[1] Markanaka, ist'añatak jak'achasinipxam; jach'a markanaka, wal wal ist'apxam. Taqi akapachan utjirinak ist'pan, kunanakatix achki ukanakamppach ist'arakpan.
[2] Tatitusti markanakatakixa, taqi ejercitonakapatakis phiñasitawa, q'al t'unjatäpxañapatak juchañchatäpxiwa.
[3] Jiwatanakax apanukutäpxaniwa, uka jiwatanakan janchinakapasti walpun thujsani, qullunakansa wilax jawirjamaw jalarakini.
[4] Alaxpachankir warawaranakax t'unthaptaniwa, alaxpachasti mä papeläkaspas ukhamaw llawthaptani, taqi warawaranakas janiw qhankxaniti, kunjämtix uva alina, higo alin laphinakapax wañsusin willirtki ukhama.
[5] Jïsa, Tatitun espadapax alaxpachan uñsti, Edom markxaruw purini, uka markasti jiwañar katuyatawa.
[6] Edom markan Bosrá sat markan qamapanxa, mä jach'a jiwarayäwiw utjani, wilas umjamaw jalarakini. Tatitun espadapasti wilampi, lik'impi jawikipatäniwa, kunjämatix ovejanakasa, cabritonakas waxt'äwitak kharsutax ukhama.
[7] Jaqinakasti, walipuniw jiwarapxani, kunjämtix urqu vacanakax jiwarayatax ukhama. Uraqipasti wilampi ch'ach'antatäniwa, laq'as lik'impi phuqhantatäniwa.
[8] Jïsa, Tatitux uka uruw phuqsusini; Jerusalén markatakix phuqsusiñ mara satäniwa.
[9] Edom markankir jisk'a jawiranakapanxa, alquitranaw uma lanti jalani, uraqin laq'apasti azufreruw tukuni, junt'uptayat alquitranjamaw nakhani.
[10] Janirakiw ukax urus arumas jiwt'kaniti, jiwq'ipas walipuniw sartani. Wiñayatak apanukutaw uñjasini, janirakiw khitis uka chiq wasitat mäkipkxaniti.
[11] Tatitusti uka markxa ch'usa wasararuw tukuyani. Ukan jukunakasa, allqamarinakasa, ch'usiqanakasa tapanakap tapachasipxani.
[12] Jan reyiniw jupanakax uñjasxapxani, taqi jach'a jilïrinakapasti janiw utjkxaniti.
[13] Reyi utanakapansti, jach'a pirqanakapansa, itapallunakampi, kunayman ch'aphi quranakampiw jilantxani. Qullu anunakan utjäwipaw tukxani, suri jamach'inakan utjäwiparuw tukxani.
[14] Monte phisinakasti qullu anunakampiw mayachasipxani, cabritonakas jupanakkamaw jawsasipxani, aruma mulljir ch'usiqanakas ukan jakapxani, ukanarak ikirapxani.
[15] Jukux ukan tapap lurasini, ukan k'awnani, chhiwchhinakapsa ukan ansuni, mayar anthapisaw sum uywarakini. Pakalinakas ukan tantachasipxani, urquni qachuniw ukan jakapxani.
[16] Tatitun qillqatap uñxatapxam, ullart'apxarakim: janipuniw mayas uka animalanakat chhaqhatäkaniti, urquni qachuniw ukankapxani, Tatitu kipkaw ukham amti, samanapampi phust'asaw tantachthapini.
[17] Sapaqat mayniruw utjäwip uñacht'ayi, amparapampiw utjäwip uñacht'ayi, wiñayatakiw ukan jakapxarakini.