[1] Aski jaqinakax jiwarawayxiwa, janiw khitis llakt'askiti; suma jaqinakas jiwarawayxiwa, janirakiw khitis ukham jiwatanakapampix, ñanqhat qhispipxatap amuykiti.
[2] Jupanakax nayaruw taqi kunan iyawsawayapxitu, jichhasti imantatäpki ukan suman samarasipki.
[3] Layqa warmin wawanakapa, yaqha warmimpi, yaqha chachampi sarnaqir warmin wawanakapa, jak'achasinipxam:
[4] ¿Khititsa jumanakax larusipxta? ¿Khitirus jumanakax jisk'achañampi uñtapxta? ¿Khititakis laxranakamsa jisksupxta? Jumanakax juchan wawanakapäpxtawa, k'ari jaqinakan wawanakapäpxtawa;
[5] roble quqanak taypina, jach'a quqanak jak'ana, uka k'ari diosanakar yupaychañatakiw q'añu lurañanakar katuyasipxtaxa, jawira thiyanakana, qarqa p'iya manqhanakana jisk'a wawanaksa wilañchanak luqtapxtaxa.
[6] “Israel, jumax jawira llust'a qalanakaruw yupaychtaxa, ukan jumatakix mä chiqax wakichat utji. Uka qalanakaruw vino luqtäwinak churastaxa, granonaksa churasiraktaxa. ¿Taqi uka luratamatsti kusisïti?
[7] Ikiñamsa mä alay qulluruw wakichastaxa, uka qullunakaruw wilañchanak luqtasirix makhattaxa.
[8] Utaman punku qhipäxanakaparuw uka axtaskañ diosam uchastaxa. Nayat armt'asisax uka diosanakaruw yupaychtaxa; yaqha markanakampiw sumar manttaxa, ukkañkamasti uka diosanakaruw yupaychtaxa.
[9] “Mélec sat diosan ukaruw jaltaxa, aceite, walja suma q'apkiri qullanak apt'ata; khithanakamsa wali jayakamaw khittaxa, jiwatanakax kawkinkkitix ukakamaw khittaxa.
[10] Uka diosanakar yupaychañatakisti, uksar aksaruw sarnaqtaxa, amuyatax janis qarkasma ukhamätawa, ukampis taqi uka luratamax inamayakiwa.
[11] “¿Khitinakarak uka diosanakasti, nayar jan chiqa chuymampi arkañamataki, uka diosanakar axsaras yupaychkäyäta ukasti? Kunapachatix jumax jan jach'añkïyästa ukkhaxa, nayax amukïskäyätwa, jan amuyirikiw tuküyäta.
[12] Ukampis jichhax ukham sarnaqatam qhanañchäwa, uka sarnaqäwimsti wali sumäkaspas ukham amuytaxa.
[13] Kunapachatix yanapa mayisa arnaqasiskät ukkhaxa, diosanakamax janiw yanapkätamti, janirakiw qhispiykätamsa. Taqi ukanakarusti thayaw apasxani, may phust'asakiw chhaqtayxani. Ukampis nayar iyawsirixa, mä uraqi katuqxani, Jerusalenan jakxani. Nayaw jach'a ch'aman Diosätxa.”
[14] Ukapachaw mä arux ist'asini: “Mä suma khuskha thakhi wakichapxam, markaxan sarakipañapatakix lanktañanak aptapxam.”
[15] Alaxpachankir Tatitu, khititix wiñayatak jakki, sutipasti qullanäkaraki, ukax akham siwa: “Nayax alay qullan chiqan jakta, ukampis khititix alt'at chuymani, llakt'ata sarnaqki ukarux ch'amañcharaktwa.
[16] Janiw markaxarux juchañchkäti, janirakiw wiñayatakis phiñaskäti, naya pachpaw jumarux lurassma, janirakiw juman ch'ama laq'ayasiñamsa munkti.
[17] Israelan juchap laykuw mä pachax phiñasitäyätxa, juparux mutuyayätwa, ukatsti apanukuyätwa; ukampis jupax nayatakiw sayt'asïna, jupan amtataparjamakiw sarnaqäna.
[18] Sarnaqäwip uñjtwa, ukampis nayaw qullxatä, samarañ churarakï, chiqpachansa samarataw uñjasxani. Llakitanakarusti nayaw chuymachä,
[19] taqinirus sarakïwa: ‘¡Samarañax jayankirinakamp utjpan, ukhamarak jak'ankirinakampisa! ¡Nayaw markaxarux qullt'asxä!’
[20] Ñanqha lurir jaqinakasti qhuthutir mä qutar uñtatäpxiwa, jan t'akurkayäpxiwa, mathapinakapamp chikasti, ñiq'impi kunayman q'añunakamp willsuni.
[21] Ukham ñanqha lurir jaqinakatakix janiw sumankañax utjkiti.” Tatituw ukham arsu.