[1] Tatitun ajayupax nayxankiwa, jupaw nayarux yaqhachasitu; jan kunaninakar suma yatiyäwinak yatiyiriw khithanitu, llakt'atanakaru chuymachiri, katuntatanakar antutat sarnaqasiñ yatiyiri, carcelankirinakar antutat sarnaqasiñ churiri,
[2] Tatitun suma amtäwip mara yatiyiri, kawkïri uruntix jiwasan Diosasax uñisirinakasat phuqsuskani ukkha. Taqi llakt'atanakar chuymachiriw khithanitu,
[3] Sión qulluna llakt'atanakarux atipjatäñ lantxa, atipt'añ churiri, jachañ lantsti suma q'apkir kusisiñ qullanak churiri, chuyma kawkst'ata sarnaqaña lantsti, yupaychañ q'uchunak chuririraki. “Atipt'iri roble quqanaka” sasaw sutichapxarakïtam, pachpa Tatitun ayruntatanaka k'ajkir kankañap uñacht'ayañataki.
[4] Nayra pacha t'unjat utanaksti wasitat utachxapxani, kawkïri jach'a utanakatix t'unjatäkän ukanaksa wasitat sayt'ayxapxani, kawkïri markanakatix t'unjatäkän ukanaksa wasitat utacht'xapxarakini.
[5] Yaqha markat jutir jaqinakaw uywanakamsa, yapunakamsa, uva yapunakamsa uñjapxani.
[6] Jumanakarusti: “Tatitun sacerdotenakapa” sasaw sutichapxätam, Tatitun luqtirinakapa sasaraki. Yaqha markanakankir qamir yänakapampiw kusisipxäta, uka k'ajkir yänakapampiw k'achachasipxäta.
[7] Kunjämatix markaxax t'aqhisïnxa, pä ukkha p'inqachata, jisk'achataraki, ukat jichhax pä ukkha qamir yänak katuqani, wiñay kusisiñampiw kusisini.
[8] Tatitusti kunatix chiqapäki uk muni, lunthatasiñampi, jaqi jiwayañampirux uñisiwa. Jupaw jumanakarux kunatix churañäki uk taqi chuyma churapxätam, ukatsti mä wiñay arust'äwi jumanakampix lurani.
[9] Wawanakapasti taqi markanak taypinxa, wali jach'at uñt'atäpxaniwa; taqi jupanakar uñjirinakasti sapxaniwa: “Tatitun askip churat markawa” sasa.
[10] ¡Tatitunkxasinxa wali kusisitätwa! Diosaxankataxatsti kusisiñan phuqt'atätwa, jupaw nayarux qhispiyitu, atipjañsa churarakitu. Kunjämatix mä jaqichasir waynax pillup uchaski ukhamätwa, kunjämatix mä jaqichasir tawaqux k'achacht'aski ukhamarakïtwa.
[11] Kunjämatix uraqit alinakax sartanixa, mä panqar yapun ayrunakax ch'ichtanixa, ukhamarak Tatitux atipjañap sartayani, taqi markanakasti yupaychañ q'uchunak q'uchupxani.