[1] Israel markan uñisirinakapax lamar qutan axsarkañ laq'ur uñtatäpxiwa, katarinakjamaw uksar aksar q'iwinaqtapxi, ukampis Tatituw jach'a ch'aman espadap ayxarusini, ukampiw q'al jiwarayani.
[2] Uka urunsti Tatitux sarakiniwa: “Israel markatak q'uchupxam.
[3] Naya Tatituw uka markarux uñjaskta, uruy arumaw imaskta, ukhamat jan khitis ñanqhachañapataki.
[4] Janiw jupatakix phiñasitäkxti; ukampis jan ist'asirinakax utjaskakiwa, ukatsti, nayaw uka markat jupanakarux apsü.
[5] Israel markatix nayan jupar imañax munchixa, nayampix sumar mantañapawa; jïsa, nayampix sumankthapiñapawa.”
[6] Akat qhiparux Israel markax jach'aruw tukxani, aka uraqpacharuw jaqinakamp phuqhantani.
[7] Tatitux Israel markarux janiw mutuykiti, kunjämtix jupar uñisirinakar mutuyki ukhama, janirakiw Israel markarux t'unjkiti kunjämtix uñisirinakapar t'unjki ukhama.
[8] Tatitux jaya markar apayasaw markapar mutuyi, mä jach'a thayjam phust'asaw apanuku, kunjämtix inti jalsu thayax phust'anki ukhama.
[9] Israelitanakatix uka yaqha diosanakan altaranakapa, kawkhantix yupaychapxirïkäna ukanak q'al t'unthapipxan ukkhaxa, Tatitux jupanakan juchanakap pampachaniwa.
[10] Wali suma pirqantat markasti q'ala tukjataw uñjasi, mä apanukut utjama, mä ch'usa wasara jan jaqinjama. Jichhax uywa awatisiñ chiqakïxiwa, uywanakax layminak manq'apxi, ukanarak jipirt'xapxi.
[11] Mä quqan layminakapax wañsxi ukkhax p'akirtxiwa; warminakasti uka layminak apthapisaw phayasipxi. Mä jan amuyt'asir markawa. Ukatpï jupanakar irnuqir Tatitux jan khuyapt'ayaskanitixa.
[12] Kunapachatix Tatitux Israelan juchap pampachkani ukkhaxa, Tatitux Éufrates jawirata Egipto jawirkamaw uraq khathatiyani; jumanak israelitanakarusti, mayat mayat apthapipxätam, kunjämtix yapu luririx cebadap apthapki ukhama.
[13] Uka urunsti mä jach'a trompetaw phust'asini, khitinakatix Asiria markan katuntatäpkän ukanakaxa, Egiptor apayatäpkäna ukanakasa, Tatitur yupaychiriw Jerusalén qullana markar jutapxani.