[1] “Akaxay, luqtirixaxa, khitirutix nayax uywaskta ukaxa, ajllisitaxawa, jupanarak kusistxa. Ajayuxsa jupxaruw uchta, ukhamat kunatix chiqapäki ukanak taqi markanakar apaniñapataki.
[2] Janiw arnaqaskaniti, janiw arskanisa, jupan arupax janirakiw thakhinakansa ist'askaniti,
[3] usuchjatanakarusti janiw juk'amp usuchjkaniti, niya jiwirpacharus janirakiw jiwaykaniti. Jan ukasti, juk'a ch'amaninakarux ch'amañcht'aniwa, chiqa kankañ utjayarakini.
[4] Janiw samarkaniti, ch'amsa jiwt'ayaskaniti, aka uraqin chiqa kankaña utt'ayañapkama. Quta tuqinkir markanakasti, yatichäwinakap sum ist'apxani.”
[5] Dios Tatitu, khititix alaxpachsa lurki, janatatkaraki, uraqsa, ukhamaraki ukan achurinakarus lurki, jakañsa jaqinakarus churki, uka Diosaw luqtiriparux saraki:
[6] “Naya Tatituw jumarux jawssma, amparatarak wayxarsma, ukhamat jumax qhispiyasiñ apañamataki; nayaw jumarux sayt'aysma, markaxampi arust'äwiru mantataxatxa, juman mä chimpüñam munarakta, markanakatakis mä qhanäñamarak munta.
[7] Juykhunakarusti uñjayañam munta, katuntatanakarus carcelat irpsuñamataki, kawki ch'amaka manqhanakantix jakapki ukata.
[8] Nayätwa Tatituxa, ukaw sutixaxa, janiw nayar jach'achañapäki uk yaqhar churaykäti, janirakiw naya lantxa yaqha diosanakarus yupaychaykäti.
[9] Kuntix nayratpach yatiykta ukax phuqhasiwayxiwa, jichhasti machaq yatiyäwinak yatiyapxäma, ukanakas akat qhiparux phuqhasirakiniwa.”
[10] Tatitur mä machaq q'uchu q'uchupxam, jayan utjapki uka markanakas juparux yupaychapxam, jach'a lamar qutasa, kunanakatix ukan utjki ukanakas yupaychapxam, quta iraman utjki uka markanakasa, uka markanakan jakirinakas yupaychapxam.
[11] ¡Wasaran utjir markanakas kusisipxpan! ¡Quedar ayllun utjirinakas kusisipxpan! ¡Selá tuqin utjirinakasti kusisiñat q'uchupxpan! ¡Q'uchutanakapsa qullu patatpach ist'ayapxpan!
[12] ¡Tatiturusti jach'ar aptapxpan, taqi chiqan juparux yupaychapxpan!
[13] Tatitusti mä atipirjamaw mistunini, taqi ch'amampiw nuwasir jaqjam nuwasini; nuwantañatakiw art'ani, uñisirinakaparusti atipjaniwa.
[14] Tatitusti siwa: “Walja urunakaw amukïskta, janiw kunsa arskaraktti; ukampis jichhax jach'at wararï, wawachisir warmjamaw jakhusï.
[15] Jach'a qullüpasa, jisk'a qullüpasa, q'al t'unjä, taqi ch'uxña alinakapsa q'al wañsuyä. Jawiranaksti wasararuw tukuyä, jisk'a qutanaksa wañt'ayarakïwa.
[16] Juykhunakarusti jan uñt'at thakhinakanjam irpä. Jupanakan nayraqatapansti ch'amakxa qhanaruw tukuyä, qullunaksti pampa uraqiruw tukuyä. Taqi ukanaksti lurapunïwa.
[17] K'ari diosanakar alkatasirinakasti, uka diosanakar yupaychirinakasa, p'inqachjataw jayar sarxapxani.
[18] “¡Uqaranaka, ist'apxam! ¡Juykhunaka, amuyt'asis uñtapxam!
[19] Israelax Tatitur luqtiritakiwa; Tatituw jupan khithapäñapatak ajllisiwayi; ukampis janiw yaqha markax Israel markjam sinti juykhu, sinti uqarax utjkiti.
[20] Taqi kun uñji, ukampis janiw kuns amuykiti; jinchunakapas jist'aratäskiwa, ukampis janiw kuns ist'kiti.
[21] Tatitusti, mä qhispiyiri Diosätapatxa, yatichäwipxa muspharkañ tukuyañ munäna;
[22] ukampis Israel markax q'al apt'asiwayi; uñisirinakapaw yänakapsa q'al aparawayxi; mayninakax uraq p'iyanakaruw imantasipxi, yaqhipanakasti katuntataw uñjasipxi, ¡janiw khitis jupanakar arxatirix utjkiti!”
[23] Taqi ukanakan ukham lurasitapatxa, Israelax janipuniw ist'asiñ munkiti.
[24] ¿Khitis Israel, Jacobun markaparux, atipjatäpan, katuntatarakïpan sixa? Pachpa Tatituw ukham luratäñap amti. Jupanakasti Tatitu nayraqatan juch lurapxi, janiw kuna thaktix Tatitux uñacht'ayki ukanjam sarañ munapkiti, janirakiw yatichäwinakaparus jaysapkiti.
[25] Ukatpï jupanakatakix phiñasïnxa, mä jach'a nuwasïwimpiw mutuyäna, ninampiw mutuyarakïna, ukham katuqkasas janiw jupanakax ist'asiñ munapkänti.