[1] Wasarankki uka Selá markatpachwa, Moab markan jilïrinakapax ovejanak apayanipxi, Jerusalén Diosan utapan Tatitur waxt'äwinak churañataki.
[2] Moab markan jakirinakaxa, Arnón jawir chiqnäma makhatasasti, tapat jaltiri mulljat jamach'inakjamäpxiwa.
[3] Jerusalén markankirinakarux sapxarakiwa: “Arxatt'atäñ thaqhapxta, jumay nanakarux arxatt'apxita. Chika urus ch'iwimampiy ch'iwt'ayapxita, arumäkaspas ukhamay ch'iwxatt'ayapxita; jayar ananukutanakarusti jumay katuqt'am, janirakiy uñisirinakaxarux katuyapxistati.
[4] Moab markat jaltanirinakarux jumay katuqt'am. T'unjirinakatsa jumay imantt'asim.” Kunapachatix t'aqhisiñax tukusxani, t'unjatäñas jan utjkxarakini, marka t'unjiris sarxani ukapachaxa,
[5] Davidan wawanakapat mayniw Israel markan reyipat utt'asini, jupan apnaqäwipasti chiqapa, askïniwa; jupax taqiniruw munasiñampi irpani, jank'akiw chiqaparus uñjani.
[6] Moab markankirinakasti jach'a jach'a tukur jaqinakäpxiwa: taqinitsa juk'amp jach'anakäpkaspas ukham amuyasipxi, mayninakarus jisk'achasiñampiw uñkatapxi. ¡Ukampis pantjatäpxiwa!
[7] Ukat jichhax Moab markankirinakax markapat jachapxani; Quir-haréset chiqan jakir jaqinakatsa, chuymanakapxa wal usuyasipxani.
[8] Hesbón, Sibmá siski uka chiqanakan utjir uva yapunakax q'ala ankuntatawa, asirionakaw uka uva yapunak q'al tukjawayi. Uka uva yapunakasti Jazer chiqkamänwa, wasarkamarakiw purïna, jach'a qutat khursakamaw purirakïna.
[9] Ukat Sibmá siski uka chiqan uva yapunakat jachta, Jazer chiqankir uva yapunakatsa jacharakta, Hesbón, Elalé siski uka uraqinakatsa walpun jachta, jaqir kusisiyañatakix janiw kuna yapunakas utjkxiti.
[10] Uva yapunak taypinakanxa, kusisiñat arnaqasiñax tukusxaniwa; janiw uva apthapirinakan kusisiñat arnaqasiñanakapax utjkxaniti, janirakiw uvat vino ch'irwirinakas kusiskxapxaniti. Kusisiñat arnaqasiñanakax tukusxiwa.
[11] Moab, Quir-haréset markanakan jan walt'atapatxa, chuymaxax mä arpjamaw llakisiñat wal khathati.
[12] Moab markax qullunakarus saraskpan, qarjtañkamas arnaqasiskpan, diosanakapar mayisiris sarasipkpan, janiw kuna yanapsa jikxatapkaniti.
[13] Aka arunak Tatitux Moab markatak nayra maranakan arsüna.
[14] Jichhasti Tatitux siwa: “Mä irnaqirin luräwipax kimsa maratakikiwa. Ukat sapxsma, akat kimsa mararusti, Moab markan jach'a kankañapax q'ala tukjatäniwa. Jaqinakapax q'ala jiwarayatäniwa; mä qawqhanikiw jan jiwayat qhiparapxani, uka qhiparirinakasti pisi ch'aman jaqinakkamakïniwa.”