهوشافاط سامئره دروازاسینین گئره‌جیئنده‌کی خرمن یرئنده، شاهلیق لئباسی گِیمئش حالدا اوتورموشدولار. هر بئری اؤز تختئنده اوتورموشدو و بوتون پیغمبرلر اونلارین قاباغیندا پیغمبرلئک ادئردی.
[10] کِنه‌عَنا اوغلو صئدقئیا اؤزونه دَمئر بوینوزلار دوزَ‌لدئب ددی: «رب بله دیئر: ”اَراملی‌لاری قیریب قورتارانا قدر اونلاری بونلارلا بوینوزلایاجاقسان.“»
[11] بوتون پیغمبرلر ده پیغمبرلئک ادئب دیئردئلر: «راموت-گئلعادا گت، قالئب گله‌جکسن، چونکی رب اونو پادشاها تسلئم اده‌جک.»
[12] او قاصئد کی، مئکایانی چاغیرماق اوچون گتمئشدی، اونونلا دانیشیب ددی: «باخ، پیغمبرلر پادشاها بئرلئکده خوش سؤزلر دیئرلر. قوی سنئن سؤزون ده اونلاردان بئرئنئن سؤزو کئمی اولسون و اونونلا خوش دانیش.»
[13] آمّا مئکایا ددی: «وار اولان ربّه آند اولسون کی، تاریم منه نه دِسه، اونو دئیه‌جیم.»
[14] او، پادشاهین یانینا گلدئکده، پادشاه اونا ددی: «مئکایا، ووروشماق اوچون راموت-گئلعادا گِدَک، یوخسا گتمه‌یک؟» مئکایا اونا ددی: «گدئن، قالئب گله‌جکسئنئز، اونلار سئزه تسلئم ادئله‌جک.»
[15] پادشاه اونا ددی: «سنه نچه دفه گرک آند ائچدئرئم کی، منه ربّئن آدیندا حقئقتدن آیری بئر شی دِمَیه‌سن؟»
[16] مئکایا ددی: «من بوتون ائسرایئللی‌لری داغلار اوستونده چوبانی اولمایان سورو کئمی سَپَلَنمئش گؤردوم. رب ددی: ”اونلارین آغاسی یوخدور. قوی هر بئری سالامات اؤز اِوئنه قاییتسین.“»
[17] ائسرایئل پادشاهی یِهوشافاطا ددی: «مگر سنه دِمه‌دئم کی، او منئم یاخشیلیغیما یوخ، پئسلئیئمه پیغمبرلئک اده‌جک؟»
[18] مئکایا ددی: «او واخت ربّئن سؤزونو اشئدئن. من ربّی گؤردوم کی، اؤز تختئنده اوتوروب و بوتون گؤیلر قوشونو اونون ساغیندا و سولوندا دوروبلار.
[19] رب سوروشدو: ”ائسرایئل پادشاهی اَخابی کئم توولایاجاق کی، راموت-گئلعادا گدئب هلاک اولسون؟“ بئری اِله ددی، او بئری بِله.
[20] او واخت بئر روح ائره‌لی گلئب ربّئن قاباغیندا دایاندی و ددی: ”من اونو توولایارام.“ رب اونا ددی: ”نجه؟“
[21] او جاواب وردی: ”من گدئب بوتون پیغمبرلرئن آغزیندا یالانچی بئر روح اولارام.“ رب ددی: ”سن اونو توولایاجاقسان و بونو باجاریرسان، گت و بله اِله.“
[22] ائندی، باخ، رب سنئن بو پیغمبرلرئنئن آغزینا یالانچی بئر روح قویوب. چونکی سنئن باشینا بلا گتئرمه‌یی اعلان ادئب.»
[23] او واخت کِنه‌عَنا اوغلو صئدقئیا یاخینلاشدی و مئکایانین یاناغینا ووروب جاواب وردی: «ربّئن روحو مندن سنه نجه کچدی کی، سنئنله دانیشسین؟»
[24] مئکایا ددی: «باخ، بونو او گون گؤره‌جکسن کی، گئزلَنمک اوچون ائچه‌ری بئر اوتاغا گئرئرسن.»
[25] ائسرایئل پادشاهی ددی: «مئکایانی گؤتورون، اونو شهر ریئسی آمونون و پادشاهین اوغلو یوآشین یانینا گؤندَ‌رئن.
[26] اونلارا امر ادئن کی، پادشاه بله دیئر: ”بو آدامی زئندانا آتین و من سالامات قاییدانا قدر اونا آنجاق او قدر چؤرک و سو ورئن کی، اؤلمه‌سئن.“»
[27] مئکایا ددی: «اگر سن سالامات قاییداسان، دِمه‌لی رب منئم واسئطَمله دانیشماییبدیر.» سونرا ددی: «ای جاماعات، هامینیز اشئدئن!»
[28] ائسرایئل پادشاهی و یهودا پادشاهی یِهوشافاط راموت-گئلعادا گتدئلر.
[29] ائسرایئل پادشاهی یِهوشافاطا ددی: «من قئیافه‌می دَیئشئب دؤیوشه گئره‌جیم، لاکئن سن اؤز شاهلیق پالتارینی گِی.» بله‌جه ائسرایئل پادشاهی قئیافه‌سئنی دَیئشئب دؤیوشه گئردی.
[30] اَرام پادشاهی اؤز دؤیوش عارابالارینین باشچیلارینا امر اتمئشدی: «نه کئچئکله، نه ده بؤیوکله ووروشون، فقط ائسرایئل پادشاهی ائله دؤیوشه گئرئن.»
[31] دؤیوش عارابالارینین باشچیلاری یِهوشافاطی گؤرنده ددئلر: «ائسرایئل پادشاهی بودور.» و دؤنوب اونونلا ووروشماغا گتدئلر. او واخت یِهوشافاط چیغیردی. رب اونا کؤمک اتدی، تاری اونلاری اونون یانیندان گری چکدی.
[32] دؤیوش عارابالارینین باشچیلاری اونون ائسرایئل پادشاهی اولمادیغینی گؤرنده اونون دالینجا گتمه‌یئب قاییتدیلار.
[33] بئر آدام نئشان آلمادان کامان چکئب ائسرایئل پادشاهینی زئرِهئنئن بئرلَشدئیی یردن ووردو. پادشاه عاراباچیسینا ددی: «دؤندَ‌ر و منی دؤیوشدن چیخارت، چونکی آغیر یارالانمیشام.»
[34] او گون دؤیوش قیزیشدی. ائسرایئل پادشاهی آخشاماجاق اؤز دؤیوش عاراباسیندا اَراملی‌لارین قاباغیندا سؤیکه‌نئب دایاندی. گونش باتماقدا ائکن او اؤلدو.