[1] Jach'a quta tuqinkir markanaka, ist'apxita, jayankir markanaka, wal wal ist'apxita: Janïra nayax yurkta ukkhatpachaw Tatitux nayar jawsitu, nayax, taykaxan purakapankaskäyäta ukkhatpach sutix arsuraki.
[2] Arunakaxsti mä ari espadäkaspas ukham tukuyi, amparapampiw imxatt'itu, mä ari mich'jam tukuyitu, mich'i imasiñaparuw imasxarakitu.
[3] Sarakituwa: “Israel, jumax nayan luqtirixätawa, juma tuqiw nayan jach'a kankañax uñacht'ayä” sasa.
[4] Nayasti saraktwa: “Inamayaw ch'am tukta, inamayatakikiw ch'amanakaxsa tukjasta” sasa. Chiqpachansa taqi lurañanakaxas Tatitun amparapankiwa, kuntix Tatitux waxt'kitani ukas wakicht'atäxiwa.
[5] Tatituxan nayraqatapansti jach'añchatäñ katuqta, jupaw nayan ch'amañchirixaxa. Tatitusti jupan luqtiripäñaxatakix taykaxan purakapatpach nayar sayt'ayitu, Israel markan kuttanxañapataki, ukatsti jupampi mayakïxañapataki. Jawskitu uka Tatitux akham siwa:
[6] “Nayax Israel markan ayllunakapar tantacht'iriw khitsma, markapar kuttayanxiriw khitsma. Ukampis uka luräwix juk'akïspawa. Ukatpï jumarux markanakan qhanapar tukuyämaxa, qhispiyasiñaxsa aka uraqi tukusin utjkis uka markanakar apañamataki.”
[7] Israel marka, jumax taqi markanakan jisk'achjata, uñisitaw jikxatastaxa, jichhas uka qhuru jaqinakan t'aqhisiyatakïsktawa. Ukhamax nayan arunakax ist'am: “Juman Diosamax naya sapakïtwa; kunapachatix reyinakasa, jilïrinakas uñjapkätam ukapachaxa, juma nayraqatan alt'asipxani. Naya, Israelan Qullan Diosapaw jumarux ajllissma, arsutanakaxsti phuqharaktwa” sasa.
[8] Tatitux siwa: “Khuyapayasiñax uñacht'ayañ urux puriniwa, ukat khuyapt'ayaraksma; qhispiyasiñ urux puriniwa, nayasti qhispiyaraksmawa. Nayaw jumarux arxatsma, arust'äwinakax aka markamp lurañatakiw uskt'sma, tukjat uraqinaka wasitat katusxañapataki,
[9] katuntatanakarus sapxañamataki: ‘Jichhax antutatäxapxtawa’ sasa, ch'amakankirinakarusti: ‘Qhanar mistunxapxam’ sañataki. Taqi thakhi chiqanakansti walja chhuxllanak jikxatapxäta, kawki wasara qullunakansa uywanakamatakix chhuxlla jikxatapxakïtawa.
[10] “Janiw manq'at awtjayaskxapxaniti, umatsa pharjayaskxapxaniti, janirakiw lupisa, junt'usa qhatintkxaniti, nayaw jupanakar munta ukat irpta, jalkiri uma thiyanakaruw irparakï.
[11] Qullu tuqinakansti mä thakhi jist'ararapï, uka thakhinaksti khuskhacharakïwa.”
[12] ¡Uñtapxam! Jayat jutapxi, Mayninakax amstata, mayninakasti inti jalanta tuqita, mayninakasti Asuán siski uksatarak jutapxi.
[13] ¡Alaxpacha, kusisiñat art'asim! ¡Uraqi, walpun kusisim! ¡Qullunaka, kusisiñatsti wal arnaqasipxam! Naya sapa Tatitukiw markaxarux chuymachta, jan kunaninakatsa khuyapt'ayasta.
[14] “Jerusalén markasti sänwa: ‘Tatitux apanukxituwa, Diosaxaxa nayat armasxituwa’ sasa.
[15] Ukampisa: ¿Mä taykax wawanakapat armasispati, jan ukax, munasiñap janirakich churkaspa? Inas uka taykax armaschispa, ukampis nayax janipuniw armaskämati.
[16] Nayax amparaxan qillqantatpuni irpsma, pirqanakamatsti amtasipuntwa.
[17] Khitinakatix t'unjapkäyätam ukanakat sipansa, pirqanakam sayt'ayirinakax mäkiw pirqtapxi; jumar tukjirinakas sarxapxarakiwa.
[18] Sartasim ukatsti taqi tuqi uñatatasim, uñtam, kunjämsa taqini tantachasipxi, ukatsti juman ukar kuttanipxaraki. “Naya, Tatituw jakañax layku ukham lurta, taqi jupanakasti jumatakix mä suma qurir uñtatäniwa, jaqichasir tawaqun k'achachanakapjama.
[19] Markamax q'ala aynacht'atänwa, q'ala tukjatarakïnwa; ukampis jichhax uraqimaxa taqi jaqinakamatakix jisk'akïniwa. Jumar tukjirinakasti jayankxiwa.
[20] Kawkïri wawanakamatix chhaqtatjamäkän ukanakasti jinchu jak'at sapxarakïtam: ‘Aka markax nanakatakix sinti jisk'akiwa; jakañanakaxatak mä chiqawja uñacht'ayapxita’ sasa.
[21] Jumasti Jerusalén marka, mä taykjamaw sarakïta: ‘¿Khitis walja wawanak churitu? Janiw nayax wawanakanïkäyätti, janirakiw wawanïñatakis askïkäyätti; nayax jayar apanukutaw uñjasïyäta; ¿khitirak jupanakar uywpachänsti? Sapak nayarux apanukuwayapxitäna, ¿kawkitarak jutapxpachasti?’ ’’ sasa.
[22] Tatitusti siwa: “Markanakaruw arsüwix churä, yuqall wawanakamarusa, imill wawanakamarus amparanakapar ichunxañapatakiw mayirakï.
[23] Reyinakaw jumanakar uywasir awkinakamäni, reyinakan phuchhanakapasti wawa uywirinakamarakïniwa. Jupanakasti juma nayraqatan uraqkamaw alt'asipxani, laq'arar kayunakamsa jamp'att'apxarakïtamwa. Ukapachaw jumax nayan Tatitütax yatïta, khitinakatix nayar iyawsapki ukanakasti, janiw p'inqachjat uñjasipkiti.”
[24] ¿Mä ch'amani jaqirux aparatäspati kuntix jupax nuwasïwin aparanki ukxa? ¿Jan ukax mä katuntat jaqix jupar uñjiri qhuru jaqit jaltaspacha?
[25] Tatitusti ukhamäspaw siwa: “Ch'amani jaqirusa, qhuru jaqirusa, kuntix nuwasïwin aparanipki ukanakxa jupanakax aparapxaniwa. Israelitanaka, jumanakaruw sapxsma, naya kipkaw jumampi ch'axwki uka jaqinakampix katjasï; naya kipkaw wawanakamarus qhispiyä.
[26] Jumar t'aqhisiyirinakarusti, pachpa janchip manq'asiyä, pachpa wilapampiw vinompjam macharapxani. Ukhamat taqi jaqinakax yatipxani naya sapaki Tatit Diosätaxa, nayätwa taqi ch'aman Tatituxa, Israel markar qhispiyirixa.”